ކުރީގެ ސަރުކާރުން އެކުލަވާލި ބަދަލު ދިނުމުގެ އުސޫލުގެ ދަށުން ހަދާފައިވާ އެއްބަސްވުންތަކަށް އަމަލު ކުރަން ނުޖެހޭނެ ކަމަށް ބަންޑާރަ ނާއިބުގެ އޮފީހުން ނިންމައިފިއެވެ.
އެ އޮފީހުން މިއަދު އެކްސްގައި ކުރިޕޯސްޓުގައި ހިއްސާކުރި، ނޫސްބަޔާނުގައި ބުނީ އެ އުސޫލުގެ ދަށުން އެކުލަވާލާފައިވާ ނުވަ އެއްބަސްވުމަށް އަމަލު ކުރަން ނުޖެހޭނެ ކަމަށް ކަމާބެހޭ އިދާރާތަކަށް އަންގާފައިވާ ކަމަށެވެ.
އެނޫސްބަޔާނުގައި އެއްބަސްވުންތަކަކީ، އުފެދުމުގައި ވެސް ބާތިލު އެއްބަސްވުންތަކެއް ކަމަށް ފެންނަކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ވެސް ފާސްކޮށްފައިވެއެވެ. އަދި، އެއްބަސްވުންތައް ބާތިލުކުރުމަށް ގާނޫނީ ގޮތުން ކުރަންޖެހޭ ކަންކަން ކުރުމަށާއި، އެއްވެސް ބަދަލެއް ދީފައިވާނަމަ، އެ ބަދަލު އަނބުރާ ހޯދުމަށާއި، އެ ކަމުގައި ހިމެނޭ މީހުންނަށް ފިޔަވަޅު އެޅުމަށް އެ އޮފީހަށާއި، ކަމާ ގުޅޭ އިދާރާތަކަށް ދެންނެވުމަށް ވެސް ކޮމިޓީން ވަނީ ފާސްކޮށްފައެވެ.
އޭޖީ އޮފީހުން ބުނީ އެ މައްސަލަ ދިރާސާ ކުރުމުން އެ އުސޫލަކީ ގާނޫނު އަސާސީއާއި، ގާނޫނުތަކާ ޚިލާފަށް އެކުލަވާލާފައިވާ އުސޫލެއްކަން ފާހަގަވި ކަމަށެވެ. އަދި، އުސޫލުގެ ދަށުން އެއްބަސްވުންތަކުގައި ސޮއިކޮށްފައިވަނީ އޮޑިޓާ ޖެނެރަލްގެ ބަހެއް ނެތި، ތައައްސުފީ ގޮތެއްގައި ވަކި ފަރާތަކަށް ނުހައްގު މުއްސަނދިކަމެއް ލިބޭ ގޮތަށް ކަމަށް ވެސް އެ އޮފީހުން ބުނެއެވެ.ބަދަލުގެ ގޮތުގައި ކުރީ ސަރުކާރުން ހެދި އެއްބަސްވުންތައް؛
- ލެޝާ ބީޗް / އިންވެސްޓްމެންޓް މޯލްޑިވްސް — ވ. ފޮއްތެޔޮފުށީގެ ލީޒް އެއްބަސްވުމަށް 30 ދުވަސް އިތުރުކޮށްދީ، ދެ ހަފުތާތެރޭ ސޮއިކުރުން
- ޔޫމެޓް ކޮންސްޓްރަކްޝަންސް — ގެއްލުމުގެ ބަދަލުގެ ގޮތުގައި 26 މިލިއަން ރުފިޔާ ދިނުން
- އެގްޒޯޓިކް ޕްރޮޕަޓީސް — ނ. ރާފުށީގެ ބަދަލުގައި ނ. އެކުޅިވަރު 99 އަހަރަށް ދިނުން، ކުރީގެ ލީޒް އެގްރިމަންޓުުގެ ފައިސާ މާފުކުރުން
- ދީބާޖާ އިންވެސްޓްމެންޓްސް — ގެއްލުމުގެ ބަދަލުގެ ގޮތުގައި 64 މިލިއަން ރުފިޔާ ދިނުން
- އަމްސަން އެންޑް ފުޑް ބެވަރޭޖް — ގެއްލުމުގެ ބަދަލުގެ ގޮތުގައި 51 މިލިއަން ރުފިޔާ ދިނުން
- ކްލިއާ ސޭންޑްސް — ތ. ވަންބަދި، ކަނި، ފުށި މި ތިން ރަށް 50 އަހަރަށް ދިނުން، ބަދަލު ފައިސާ ދިނުމުގެ ބަދަލުގައި އއ. މާފަރުފަޅު 50 އަހަރަށް ދިނުން
- ބްލޫ ލެގޫން އިންވެސްޓްމެންޓްސް — އއ. މަޑޫގަލި 50 އަހަރަށް ދިނުން، ކުރީގެ ލީޒް އެގްރިމަންޓުގެ ފައިސާ މާފުކުރުން، ބަދަލު ފައިސާ ދިނުމުގެ ބަދަލުގައި ރ. ވިލިނގިލި، ރ. ތާވަތާ، ނ. އޮރިމަސްވަރު 50 އަހަރަށް ދިނުން، ބާކީ ބަދަލު ފައިސާއަށްވާ 8.4 މިލިއަން ޑޮލަރަކީ އެ ރަށްރަށުގެ އެޑްވާންސް ކުލީގެ ގޮތުގައި ހަމަޖެއްސުން
- އަބްދުﷲ އަލީ (ތްރީއޭ) — ހދ. ހޮނޑާފުށި 50 އަހަރަށް ދިނުމަށް އެއްބަސްވުން އާކުރުން، އެ ރަށުގެ ކުއްޔާއި ޖޫރިމަނާ މާފުކުރުން
- ޖޭއެޗް ރިޒޯޓްސް — ހދ. ކުޑަމުރައިދޫ 50 އަހަރަށް ދިނުން، ކުރީގެ އެއްބަސްވުމުގެ ކުއްޔާއި ޖޫރިމަނާ މާފުކުރުން
ކުރީގެ ސަރުކާރުން އެކުލަވާލި އުސޫލަކީ ގާނޫނީ ބާރު ލިބިގެންވާ އުސޫލެއް ނޫން ކަމަށް އެ އޮފީހުން ލަފާ ދިނުމުން ރައީސް ޑރ. މުހައްމަދު މުއިއްޒު ވަނީ އެ އުސޫލުގެ ދަށުން އުފައްދާފައިވާ ސެޓްލްމެންޓް ކޮމިޓީ މިދިޔަ އަހަރުގެ ނޮވެންބަރު މަހުގެ ތެރޭ އުވާލައްވާފައެވެ. ބަންޑާރަ ނާއިބުގެ އޮފީހަށް އެ އެއްބަސްވުންތައް ދިރާސާ ކުރުމަށް ފޮނުއްވާފައިވަނީ އޭގެ ފަހުންނެވެ.
