ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 79 ވަނަ މާއްދާގެ ދަށުން ކައުންސިލްތަކަށް ސަރުކާރުން ދޭ ޢާންމު ހިލޭ އެހީގެ ފައިސާ (ބްލޮކް ގްރާންޓް) ދިނުމަށް ކަނޑައަޅުއްވާފައިވާ ފިސްކަލް ފޯރމިއުލާގައިވާ ގޮތުން އާބާދީ ކުޑަ ރަށްތަކަށް ލިބޭވަރު މަދުވާތީ، އެއް ހަމައެއްގައި އެ ފައިސާދެވޭނެގޮތަށް ފިސްކަލް ފޯރމިއުލާ މުރާޖަޢާކުރެއްވުމަށް ނިންމަވާފައިވާ ކަމަށް ރައީސުލްޖުހޫރިއްޔާ ޑރ މުޙައްމަދު މުޢިއްޒު ވިދާޅުވެއެވެ. އެކަން ހާމަކުރެއްވީ އެމަނިކުފާނު މިރޭ އެކްސްގައި ކުރެއްވި ޕޯސްޓެއްގައެވެ. ރައީސް ޑރ މުޢިއްޒު ވިދާޅުވީ، “ ސަރުކާރުން ދޭ ޢާއްމު ހިލޭ އެހީގެ ފައިސާ (ބްލޮކް ގްރާންޓް) ފޯރުކޮށްދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލާ ގައިވާ ގޮތުން އާބާދީ ކުޑަރަށްރަކަށް ލިބޭ ވަރު މަދު. ނަމަވެސް އާބާދީ ކުޑަނަމަވެސް ބިމުގެ ގޮތުން ތަނަވަސް ރަށްރަށުގައި މުނިސިޕަލް މަސައްކަތް މަދެއް ނޫނެވެ.“
ބްލޮކް ގްރާންޓްގެ ފިސްކަލް ފޯރމިއުލާ މިހާރު ކަނޑައަޅުއްވާފައިވާ ގޮތުން ކުޑައާބާދީ އޮންނަ ކައުންސިލްތަކަށް ގެއްލުންވަމުންދާތީ ފިސްކަލް ފޯރމިއުލާ މުރާޖާ ކޮށް ރަށުގެ ބޮޑުމިނަށް ރިޢާޔަތް ކުރެވޭ ގޮތަށް ބަދަލްކުރުމަށް ނިންމާފައިވާ ކަމަށް ރައީސް ވިދާޅުވިއެވެ. އަދި 2026ވަނަ އަހަރުގެ ބަޖެޓު ހުށައަޅާއިރު މިބަދަލާއެކު ހުށައެޅުމަށް ނިންމާފައިވާ ކަމަށްވެސް ރައީސް ވިދާޅުވިއެވެ.
ޤާނޫނު ނަންބަރ 7/2010 (ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 79ވަނަ މާއްދާގެ ދަށުން ސަރުކާރުން ދޭ ހިލޭ އެހީ މިހާރު ދޫކުރަނީ އާބާދީގެ ނިސްބަތަށް ރިޢާޔަތްކޮށް ގެންނެވެ. ނަމަވެސް ބިން ބޮޑު ރަށްރަށުގައި މަގުތަކާއި އިޖްތިމާޢީ ސަރަހައްދު ސާފުކޮށް ބެލެހެއްޓުން ފަދަ މުނިސިޕަލް ޚިދުމަތްތަކަށް ޚަރަދު ކުރުމަށް ލިބޭ ފައިސާގެ މިންވަރު މަދުވުމުގެ ސަބަބުން އެފަދަ ރަށްރަށުގެ ޚިދުމަތްތައް ދިނުމުގައި ދަތިވަމުން ދާކަން ކައުންސިލުތަކުން ފާހަގަ ކުރެއެވެ.
