ދަރިފުޅަށް ތުހުމަތުކުރި މައްސަލައެއްގައި ހެކި ނައްތާލަން އުޅުމާއި މަގާމުގެ ނާޖާއިޒު ބޭނުން ހިފި ކަމުގެ ސީރިއަސް ތުހުމަތުތަކެއް ޑެޕިއުޓީ ކޮމިޝަނަ އޮފް ޕޮލިސް ފަރުހާދު ފިކުރީއަށް ކޮށްފައިވާ ސިޓީއެއް މަޖިލީހުގެ ސަލާމަތީ ހިދުމަތްތަކުގެ ކޮމިޓީއަށް ފޮނުވައިފި އެވެ.
ސަލާމަތީ ހިދުމަތްތަކަށް ރައްޔިތުންގެ މަޖިލީހުގައި އޮންނަ 241 ކޮމިޓީގެ މުގައްރިރު އަދި އޭދަފުށި ދާއިރާގެ މަޖިލިސް މެންބަރު އަހުމަދު ސަލީމް (ރެޑްވޭވް ސަލީމް)އަށް އެޑްރެސްކޮށް ފޮނުވި ސިޓީ ސޯޝަލް މީޑިއާގައި ދަނީ ދައުރުވަމުންނެވެ.
ރޭގެ ވަގުތެއްގައި މަޖިލީހުގެ މެއިލްއަށް އެ ސިޓީ ފޮނުވާފައިވާކަން ’ދައުރު’އަށް ވަނީ ކަށަވަރުވެފަ އެވެ.
ފަރުހާދުގެ ދަރިފުޅަކު ހިމެނޭ ދެ މައްސަލައެއްގައި މަގާމުގެ ބޭނުންކޮށްގެން ދަރިފުޅު ސަލާމަތްކުރަން ނަހަމަ ކަންކަން ކުރެއްވި ކަމަށް ސިޓީގައި ތުހުމަތުކުރެ އެވެ.
ސިޓީގައި ބުނާ ދެ މައްސަލައަކީ ފަރުހާދުގެ ފިރިހެން ދަރިއަކު މަސްތުގެ ހާލަތުގައި ހުރެ ބާރު ސްޕީޑްގައި ނުރައްކާތެރިކޮށް ސައިކަލު ދުއްވައި ހުޅުމާލޭގެ އެކި ސަރަހައްދުތަކުން މަޑުކުރަން އެންގުމުން ވެސް މަޑުނުކޮށް ދިއުމާއި ފުލުހަކަށް ހަމަލާ ދީފައިވާ މައްސަލައަކާއި ފަރުހާދު ފިކުރީގެ ފިރިހެން ދަރިފުޅުގެ މައްޗަށް ތުހުމަތުކުރި ރޭޕް އާއި ޖިންސީ ގޯނާގެ ސީރިއަސް މައްސަލައެކެވެ.
އެ ސިޓީގައި ބުނާ ގޮތުން މަސްތުގެ ހާލަތުގައި ހިފެހެއްޓި ދަރިފުޅު އަތުގައި ލައިސެންސެއް ވެސް ނެތެވެ. އަދި ސައިކަލުގެ ބޯޑުގައި ހަރުކޮށްފައިވާ ޑޮމެއިން ނަންބަރަކީ އެހެން ސައިކަލަކަށް ރަޖިސްޓްރީކޮށްފައިވާ ނަންބަރެކެވެ.
ލައިސެންސް ނެތި ދުއްވުމާއި ސައްހަ ނޫން ޑޮމެއިން ނަންބަރު އަޅުވައިގެން ދުއްވާ އުޅަނދު ފަހަރު ޓޯކޮށް 10،000ރ. އިން ޖޫރިމަނާކުރަން ޖެހޭނެ ކަމަށް ގާނޫނުގައި އޮތް ނަމަވެސް އެއިން ފިޔަވަޅެއް އަޅާފައިނުވާ ކަމަށް ސިޓީގައި ތުހުމަތުކުރި އެވެ.
ސިޓީގައި ތުހުމަތުކޮށްފައިވާ ގޮތުގައި ފަރުހާދު ވަނީ ހުޅުމާލެ ޕޮލިސްގެ ޓްރެފިކް ޕޮލިސްގެ ހެޑް ޗީފް އިންސްޕެކްޓަރުގެ ވަޓްސްއެޕް ނަންބަރަށް މެސެޖުކޮށް އޭނާގެ ދަރިފުޅުގެ ސައިކަލު ނެރެވޭނެ ގޮތެއް ހަދައިދިނުމަށް އެދިފައެވެ. އަދި އޭގެ ފަހުން ޗީފް އިންސްޕެކްޓަރުގެ ނަންބަރަށް ގުޅައި ތިމަންނައާ މެދު ކަންތައް ކުރަނީ އާންމު މީހަކާ މެދު ކަންތައް ކުރާ ގޮތަށްތޯ ސުވާލުކޮށް، ފަރުހާދު ބޭނުން ކަމެއް މިއަދު ފުލުހުންގެ މުއައްސަސާގައި ކުރެވޭނެ ކަމަށް ބުނެފަ އެވެ.
މީގެ އިތުރުން ފުލުހުންގެ ޓެކްނޮލޮޖީ ޑިޕާޓްމަންޓްގެ ސޮފްޓްވެއާ މެނޭޖަރުން ލައްވައި ޓޯޔާޑުން ސައިކަލު ދޫކޮށްލާނެތޯ ވެސް ފަރުހާދު، ޗީފް އިންސްޕެކްޓަރު ކައިރީ އަހާފައިވެ އެވެ.
އޭގެ ފަހުން ސޮފްޓްވެއާ ޑިޕާޓްމަންޓްގެ ދެ އޮފިސަރަކު ގުޅައި ސައިކަލުގެ މައުލޫމާތު ހޯދައި ސައިކަލު ހިފަހައްޓާފައި ހުންނަން ޖެހޭ 15 ދުވަހުގެ މުއްދަތުގެ ކުރިން ސައިކަލު ޓޯޔާޑުން ނެރެފައިވެ އެވެ.
މީގެ އިތުރުން، ރޭޕްގެ މައްސަލައާ ގުޅޭ ގޮތުން ސިޓީގައި ވަނީ ރޭޕްކޮށް އެ އަމަލު ހިންގި ތަނުގެ ފޮޓޯ ވީޑިއޯ ނެގި ކަމަށް ބުނާ މައްސަލާގައި ފުލުހުން ތަހުގީގު ނިންމައި ދައުވާކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވިކަމަށެވެ. ނަމަވެސް ދައުވާކުރަން ބޭނުންވާ ހެކި ނައްތާލާފައިވާކަން ފާހަގަކޮށް ޕީޖީ އޮފީހުން ފުލުހަށް ސިޓީއެއް ފޮނުވާފައިވާއިރު،ފުލުހަށް ޕީޖީ އޮފީހުން ފޮނުވި ސިޓީގައި ހެކި ނައްތާލަން ފަރުހާދު ބައިވެރިވުން އޮތް މިންވަރު ބަޔާންކޮށްފައިވެ އެވެ.
މި ތުހުމަތުތަކާ ގުޅޭ ގޮތުން ފަރުހާދު އަދި ވަކި އެއްޗެއް ވިދާޅެއް ނުވެ އެވެ.
