ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ މެނޭޖިން ޑިރެކްޓަރުގެ މަގާމުން އިއްޔެ ވަކިކުރި އަހްމަދު ޝަމާހު ރަޝީދު ވަކިކުރި ސަބަބާއި، އޭނާގެ މައްޗަށް ތުހުމަތު ކުރެވޭ ކޮރަޕްޝަންގެ މައްސަލަތަކުގެ ހަގީގަތް ރައްޔިތުންނަށް ސާފުކޮށްދިނުމަށް އިދިކޮޅު އެމްޑީޕީން ސަރުކާރަށް ގޮވާލައިފިއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ވަގުތީ ޗެއާޕާސަން އަދި ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވީ، ޝަމާހު މަގާމުން ވަކިކުރުމާ ގުޅިގެން ސޯޝަލް މީޑިއާގައި ދައުރުވަމުންދާ އޯޑިއޯތަކާއި ކޮރަޕްޝަންގެ ތުހުމަތުތަކަށް ސަރުކާރުން ޖަވާބުދާރީވާން ޖެހޭނެ ކަމަށެވެ.
”ސްޓެލްކޯގެ ކޮރަޕްޝަން ހުރި މިންވަރާއި، ޝަމާހު ވަކިކުރި އަސްލު ސަބަބު ރައްޔިތުންނަށް އެނގެންޖެހޭ. ސަރުކާރު ހިއްސާވާ ކުންފުނިތަކުން ވައްކަންކުރާ މައްސަލަތަކުގައި މީހުން ވަކިކުރުމުން އެކަނި ނިމުނީއެއް ނޫން، އެކަމުގެ ސާފު މައުލޫމާތު ރައްޔިތުންނަށް ފޯރުކޮށްދޭން ޖެހޭނެ،“ ޣަފޫރު ވިދާޅުވިއެވެ.
ޝަމާހު ސްޓެލްކޯގެ އެމްޑީގެ މަގާމަށް އައްޔަނުކުރީ މިދިޔަ ސެޕްޓެމްބަރު މަހުގައެވެ. އޭނާ މަގާމުން ވަކިކުރި ފަހުން، ޝަމާހު ވާހަކަދައްކަވާ ކަމަށް ބުނާ އޯޑިއޯއެއް އާންމުވެފައިވާއިރު، އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ އޭނާގެ މައްސަލައެއް ބަލަމުންދާކަން މިއަދު ކަށަވަރުކޮށްދީފައެވެ.
މިކަމާ ގުޅޭގޮތުން ޣަފޫރު ވިދާޅުވީ، ލީކުވެފައިވާ އޯޑިއޯގެ ސައްހަކަން ކަށަވަރުކޮށް، އެއީ ތެދުތޯ ނުވަތަ ދޮގުތޯ ސަރުކާރުން ހާމަކުރަން ޖެހޭ ކަމަށެވެ.
ޝަމާހަކީ މި ސަރުކާރު އައިފަހުން އެކި މަގާމުތަކަށް ބަދަލުކުރަމުން އައިސްފައިވާ ބޭފުޅެކެވެ. އެގޮތުން އެންމެ ފުރަތަމަ އޭނާ ހުންނެވީ މިފްކޯގެ މެނޭޖިން ޑިރެކްޓަރުގެ މަގާމުގައެވެ. ނަމަވެސް އެ ކުންފުނި ހިންގުމުގައި ގޯސްތަކެއް ހެދިކަމުގެ ތުހުމަތުގައި ދެ ފަހަރެއްގެ މަތިން ސަސްޕެންޑު ކުރުމަށްފަހު، މިއަހަރުގެ މެއި 21 ގައި އޭނާ އެ މަގާމުން ވަކިކުރިއެވެ. އޭގެ ފަހުން ފިޝަރީޒް މިނިސްޓްރީގެ ސްޓޭޓް މިނިސްޓަރުކަން ވެސް އޭނާ ކުރެއްވިއެވެ.
އެމްޑީޕީން ތުހުމަތުކުރާ ގޮތުގައި، ސަރުކާރު ހިއްސާވާ ކުންފުނިތަކުގައި ކޮރަޕްޝަންގެ އަމަލުތައް އިތުރުވަމުންދާއިރު، އެފަދަ ކަންކަން ފޮރުވުމުގެ ބަދަލުގައި ދެފުށް ފެންނަ ގޮތަކަށް މައުލޫމާތު ހާމަކުރުމަކީ ރައީސް ޑރ. މުހައްމަދު މުއިއްޒުގެ ސަރުކާރުން ކުރަންޖެހޭނެ ކަމެކެވެ.
