މިލަދުންމަޑުލު ދެކުނުބުރީ ހޮޅުދޫގައި އެކްސްރޭގެ ޚިދުމަތް ފަށައިފިއެވެ.
މި ޚިދުމަތް ރަސްމީކޮށް އިފްތިތާހުކޮށްދެއްވީ، ސިއްޙީ ވަޒީރު އަބްދުﷲ ނާޠިމް އިބްރާހީމް ނ. އަތޮޅުގެ މީހުން ދިރިއުޅޭ ރައްތަަކަށް ކުރައްވާ ރަސްމީ ދަތުރުފުޅުގެ ތެރެއިން އެއަތޮޅު ހޮޅުދޫއަށް ކުރެއްވި ޒިޔާރަތުގައެވެ.
ނ. ހޮޅުދޫގެ ސިއްޙީ މަރުކަޒުގައި އެކްސްރޭގެ ޚިދުމަތް ރަސްމީކޮށް ފެށުމަށް އެރަށުގައި ވަނީ ހާއްސަ ރަސްމިއްޔާތެއް ބާއްވާފައެވެ.
މި ރަސްމިއްޔާތުގައި ހޮޅުދޫ ކައުންސިލްގެ ރައީސްއާއި، ކައުންސިލް އިދާރާގެ މެމްބަރުންނާއި، އެރަށު ސިއްޙީ މަރުކަޒުގައި މަސައްކަތް ކުރާ ފަރާތްތަކުގެ އިތުރުން ސިއްޙީ ވުޒާރާގެ އިސް އޮފިޝަލުންވެސް ބައިވެރިވެ ވަޑައިގެންނެވިއެވެ.
ނ. ހޮޅުދޫ ސިއްޙީ މަރުކަޒުގައި އެކްސްރޭގެ ޚިދުމަތް ދޭން ފެށުމަކީ، އެރަށުގެ ޞިއްޙީ ދާއިރާއަށް ލިބުނު ބޮޑު ކުރިއެރުމެއް ކަމަށް ސިއްޙީ ވުޒާރާއިން ވިދާޅުވެއެވެ. އެގޮތުން މި ޚިދުމަތް ފެށުމާއެކު، މީގެ ކުރިން ބޭސްފަރުވާއަށް މާލެއަށް ނުވަތަ އެހެން ބޮޑެތި ރަށްރަށަށް ދަތުރުކުރަން ޖެހުމުގެ ބުރަ ރައްޔިތުންގެ ކިބައިން ކުޑަވެގެން ދިއުމުގެ އިތުރުން ރަށުގައި ތިބެ ފަސޭހަކަމާއެކު އެކްސްރޭ ނެގުމުގެ ފުރުސަތު މިވަނީ ފަހިވެގެން ގޮސްފައެވެ. 2000 ވުރެ މަތީގެ އާބާދީއެއް އޮންނަ ހޮޅުދޫގައި އެކްސްރޭ ޚިދުމަތް ލިބިގެން ދިއުމަކީ އެރަށުގެ ރައްޔިތުންނަށާއި އެރަށާއި ކައިރި އެހެން ރަށްރަށުގެ ރައްޔިތުންނަށް ލިބިގެން ދިޔަ ވަރަށް ބޮޑު ފަސޭހައެއް ކަމަށް ހޮޅުދޫ ރައްޔިތުން ދެކެއެވެ. ”އެން ނިއުސް“ މައުލޫމާތު ދެއްވަމުން ހޮޅުދޫ ރައްޔިތަކު ބުނީ މީގެ ކުރީގައި އެކްސްރޭ ޚިދުމަތް ހޯދަން ވެއްޖެނަމަ ދާން ޖެހެނީ މަނަދޫ އަށް ނުވަތަ އުނގޫފާރަށް ކަމަށެވެ. ލޯންޗެއްގައި އެރަށްރަށްރަށަށް ދާނަމަ ލޯންޗުގެ ކުލި ގާތްގަޑަކަށް 2000ރުފިޔާ އަތުން ޚަރަދު ކުރަން ޖެހެއެވެ.
