ތަޢުލީމެއް، ގާބިލުކަމެއް ނެތް މީޙުން ސިފައިންގެއަށާއި ފުލުހުންގެ ތެރެއަށް ވައްދަނީ އެތަނުގައި ފޮޅާސާފުކުރުމުގެ މަސައްކަތް ކުރަންތޯ ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ސުވާލުއުފައްދަވައިފިއެވެ.
ޕީއެންއެފް އިން ހޯމަ ދުވަހުގެ ރޭ ބޭއްވި ފްރޮންޓް އޮފީހުގެ ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ މިއަދު ސިފައިންގެ އާއި ޕޮލިހަށް ބޭނުން ވަނީ ނަތީޖާ ދަށް، ފޮޅާސާފުކުރާނެ ފަރާތްތަކެއް ނޫން ކަމަށާއި އެއީ ރާއްޖޭގެ އެންމެ ވަރުގަދަ ދެ މުއައްސަސާ ކަމަށްވާއިރު އެ ތަންތަނަށް ވަންނާނެ މީހުން މިހާރު ވާނެ ކަމަށެވެ.އ
އަދި ސިފައިންނާއި ފުލުހުންގެ ޚިދުމަތަށް ވައްދަން ވާނީ ތަޢުލީމީ ގާބިލް ޒުވާނުންކަމަށް ވެސް ޔާމީން ވިދާޅުވިއެވެ.
”ސިފައިންނާއި ފުލުހުންގެ ތެރޭގައި އެންމެ އެކަށީގެން ނުވާ މީހުންތަކެއް ނަގައިގެން ކީއްކުރަންހޭ މި އުޅެނީ. އެތަނުގައި ފޮޅާ ސާފުކުރަންހޭ މި އުޅެނީ. އެމީހުންގެ އިލްމީ ގާބިލުކަމެއް އޮންނަން ވާނެ، ހަމައެކަނި ފިޒިކަލް ތަމްރީނެއް ނޫނޭ،“ ޔާމީން ވިދާޅުވި އެވެ.
ޔާމީން ވިދާޅުވީ ފުލުހުންނާއި ސިފައިންނަކީ އަބަދު ނިކުމެ މަގުމަތީގައި އެނބުރެންޖެހޭ ބައެއް ނޫން ކަމަށާއި އެމީހުންނަކީ އެއަށް ވުރެ މާ ސްޓްރެޓިޖިކް މަސައްކަތްތަކެއް ކުރާ ޕްރޮފެޝަނަލް ބައެއްކަމަށެވެ. އަދި ކަންމިހެން އޮތްއިރު، އެ ތަންތަނަށް ނަގަން ވާނީ އެ ކަންކަން ކުރެވޭނެ ވަރުގެ ގާބިލުކަން ހުރި ފަރާތްތަކެއް ކަމަށްވެސް ޔާމީން ވިދާޅުވި އެވެ.
”އެމީހުންނަށް ކުރިއަށް ދެވޭނެ ކަމުގެ ރިސޯސް ހުރިކަން، އެ ކުދިންގެ ކިޔެވުމުން މިހާތަނަށް ދައްކާފައި ތިބި ކުދިން ނަގަން ޖެހޭނީ،“ ޔާމީން ވިދާޅުވި އެވެ.
މީގެއިތުރުން ޔާމީން ވަނީ ރައީސް މުއިއްޒު ވިދާޅުވާ އަދަދަށް ސިފައިންގެ އާއި ޕޮލިހަށް މީހުން ބޭނުންވާކަން އެ މުއައްސަސާތަކުން މިހާތަނަށް ބުނެފައި ނުވާ ކަމަށާއި އަދި ބަޖެޓަށް ފައިސާ އިތުރުވެގެންދާއިރު މިކަން ދެކޮޅު ޖައްސާނެ ގޮތެއް ވެސް ނެތް ކަމަށް ވިދާޅުވެފަ އެވެ.
ޔާމީން މިފަދައިން ވިދާޅުވެފައިވާއިރު، ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވަނީ ޒުވާނުން ސިފައިންގެ އާއި ފުލުހަށް ވެއްދުމަށް ރާއްޖޭގެ ގައުމީ ހިދުމަތުގެ ޕްރޮގްރާމްގެ ނަމުގައި އަންނަ އަހަރުން ފެށިގެން ގައުމީ ޕްރޮގްރާމެއް ފެށުމަށް ނިންމާފައިވާކަން އިއުލާން ކުރައްވާފަ އެވެ.
މި ޕްރޮގްރާމްގައި އުމުރުން 16 އަހަރުވުމަށް ފަހު ތައުލީމު ހާސިލުކުރަން މައްޗަށް ދިޔުމަށް ފުރުސަތު ނުލިބޭ ކުދިންނާއި އަދި ވަޒީފާއެއް ވެސް ނުލިބޭ ކުދިން ބައިވެރިވާންޖެހޭނެ ކަމަށް ރައީސް ވިދާޅުވި އެވެ.
މި ޕްރޮގްރާމްގެ ނަތީޖާއެއްގެ ގޮތުން ސިފައިންގެއަށް 4،000 އޮފިސަރުން އަދި ފުލުހުންގެ ހިދުމަތަށް 1،000 އޮފިސަރުން އިތުރުވެގެންދާނެ ކަމަށް ރައީސް ވިދާޅުވި އެވެ.
