ސިފައިންނާއި ފުލުހުން ތަމްރީނު ކުރަން ގައުމީ ޕްރޮގްރާމެއް އަންނަ އަހަރު ފެށުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ރާއްޖޭގެ ގައުމީ ހިދުމަތުގެ ޕްރޮގްރާމްގެ ނަމުގައި އަންނަ އަހަރުން ފެށިގެން ގައުމީ ޕްރޮގްރާމެއް ފެށިގެންދާނެ ކަމަށާއި މި ޕްރޮގްރާމް ވެގެންދާނީ ގާނޫނީ ބާރު ލިބިގެން ހިންގޭ ޕްރޮގްރާމަކަށް ކަމަށެވެ.
މި ޕްރޮގްރާމްގައި އުމުރުން 16 އަހަރުވުމަށް ފަހު ތައުލީމު ހާސިލުކުރަން މައްޗަށް ދިޔުމަށް ފުރުސަތު ނުލިބޭ ކުދިންނާއި އަދި ވަޒީފާއެއް ވެސް ނުލިބޭ ކުދިން ބައިވެރިވާންޖެހޭނެ ކަމަށާއި އެ ޕްރޮގްރާމްގައި ބައިވެރިވުމަށްފަހު މިލިޓަރީ ތަމްރީނު ހޯދަންޖެހޭނެ ކަމަށް ރައީސް ވިދާޅުވި އެވެ. އަދި އެ ޕްރޮގްރާމް ނިމުމުން ސިފައިންގެ ނުވަތަ ފުލުހުންގެ އޮފިސަރަކަށް ވާނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ މި ޕްރޮގްރާމްގެ ނަތީޖާއެއްގެ ގޮތުން ސިފައިންގެއަށް 4،000 އޮފިސަރުން އަދި ފުލުހުންގެ ހިދުމަތަށް 1،000 އޮފިސަރުން އިތުރުވެގެންދާނެ ކަމަށެވެ. މި ޕްރޮގްރާމް ހިންގުމަށް 400 މިލިއަން ރުފިޔާ ބަޖެޓުން ހަރަދުކުރާނެ ކަމަށާއި އަދި ކޮންމެ އަހަރަކު އިތުރު 400 މިލިއަން އެ ޕްރޮގްރާމް އިތުރު ކުރެވޭނެ ކަމަށްވެސް ވިދާޅުވި އެވެ.
ވަޒީފާ ހޯދުމުގެ ފުރުސަތު ނުލިބި އަދި ތައުލީމު އެކަށީގެންވާ މިންވަރަށް ހޯދުމުގެ ފުރުސަތު ލިބިފައި ނެތް އެތައް ޒުވާނުންނެއް ތިބިކަން ފާހަގަކުރައްވަމުން ރައީސް ވަނީ މި ޕްރޮގްރާމްގެ ދަށުން އެފަދަ ޒުވާނުންނަށް ފުރުސަތުތައް ހޯދައިދެވިއްޖެނަމަ، ވަޒީފާގެ ފުރުސަތު ޒުވާނުންނަށް ދެވި އަދި ސިފައިންގެ މަސައްކަތަށް ވެސް ގިނަ ބަޔަކު ލިބިގެންދާނެ ކަމަށް ވިދާޅުވެފަ އެވެ.
