ރާއްޖެ އަށް މި އަހަރު ރާއްޖެއަށް ޒިޔާރަތްކުރި ދެ މިލިޔަން ވަނަ ޓޫރިސްޓަށް މިއަދު ހޫނު މަރުޙަބާއެއް ކިޔައިފި އެވެ.
ދެ މިލިއަން ވަނަ ޓޫރިސްޓަކީ އިނގިރޭސިވިލާތުގެ ރައްޔިތެއް ކަމަށްވާ ބެތަނީ ސޭރާ އެވެ. އޭނާ ރާއްޖެ އައީ ފިރިމީހާއާ އެކު ހަނީމޫނަށެވެ. އަދި މިއީ ބެތަނީ ރާއްޖެ އައި ފުރަތަމަ ފަހަރު ވެސް މެ އެވެ.
ދެ މިލިއަން ވަނަ ޓޫރިސްޓަށް މަރުހަބާ ކިޔަން ވީއައިއޭފައި ބޭއްވި ހަފުލާގައި ޓޫެރިޒަމް މިނިސްޓަރު ތޯރިގް އިބްރާހީމް ވިދާޅުވީ، އަހަރުގެ މިހާތަނަށް ދެ މިލިއަން ޓޫރިސް އައުމަކީ ދާއިރާގައި މަސައްކަތްކުރާ ހުރިހާ ފަރާތެއްގެ ބުރަ މަސައްކަތާއެކު ހާސިލުކުރެވުނު ކާމިޔާބީއެއް ކަމަށެވެ.
ރާއްޖެއަށް ފުރަތަމަ ފަހަރަށް ދެ މިލިއަން ޓޫރިސްޓުން އައީ މިދިޔަ އަހަރު އެވެ. އެ އަދަދޔު ހަމަވީ ޑިސެމްބަރ 26 ގަ ދުވަހުއެވެ. މި އަހަރު ދެ މިލިއަން ފަތުރުވެރިން ހަމަވީ މިދިޔަ އަހަރާ އަޅާބަލާއިރު މަސް ދުވަސް ކުރިންނެވެ.
ރާއްޖޭގެ މި އަހަރުގެ ޓާގެޓަކީ 2.3 މިލިއަން ޓޫރިސްޓުން ގެނައުމެވެ. މިހާރު ދުވާލެއްގެ މައްޗަށް އެވްރެޖްކޮށް 6000 އަށް ވުރެ ގިނަ ޓޫރިސްޓުން އާދެ އެވެ.
