ސަރުކާރުގެ ހުޅުމާލޭގައި ތަރައްޤީކުރާ ތެލެސީމިއާ ސެންޓަރުގެ ނިންމުމުގެ މަސައްކަތް ސިފައިން ފަށައިފިއެވެ.
މިގޮތުން ހުޅުމާލޭގައި ހުންނަ އޮރެންޖު ހިޔާ އަށް ތެލެސީމިއާ ސެންޓަރު އަވަހަށް ބަދަލުކުުރަން ރައީސުލްޖުމްހޫރިއްޔާ ނިންމެވުމުން ސިފައިން އެ މަސައްކަތް ހުކުރުދުވަހު ފަށައިފާވާކަމަށް މޯލްޑިވްސް ނެޝެނަލް ޑިފެންސް ފޯރސްއިން އެކްސްގައި ކޮށްފައިވާ ޕޯސްޓެއްގައި ބުނެފައިވެއެވެ.
ތެލެސީމިއާ ސެންޓަރެއްގެ ގޮތުގައި ހުޅުމާލޭގައި ސަރުކާރުން ތަރައްޤީކުރަން ނިންމާފައިވާ ކޮވިޑް-19 ގެ ދުވަސްވަރުގައި ބޭނުންކުރި އޮރެންޖް ބިލްޑިންނެވެ.
އެތަނުގެ މަސައްކަތް ކުރުމަށް ހަވާލުކުރި ކުންފުނިން މަސައްކަތުގެ ދެބައިކުޅަ އެއްބައި ވެސް ނިންމާފައި ނުވާއިރު އެ ކުންފުންޏާއިއެކު ވެފައިވާ އެއްބަސްވުން ވެސް މިހާރު ވަނީ ހަމަވެފައެވެ.
މި މަސައްކަތް ސިފައިންނާއި ހަވާލުކޮށްފައި ވަނީ މަސް ދުވަހުގެ ތެރޭގައި ނިންމުމަށެވެ.
ރައީސް ވަނީ އޮރެންޖް ހިޔާއަށް ތެލަސީމިއާ ސެންޓަރުގެ ޚިދުމަތް ބަދަލުކުރުމުގެ ކަންކަން ރަނގަޅަށް އަދި ޚިދުމަތް ހޯދާ ފަރާތްތަކަށް ފަސޭހަވާނެ ގޮތަށް ކުރިއަށްގެންދިއުމަށް އިރުޝާދު ދެއްވާފައެވެ.
އަދި އޮރެންޖް ހިޔާއިން ތެލަސީމިއާގެ ޚިދުމަތް ފޯރުކޮށްދޭން ފެށުމުން ޚިދުމަތް ހޯދާފަރާތްތައް އެތަނަށް ދަތުރުކުރުމަށް، އެމް.ޓީ.ސީ.ސީގެ ބަސްހުއްޓިއެއް ހަމަޖެއްސުމާއެކު ހިލޭ ދަތުރުކުރެވޭނެ އިންތިޒާމް ހަމަޖެހިގެންދާނެކަމަށް އެމަނިކުފާނު ވިދާޅުވިއެވެ. ތެލެސީމިއާ ސެންޓަރުގެ މަސައްކަތް ހަރުދަނާ ކުރުމަށް ނެންމެވި ބައެއް ކަންތައްތަކުގެ ތެރޭގައި ތަނަށް ބޭނުންވާ ނަރުހުން އިތުރުކުރުމާއި ތަނަށް ބޭނުންވާ އެކި ސާމާނުތައް ހޯދުމާއި , ސީނިއާ ފިޒީޝަނެއް ހަމަޖެއްސުމާއި. , ލެބޯޓްރީއަށް ބޭނުންވާ ވަސީލަތްތަކާއި މުވައްޒަފުން ހޯދުމުގެ އިތުރުން މަސައްކަތުގެ ގަޑިއިތުރުކޮށް ހިއުމަން ރިސޯސް އިތުރުކުރުން ހިމެނެއެވެ.
