މާލެ މޭޔަރު ކަމަށް އިދިކޮޅު މައި ޕާޓީ، އެމްޑީޕީގެ ޓިކެޓަށް ވާދަ ކުރައްވާނެ ދެ ބޭފުޅުންނަކީ މިހާރުގެ މޭޔަރު އާދަމް އާޒިމް އާއި ރައްޔިތުންގެ މަޖިލީހުގެ މެދު ހެންވޭރު ދާއިރާގެ ކުރީގެ މެންބަރު އަލީ އާޒިމްކަން އެނގިއްޖެ އެވެ.
އަންނަ އަހަރު މާޗު ފަހުކޮޅު ބާއްވާ ކައުންސިލް އިންތިހާބުގެ ޕްރައިމަރީއަށް އެމްޑީޕީން އަދި އިއުލާނެއް ނުކުރެ އެވެ. ނަމަވެސް އެ ޕާޓީން މިދިޔަ އޮގަސްޓު މަހު ވަނީ ޕްރައިމަރީއަށް ހުޅުވާލުމުގެ ކުރިން ޝައުގުވެރިވާ މީހުން ބެލުމަށް އިއުލާނެއްކޮށްފަ އެވެ.
އެ އިއުލާންގެ މުއްދަތު މިހާރު ހަމަވެފައިވާއިރު، އިތުބާރު ހުރި މަސްދަރުތަކުން ’ދައުރު’އަށް ކަށަވަރުވެފައިވާ ގޮތުގައި، މާލޭ މޭޔަރުކަމުގެ މަގާމަށް ޝައުގުވެރިކަން ފާޅު ކުރައްވާފައި ވަނީ އަލީ އާޒިމް އާއި އާދަމް އާޒިމް އެކަންޏެވެ.
އެ ދެ ބޭފުޅުން ޝައުގުވެރިކަން ފާޅުކުރައްވާފައިވާއިރު، އާދަމް އާޒިމް ވަނީ ރޭ އޭނާގެ ކެމްޕެއިން ރަސްމީކޮށް ފައްޓަވާފަ އެވެ.
އާދަމް އާޒިމް މާލޭގެ މޭޔަރުކަމަށް އިންތިހާބުވެވަޑައިގެންނެވީ ކުރިން އެ މަގާމުގައި ހުންނެވި މިހާރުގެ ރައީސް މުހައްމަދު މުއިއްޒު، 2023ގައި ބޭއްވި ރިޔާސީ އިންތިހާބު ކާމިޔާބުކުރެއްވުމާ ގުޅިގެން މޭޔަރުކަމުން އިސްތިއުފާ ދެއްވުމުންނެވެ.
އެއާ އެކު، ބޭއްވި ބައި-އިލެކްޝަންގައި އެމްޑީޕީ ޓިކެޓްގައި ވާދަ ކުރެއްވީ އާޒިމް އެވެ. އެގޮތުން އާޒިމްއަށް އެމްޑީޕީ ޓިކެޓް ލިބިވަޑައިގެންނެވީ ވާދަވެރިއަކު ނެތުމުން ޕްރައިމަރީއަކާ ނުލަ އެވެ. މިދިޔަ އަހަރު ޖެނުއަރީ މަހު ބޭއްވި މޭޔަރު އިންތިހާބު އާޒިމް ކާމިޔާބު ކުރެއްވީ ޕީއެންސީގެ ކެންޑިޑޭޓު އާޒިމާ ޝަކޫރުއާ ވާދަކުރައްވައިގެން 2،500އަށް ވުރެ ގިނަ ވޯޓުގެ ތަފާތަކުންނެވެ.
އާދަމް އާޒިމްއާ ޕްރައިމަރީގައި މިފަހަރު ވާދަ ކުރައްވާ އަލީ އާޒިމް އަދި މިހާތަނަށް ކެމްޕެއިން ރަސްމީކޮށް ނުފައްޓަވަ އެވެ.
