ދިވެހިބަހާ ސަޤާފަތާ ތަރިކައާ ބެހޭ ވުޒާރާގެ މުޝީރު މަރުޙޫމް މަޑުލު މުޙައްމަދު ވަޙީދު އަވަހާރަވުމާ ގުޅިގެން، އެ މަނިކުފާނުގެ ހަނދާނުގައި ބާއްވާ ތަޢުޒިޔާގެ ދަފްތަރު ބުރާަސްފަތިދުވަހު ދިވެހިބަހުގެ އެކެޑަމީގައި ހުޅުވާލައިފިއެވެ.
ދިވެހިބަހުގެ އެކެޑަމީން ވިދާޅުވި ގޮތުގައި، ތަޢުޒިޔާގެ ދަފްތަރުގައި ޝުޢޫރު ފާޅުކުރެއްވުމަށް ހުޅުވާލެވިފައިވަނީ މި މަހުގެ 30 ވަނަ ދުވަހުގެ ނިޔަލަށެވެ. ރަސްމީ ދުވަސްތަކުގައި ހެނދުނު 9:00 އިން މެންދުރުފަހު 1:30 އަށް ދަފްތަރުގައި ސޮއިކުރެއްވުމުގެ ފުރުސަތު ވަނީ ހުޅުވާލާފައެވެ.
މަރުޙޫމް މަޑުލު މުޙައްމަދު ވަޙީދަކީ ދިވެހިބަހާއި އަދަބިއްޔާތާއި ތާރީޚާއި ސަގާފަތުގެ ރޮނގުން ގިނަގުނަ ޚިދުމަތްތަކެއް ކޮށްދެއްވާފައިވާ އެކެޑަމީގެ މުޝީރެކެވެ. އެ މަނިކުފާނަކީ 46 އަހަރަށްވުރެ ދިގު މުއްދަތެއްގައި ދިވެހިބަހުގެ ލިޔުންތެރިކަމުގެ ދާއިރާއަށް މެދުނުކެނޑި ޚިދުމަތް ކުރައްވަމުން ގެންދެވި ބޭފުޅެއްކަން ފާހަގަކޮށްލެވެއެވެ. މަރުޙޫމް މަޑުލު މުޙައްމަދު ވަޙީދުގެ އަގުހުރި ޚިދުމަތްތަކަށް ބައްލަވައި، 2019 ވަނަ އަހަރު ދިވެހިބަހުގެ ލިޔުންތެރިކަން ކުރިއެރުވުމުގެ ރޮނގުން ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވިއެވެ. މީގެއިތުރުން، 2018 ވަނަ އަހަރު ނޫސްވެރިކަމުގެ ޝަރަފުގެ އަލިމަސް ގަލަމާއި، ޢާންމު ޚިދުމަތަށް ހިތްވަރުދިނުމުގެ އިނާމު ދެ ފަހަރުމަތިން ޙާސިލުކުރެއްވިއެވެ.
މަރުޙޫމް މަޑުލު މުޙައްމަދު ވަޙީދު އަވަހާރަވެފައިވަނީ 13 އޭޕްރީލް 2025 ގައެވެ.
