މިރޭ އެމްޑީޕީން ބާއްވާ މުޒާހަރާގައި އަދާލަތު ޕާޓީން ބައިވެރިވާތީ އެކަމާއި އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް، އިލްޔާސް ހުސައިން، އެ ޕާޓީގެ ރައީސް ޝެއިހް އިމްރާން އަބްދުﷲ ސުވާލުކުރައްވައިފިއެވެ.
އަދާލަތު ޕާޓީގެ ކޮމިއުނިޓީ ގުރޫޕްގައި އިލްޔާސް ކުރެއްވި މެސެޖެއްގައި ވަނީ ސަރުކާރު ހަމަމަގަށް އަޅުވައި ޒިންމާދާރުކުރުވުމަށް އަދާލަތު ޕާޓީން ބަސް ބުނަންޖެހެނީ ވަކި ޕާޓީއެއްގެ ނިވަލުގައި އޮވެގެންތޯ ސުވާލު އުފައްދަވާފައެވެ. އަދި އެކަން ޕާޓީގެ މެންބަރުންނަށް އޮޅުވާލައިގެން ކަންކަން ކުރުން ހުއްޓައިލަންނުޖެހޭތޯ ވެސް އިލްޔާސް ވަނީ ވިދާޅުވެފައެވެ.
ޝައިޚް އިލްޔާސް ގްރޫޕުގައި ކުރެއްވި މެސެޖުގައި ތުހުމަތުކުރެއްވި ގޮތުގައި ސިޔާސީ ބައެއް ކަންކަން އެ ޕާޓީގެ ލީޑާޝިޕުން ކުރިއަށްގެންދަނީ އޮޅުވާލައިގެންނެވެ. މިރޭ އޮންނަ މުޒާހަރާގައި ބައިވެރިވާން އަދާލަތުން ނިންމީ އެ ޕާޓީގެ ރައީސް އިމްރާންގެ ނުފޫޒުގައި އަދާލަތުގެ ރަސްމީ އެއްވެސް ގުނަވަނަކުން ނިންމައިގެން ނޫން ކަމަށް އެ ޕާޓީގެ ބައެއް އިސް ބޭފުޅުން ވިދާޅުވެއެވެ.
އަދާލަތު ޕާޓީ އާއި އެމްޑީޕީ އަކީ ގާތް ގުޅުމެއް އޮންނަ ދެ ޕާޓީއެކެވެ. އަދާލަތު ޕާޓީގެ ތަޖުރިބާ ރާއްޖޭގެ ސިޔާސީ މަސްރަހަށް ވަރަށް މުހިންމު ކަމަށާއި އިސްލާހުގެ ދަތުރުގައި އަދާލަތު ޕާޓީއަކީ އެމްޑީޕީގެ މުހިންމު ބައިވެރިއެއް ކަަމަށް އެމްޑީޕީން ވިދާޅުވެފައިވެއެވެ.
އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވި ގޮތުގައި ވޭތުވެދިޔަ މުއްދަތުގައި އަދާލަތު ޕާޓީން ސާބިތުކޮށްދިނީ ސިޔާސީ ޕާޓީތަކަށް ރާއްޖޭގެ ސިޔާސީ މައިދާނުގައި އޮތް މުހިންމުކަމެވެ. ރާއްޖޭގައި މެދުނުކެނޑި ދެމިއޮތް ދެވަނައަށް އެންމެ ދޮށީ ސިޔާސީ ޕާޓީގެ ހައިސިއްޔަތުން އަދާލަތުގެ ތަޖުރިބާ ރާއްޖޭގެ ސިޔާސީ މަސްރަހަށް ނުހަނު މުހިންމު ކަމަށް އޭނާ ވިދާޅުވިއެވެ.
