އަންނަ ރޯދަމަހުގެ ކަރަންޓު ބިލު 400 ރުފިޔާއަށްވުރެ ބޮޑު ނުވާނެ ކަމަށާއި، އެކަމަށް ސަރުކާރުން ހަރަދުވާނެ މިންވަރު ވަރަށް އަވަހަށް ހާމަކުރައްވާނެ ކަމަށް ތިމާވެއްޓާ ބެހޭ ވަޒީރު ތާރިޤް އިބްރާހިމް ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގަ އެވެ.
މިނިސްޓަރު ތާރިޤް ވިދާޅުވީ ރޯދަމަހުގެ އެއްވަނަ ދުވަހުން ފެށިގެން ފަހު ދުވަހާ ހަމައަށް އަރާ ކަރަންޓު ބިލު 400 ރުފިޔާއަށްވުރެ ބޮޑު ނުވާނެ ކަމަށެވެ. ނަމަވެސް ރޯދަމަހުގެ ކުރީގެ މަސްތަކާއި ފަހުގެ މަސްތަކުގައި ބިލު ކުރަމުންދާނީ މިހާރުވެސް އަމަލުކުރަމުންދާ އުސޫލުގެ ތެރެއިން ކަމަށް އޭނާ ފާހަގަކުރެއްވި އެވެ.
”މާ ލަސްތަކެއް ނުވެ ސީދާ އެ އަދަދު އަޅުގަނޑުމެން ހާމަ ކުރާނަން. އަޅުގަނޑުމެން މިދަނީ ފިނޭންސް މިނިސްޓްރީ އާއެކު މަސައްކަތް ކުރަމުން މި ހުރިހާ އެއްޗެއް ތައްޔާރު ވުމުގެ ގޮތުން އިކޯސް ހެދުމުގެ މަސައްކަތް ކުރަމުން އަންނަނީ“
ވޭތުވެދިޔަ ދެ އަހަރުގެ ރޯދަ މަހު ކަރަންޓު ބިލަށް ޑިސްކައުންޓްގެ ގޮތުގައި ޖުމްލަ 230 މިލިއަން ރުފިޔާ ދެވިފައިވާ ކަމަށް މިނިސްޓަރު ވިދާޅުވި އެވެ.
ވޭތުވެދިޔަ ދެ އަހަރުގެ ރޯދަ މަހު ކަރަންޓު ބިލުން ޑިސްކައުންޓް ދިން ގޮތާ މެދު އާންމުންގެ ފާޑުކިޔުންތައް ސަރުކާރަށް އަމާޒުވެފައިވާއިރު، މިފަހަރުގެ ނިންމުމާއެކު ރައްޔިތުންނަށް ބޮޑު ލުޔެއް ލިބިގެންދާނެ ކަމަށް ބެލެވެ އެވެ.
