އަންނަ އަހަރު އޮންނަ ލޯކަލް ކައުންސިލް އިންތިހާބުގެ ޕީއެންސީ ޕްރައިމަރީގައި ވާދަކުރުމުގެ ފުރުސަތު ބައެއް މީހުންނަށް ނުދީ ބާކީ ކޮށްލި ކަމަށް ބުނާ ޝަކުވާތަކެއް ފެންމަތިވެއްޖެ އެވެ.
ވެރިކަން ކުރާ މައި ޕާޓީ ޕީއެންސީން އަންނަ އަހަރުގެ ލޯކަލް ކައުންސިލް އަށް ކެނޑިޑޭޓުން ހޮވަން ބާއްވާ ޕްރައިމަރީ އޮތީ މި މަހުގެ 27 ވާ ހޮނިހިރު ދުވަހުގަ އެވެ.
ޕީއެންސީ ޕްރައިމަރީގައި ވާދަކުރުމަށް ނަން ހުށަހެޅުމަށް ޕޯޓަލްއެއް މެދުވެރިކޮށް ފުރުސަތު ހުޅުވާލިއިރު، ޕޯޓަލް މެދުވެރިކޮށް ޕްރައިމަރީގައި ވާދަކުރަން ނަން ހުށަހެޅި ބައެއް ކެންޑިޑޭޓުންގެ އެޕްލިކޭޝަންތައް އެ ޕާޓީން ވަނީ އެއްވެސް ސަބަބަކާ ނުލައި ރިޖެކްޓު ކުރި މައްސަލައެއް ވަނީ ފެންމަތިވެފަ އެވެ.
ޕޯޓަލް މެދުވެރިކޮށް ހުށަހެޅި ހުށަހެޅުންތައް ބަލައި ނުގަނެ ރިޖެކްޓްކޮށްލާފައިވާއިރު، އެނގިފައިވާ ގޮތުން ރިޖެކްޓް ކޮށްލާފައި ވަނީ ރ. ފައިނު އާއި ގއ. ވިލިނގިލި ޕްރައިމަރީގައި ވާދަކުރަން ނަން ހުށަހެޅި ކެންޑިޑޭޓުންގެ ފޯމުތަކެވެ.
ރިޖެކްޓް ކުރި ފޯމުތަކުގެ ތެރޭގައި ރ. ފައިނު ކައުންސިލްގެ ރައީސް އަހުމަދު ރިޝްފާންގެ ފޯމު ވެސް ވަނީ ރިޖެކްޓް ކޮށްފަ އެވެ.
ރިޝްފާން ވިދާޅުވީ ޕޯޓަލް އަށް ފޯމު ހުށަހެޅުމުން ޖަވާބުގައި ބުނެފައި ވަނީ މިހާރު ޕޯޓަލްއިން އެޕްލިކޭޝަން ފެންނަން އިންނާނެ ކަމަށެވެ. އެހެން ނަމަވެސް ސްޓޭޓަސް ބަލައިލިއިރު ސްޓޭޓަސްގައި އިންނަނީ ހަމަ ރިޖެކްޓެޑު ޖަހާފާއި ކަމަށެވެ. އަދި އެކަން ބަލަން ކުރި މަސައްކަތުން އަދި އެއްވެސް ޖަވާބެއް ނުލިބޭ ކަމަށް ވެސް އޭނާ ވިދާޅުވި އެވެ.
ރިޝްފާން ވިދާޅުވީ އޭނާގެ ނަން ރިޖެކްޓު ކުރީ ސީދާ ކޮން ސަބަބަކާހުރެ ކަމެއް ނޭނގޭ ކަމަށާއި އެހެންމަވަވެސް ބޮޑަށް ބެލެވެނީ އެގޮތަށް ނިންމީ އެ ރަށު ޕީއެންސީގެ ސްޓިއަރިން ކޮމިޓީން އޭނާއާމެދު ހިތްހަމަނުޖެހޭތީ ކަމަށް ބެލެވޭކަމަށެވެ.
މީގެ އިތުރުން ޕްރައިމަރީގައި ވާދަކުރަން ނަން ހުށަހެޅި އެ ރަށު ތިން މީހެއްގެ އެޕްލިކޭޝަން ޕީއެންސީން ރިޖެކްޓު ކުރި އެވެ. އެއީ ވިލިނިގިލި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސްކަމުގެ ޕްރައިމަރީގައި ވާދަކުރަން ނަން ހުށަހެޅި ފާތިމަތު ޒިފްނާ މައުމޫން އާއި އަންހެނުންގެ ކޮމިޓީގެ މެންބަރުކަމަށް ކުރިމަތިލި އާމިނަތު މަހާމް އާއި ކައުންސިލް މެންބަރުކަމަށް ކުރިމަތިލި ހަސަން ނަސީމް އެވެ.
އޭނާ ބުނީ ޕާޓީގެ ޕްރައިމަރީގައި ވާދަކުރުމުގެ ފުރުސަތު ނުދިން ނަމަވެސް، އެ ހަތަރު މީހުން ވެސް އަމިއްލަ ގޮތުން ކުރިއަށް ލޯކަލް ކައުންސިލް އިންތިހާބުގައި ވާދަކުރާނެ ކަމަށެވެ.
ޕީއެންސީ އުފެދުނު ފަހުން މިހާތަނަށް ބޭއްވި ގިނަ އިންތިޚާބުތަކުގައި މިފަދަ މައްސަލަތައް ވަނީ ފެންމަތިވެފަ އެވެ. އަދި ވެސް އަންނަނީ މިފަދަ މައްސަލަތައް ފެންމަތި ވަމުންނެވެ.
