މާލޭގައި މިއަދު މެންދުރު 2:30 ފެށުމަށް ތާވަލްކުރި މަސްދަޅުކޭސް ބެހުމުގެ ހަރަކާތް މިރޭ 8:30 ފެށުމަށް ނިންމައިފިއެވެ.
މިފްކޯ އިން ބުނީ ސަރުކާރުގެ ފަރާތުން އާންމުންނަށް ދޫކުރާ މަސްދަޅުކޭސްތައް ދޫކުރަން ފަށާނީ މިރޭ 08:30 އިން ފެށިގެން ކަމަށެވެ. އޭގެ ކުރިން މިފްކޯ އިން ވަނީ މިއަދު މެންދުރު 02:30 އިން ފެށިގެން 18:00 ގެ ނިޔަލަށް މަސްދަޅު ކޭސް ދޫކުރާނޭކަމަށް ބުނެފައެވެ. އެހެންނަމަވެސް މިހާރު މިވަނީ މަސްދަޅުކޭސް ބަހާ ގަޑިއަށާއި ސަރަހައްދައްވެސް ބަދަލު އައިސްފައެވެ.
މަސްދަޅު ބެހުން ކުރިއަށްދާނީ މިރެއިން ފެށިގެން މިމަހުގެ 27 އަށް، ހުކުރު ދުވަސް ފިޔަވައި ކަނޑައެޅިފައިވާ ވަކި ގަޑިތަކެއްގައެވެ. މިގޮތުން މާލޭ ސަރަޙައްދުގައި މަސްދަޅުކޭސް ބެހުމަށް ނިންމާފައިވަނީ:
20 ފެބުރުވަރީ ރޭގަނޑު 20:30އިން 23:00އަށް
22 ފެބުރުވަރީ ހެނދުނު 10:00އިން ހަވީރު 16:00އަށް
22 ފެބުރުވަރީ ރޭގަނޑު 20:30އިން 23:00އަށް
23 ފެބުރުވަރީ އިން 27 ފެބުރުވަރީއަށް މެންދުރު 14:30އިން 18:00އަށް
23 ފެބުރުވަރީ އިން 27 ފެބުރުވަރީއަށް ރޭގަނޑު 20:30އިން 23:00އަށް
މަސްދަޅުކޭސް ބަހަން ނިންމިފައިވާ ސަރަހައްދުތައް:
މާލޭގައި: މިފްކޯ އޮފީސް ކޮމްޕައުންޑް އަދި ހެންވޭރު އެމްޓީސީސީ ސޯމިލް
ވިލިމާލޭގައި: ވެމްކޯ ސައިޓް
ހުޅުމާލެ ފޭސް-1 ގައި: އުމަރު ޒާހިރު ބިލްޑިންގ
ހުޅުމާލެ ފޭސް-2 ގައި: ހިޔާ ފްލެޓް ޓަވަރ 10 ގެ ޔޫތު ސެންޓަރު
މަސްދަޅު ކޭސް ބަލާ އަންނައިރު އެ ގޭބީސީއެއްގެ ކަރަންޓް ބިލްގެ އެންމެ ފަހު ތިން މަހުގެ ބިލްގެ ތެރެއިން ކަރަންޓް މީޓަރު އެނގޭނެ ފަދަ ލިޔުމެއް ގެންނަން ޖެހެ އެވެ. އަދި ބަލާ އަންނަ މީހެއްގެ އައިޑީކާޑު ބޭނުންވާނެ އެވެ. މަސްދަޅު ކޭސް ދޫކުރާނީ ހަމައެކަނި ދިވެހީންނަށެވެ.
