ޕީއެންއެފްގެ ޖަލްސާއެއްގައި ވާހަކައެއް ދައްކާލީމައި ފުލުހަށް ހާޒިރުވާން އަންގަނީ އެއީ ފުލުހުންގެ އެންމެ އިސްކަމަކީ އަދި ޒިންމާއަކީ ރައީސް ޑރ މުޢިއްޒުއާއި ރައީސްގެ އާއިލާ ބެލެހެއްޓުންތޯ އައްސަވާ ފުލުހުންގެ ޒިންމާއާއި މަސްޢޫލިއްޔަތާއި ދޭތެރޭގައި ރައީސް ޔާމީން ސުވާލު އުފައްދަވައިފިއެވެ
“ ކުޑަކުދިންގެ ޙައްޤުތަށް ބެލެހެއްޓުމަށް ސަރުކާރުގެ ވަކި ދާއިރާއެއް އެބައޮތް. މިއިން ކޮންމެ ކަމަކަށް ފުލުހުން މި ތޮރުފިގަންނަނީ ކީއްވެތޯ.“ ފުލުހުން ރާއްޖޭގައި ކުރަން މިއަށްވުރެ ބޮޑެތި މިއަށްވުރެ މުޙިއްމު މަސައްކަތް ނެތީތޯ“ – ރައީސް ޔާމީން –
ރައީސް ޔާމީން މިމޭރުމުން ވާހަކަފުޅު ދައްކަވާފައިވަނީ ޕީއެންއެފްއިން ސިލްސިލާކޮށް ކުރިއަށް ގެންދާ ޖަލްސާތަކުގެ ތެރެއިން ބުރާސްފަތި ދުވަހުގެރޭ ކުރިއަށް ގެންދިޔަ ގަލްސާގައި އޯޑިއަންސްގައި އިންނަވާ ވާހަކަފުޅު ދައްކަވަމުންނެވެ.
ކުޑަކުދިންގެ ހައްޤުތައް ބެލެހެއްޓުމަށް ސަރުކާރުގެ ވަކި އިދާރާއެއް އޮންނައިރު މީގެން ކޮންމެ ކަމަކަށް އެންމެ ފުރަތަމަ ފުލުން އިސްނަގައިގެން މިއީ މާ މުޙިއްމު ކަމަކަށް ދެކިގެން މިކަމުގެ ތެރެއަށް ފުލުހުން ތޮރުފިގަންނަނީ ކީއްވެތޯ ރައީސް ޔާމީންވަނީ ސުވާލު އުފައްދަވާފައެވެ. އަދި ރާއްޖޭގައި ފުލުހުން ކުރަން މިއަށްވުރެ ބޮޑެތި މިއަށްވުރެ މުޙިއްމު ކަންތައްތައް ނެތީތޯ އާއި މިކަހަލަ ކަންކަމަށް ފުލުހުން އިސްކަމެއް ދެއްވަނީ ކީއްވެގެންތޯ ރައީސް ޔާމީން ވަނީ ސުވާލު އުފައްދަވާފައެވެ.
ރައީސް ޔާމީން މިމޭރުމުން ވާހަކަފުޅުދައްކަވާފައި މިވަނީ ކުޑަކުއްޖެއްގެ ކަރާމާތަށް އުނިކަން އަންނަގޮތަށް ވާހަކަތަކެއް ދެއްކި ކަމަށް ބުނެ ޕީއެންއެފްގައި އިސްކޮށް ހަރަކާތްތެރިވާ ހުސައިން ވަހީދުގެ އިތުރުން އެ ޕާޓީގެ އިތުރު އެކްޓިވިސްޓެއް ކަމަށްވާ މުހައްމަދު ވަހީދު ވެސް އެ މައްސަލައިގައި ފުލުހަށް ހާޒިރުވުމަށް އަންގައި ފުލުހުން ޗިޓުފޮނުވާފައިވާ ދަނޑިވަޅެއްގައިކަން ފާހަގަކޮށްލެވެއެވެ.
ޕީއެންއެފްގެ ޖަލްސާއެއްގައި ވާހަކަދައްކާލީމަައި ފުލުހަށް ގެންދާއިރު ރައީސް ޑރ. މުޢިއްޒުގެ ދެކަނބަލުން ތިއްބަވައިގެން މެޑަމް ސާޖިދާގެ ފިރިހެން ދަރިކަލުންނާއި ބެހޭގޮތުން އެކަމަނާ ދެއްކެވިވާހަކައިގެ ވީޑިއޯއެއް މިހާރު ސޯޝަލް މީޑީއާގައި ދައުރުވަމުންދާކަމަށް ރައީސް ޔާމީން ވިދާޅުވިއެވެ. ރައީސް ޔާމީންވަނީ ރައީސް ޑރ. މުއިއްޒުއާއި ފަސްޓް ލޭޑީ ”ގޭގެ ލޯންޑްރީ“ ޕަބްލިކްގައި ދޮންނަންނުޖެހޭކަމަށް ވިދާޅުވެފައެވެ. އަދި މިކަހަލަ ވާހަކަ މި އުފެދެނީ އެހެން ދޮވުނީމަކަމަށް ރައީސް ޔާމީން ވިދާޅުވިއެވެ. ރައީސް ޔާމީން ”ގޭގެ ލޯންޑްރީ“ މިހެން މި ވިދާޅުވީ ގޭތެރޭގެ ޕާރސަނަލް ވާހަކަތަކަށް އިޝާރަތް ކުރައްވާކަމަށް ބެލެވެއެވެ.
ރައީސް ޔާމީންވަނީ ފުލުހުންނަށް މިކަންކަން ނުފެންނަނީ ކީއްވެތޯ އައްސަވާ ކަންބޮޑުވުން ފާޅުކުރައްވާފައެވެ..
މީގެ އިތުރުން ރައީސް ޔާމީންގެ ވާހަކަފުޅުގައި ޒަކިއްޔާގެ މަރުގެ މައްސަލައަށްވެސް އަލިއަޅުއްވާލައްވާފަވެއެވެ. މިގޮތުން ފުލުހުންނަށް އެއީވެސް ބޮޑުކަމަކަށްނުވާކަމަށް ރައީސް ޔާމީން ވިދާޅުވިއެވެ. އަދި ފްލެޓް ލިސްޓަށް 8 ހާހަށްވުރެ ގިނަ ޝަކުވާ ހުށަހެޅިފަވާއިރު އެވެސް ބޮޑުކަމަކަށްނުވެ, ރޯވެ ހުލިވެގެންދިޔަ ގްރީން ބިލްޑިންގްގެ ވާހަަކަވެސް މިހާރު ނުދައްކާކަމަށް ވިދާޅުވިއެވެ. މިހުރިހާކަމެއް ރައްޔިތުންނަށް ސާފުކޮށްދޭންޖެހޭކަމަށް ރައީސް ޔާމީން ވިދާޅުވިއެވެ. ޕީއެންއެފްއިން އަބަދުވެސް ވާހަކަދައްކާނީ ތެދުބަހުން ކަމަށާއި އަދި ޕީއެންއެފްއިން ގެނެސްދެނީ ރައްޔިތުންގެ އިޙްސާސްތަކާއި ރައްތިތުންނަށް އުނދަގޫވާ ކަންތައްތައްކަމަށް ރައީސް ޔާމީން ވިދާޅުވިއެވެ.
