ކެންގަރޫ ކިޑްސް އިންޓަރނޭޝަނަލް ޕްރީ ސްކޫލު މުވައްޒަފުންނަށް ”އަރުތަ“ ޕްރޮގްރާމް ކުރިއަށް ގެންގޮސްފިއެވެ. އަރުތަ ޕްރޮގްރާމަކީ ކުށްމަދު އަމާން ރައްކާތެރި މުޖުތަމައެއް ބިނާކުރުމަށްޓަކައި ފަރުދީ ޒިންމާ އަދާކުރުމާއި މުވައްޒަފުންގެ ބައިވެރިވުން އިތުރުކުރުމަށް ދިވެހި ފުލުހުންގެ ޚިދުމަތުން ކުރިއަށް ގެންދާ ޕްރޮގްރާމެކެވެ.
ކްރައިމް ޕްރިވެންޝަން ޑިޕާޓްމަންޓާއި ކެންގަރޫ ކިޑްސް އިންޓަރނޭޝަނަލް ޕްރީ ސްކޫލު ގުޅިގެން މި ޕްރޮގްރާމް ކުރިއަށް ގެންގޮސްފައިވަނީ މި ނޮވެމްބަރު މަހުގެ 18 އަދި 20 ވަނަ ދުވަހު ކުޑަގިރީގައެވެ.
މި ޕްރޮގްރާމުގައި، އެ ސްކޫލު މުވައްޒަފުން ހޭލުންތެރިކޮށް މައުލޫމާތު ދިނުމުގެ ސެޝަންތަކާއި މުވައްޒަފުންގެ މެދުގައި ގުޅުން ބަދަހިވާނޭ ފަދަ ޓީމް ބިލްޑިންގ ތަފާތު ހަރަކާތްތައް ކުރިއަށް ގެންގޮސްފައިވެއެވެ. އެގޮތުން، އިންޓަނެޓް މެދުވެރިކޮށް ހިންގާ ކުށްތަކުން ރައްކާތެރިވެތިބުމަށާއި އިންޓަނެޓް ބޭނުންކުރުމުގައި ސަމާލުކަންދޭންވީ ކަންކަމާ ގުޅޭގޮތުން “ސައިބަރ ސޭފްޓީ” މައުލޫގެ ދަށުން މައުލޫމާތު ދީފައި ވާކަމަށް ދިވެހި ފުލުހުންގެ ޚިދުމަތުން ވިދާޅުވެއެވެ.
އަދި އޮފީސް މާހައުލުގައި ދިމާވާ މައްސަލަތައް ހައްލުކުރުން، ކޮމިއުނިކޭޝަން، ލީޑަރޝިޕް އަދި ޓީމް ވޯކް، މައުލޫގެ ދަށުން މައުލޫމާތު ހިއްސާކޮށްފައިވެއެވެ. އެގޮތުން، ގުޅިގެން މަސައްކަތްކުރުމުގެ މުހިންމުކަމާއި އެއްބައިވަންތަކަމާއި އެކުވެރިކަމާއެކުގައި މަސައްކަތްކުރުމުގެ ފައިދާތަކާ ގުޅޭގޮތުން މައުލޫމާތު ހިއްސާކޮށްފައިވެއެވެ. އަދި ދިރިއުޅުމުގައި ދިމާވާ ކަންކަމާ ކުރިމަތިލާނެ ގޮތްތަކާއި ސުލްހަވެރިކަމާއި ވިސްނުންތެރިކަމާއެކު މައްސަލަ ހައްލުކުރާނެ ގޮތްތަކާ ގުޅޭގޮތުން ވެސް މައުލޫމާތު ހިއްސާކޮށްފައިވެއެވެ.
މި ޕްރޮގްރާމްގައި އެ ސްކޫލުގެ 71 މުވައްޒަފުން ބައިވެރި ވެފައި ވެއެވެ.
