ކުރިއަށް އޮތް ލޯކަލް ކައުންސިލްތަކުގެ އިންތިހާބު ކާމިޔާބު ކުރަން އިދިކޮޅު އެމްޑީޕީން މަސައްކަތް ކުރާއިރު އެއީ އިގުތިސާދު ފުންވަޅުގަނޑަކަށް ވައްޓާލި ޕާޓީކަމަށް އިޤްތިޞާދީ އާއި ބެހޭ މިނިސްޓަރު މުހައްމަދު ސައީދު ރޭ ވިދާޅުވެއްޖެ އެވެ.
އޭނާ އެހެން ވިދާޅުވީ، ސަރުކާރު ހިންގާ ޕާޓީ ޕީއެންސީގެ މާފަންނު އުތުރު ދާއިރާގެ ކެމްޕެެއިން ޖަގަހަ ހުޅުވަން ބޭއްވި ރަސްމިއްޔާތުގަ އެވެ.
މިނިސްޓަރު ސައީދު ވިދާޅުވީ، އޭޕްރީލް ހަތަރުވަނަ ދުވަހު ބާއްވާ ލޯކަލް އިންތިހާބު ކާމިޔާބު ކުރަން މަސަައްކަތްކުރާ އެމްޑީޕީގެ އިސް ސަފުން އަދިވެސް ފެންނަނީ އޭރު އިގުތިސާދަށް ގެއްލުން ދިން ބޭފުޅުން ކަމަށެވެ.
”ދެ އަހަރެއްހާ ދުވަސް އަދި މިވީ. އަނެއްކާވެސް މުޅިން އަލަށް ދިރިގެން މުޅިން އަލަށް ތާޒާކަން އިހުސާސް ވެގެން ހަމަ އެއް ބައެއް ނުކުމެ މި ބުނަނީ ތިމަންނަމެންގެ އެބައޮތޭ މާ މޮޅު ގޮތެއް. ހަމަ އެއްކަލަ އިބްރާހިމް މުހައްމަދު ސޯލިހު، އެއީ އޭރު ރައީސުލްޖުމްހޫރިއްޔާކަން ކުރެއްވި ބޭފުޅާ. ހަމަ އެއްކަލަ ބޭފުޅުން، ކުރީ ސަފުން އެއްވެސް ބަދަލެއް ވެސް ނާދޭ،“ އެމްޑީޕީ އަށް އިޝާރާތް ކުރައްވަމުން ސައީދު ވިދާޅުވި އެވެ.
އޭނާ ވިދާޅުވި ގޮތުގައި ސޮވަރިން ޑިވެލޮޕްމަންޓު ފަންޑުގައި ހުރި 200 މިލިއަން ޑޮލަރު ދެ މިލިއަން ޑޮލަރަށް ދަށްކުރީ އެންމެ ފަހުން ވެރިކަން ކުރި އެމްޑީޕީގެ ސަރުކާރުންނެވެ. އަދި ވިދާޅުވީ، ރައީސް ޑރ. މުހައްމަދު މުއިއްޒު ނޮވެމްބަރު 17، 2023 ގައި ވެރިކަމާ ހަވާލުވެވަޑައިގަތީ 15 ދުވަހުގެ ކާބޯތަކެތި ނުވަތަ ކާޑުގެ ބާވަތްތައް ގަންނާނެ ފައިސާ ވެސް ރާއްޖޭގެ ރިޒާވުން ހުސްވިތަނާ ކަމަށެވެ. އެކަމަކު، ސައީދު ވިދާޅުވި ގޮތުގައި، ރިޒާވްގައި މިހާރު 1.1 ބިލިއަން ޑޮލަރު އެބަހުއްޓެވެ.
އެމްޑީޕީގެ ސަރުކާރުގެ ގެދޮވެރިވެރިކަމުގެ ސިޔާސަތާ މެދު ސައީދު ވިދާޅުވީ، އެއީ ކަނޑު އަޑިން ދީފައިވާ ”ހިޔާލީ ގޯތިތަަކެއް“ ކަމަށެވެ. ރިޔާސީ އިންތިހާބު ކައިރިވުމުން އެތައް މިތަނުން ގޯތިދޭނެ ކަމަށް އެ ސަރުކާރުގައި ބުނިއިރު އެއީ ”ވިހި، ތިރީސް ފުންމިނުގައި“ ހުރި ގޯތިތަކެއް ކަމަށް އޭނާ ވިދާޅުވި އެވެ.
”މިއަދު ބައްލަވާ ރައީސުލްޖުމްހޫރިއްޔާ [މުއިއްޒު] ކުޑަ ދުވަސްކޮޅެއްގެ ތެރޭގައި އެ ހިޔާލީ ގޯތިތައް ވެސް ހަމަ ބިމަށް ގެނެސް ރައްޔިތުންނަށް ގޯތި ދޫކުރަނީ. މިއީ ޕީއެންސީ އަށް ވޯޓު ދޭންޖެހޭ ސަބަބަކީ،“ ސައީދު ވިދާޅުވި އެވެ.
މިހަފްލާ ޝަރަފުވެރި ކޮށްދެއްވީ ފަސްޓް ލޭޑީ ސާޖިދާ މުހައްމަދު އެވެ.
