ރާއްޖެ ޓްރާންސްޕޯޓް ލިން (އާރުޓީއެލް) ފެރީ ނިޒާމަށް ސަބްސިޑީއަށް އެއް ބިލިއަން ރުފިޔާ ހޭދާވާކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
މިނިސްޓަރު އަމީން މިކަން ހިއްސާކުރެއްވީ އަންގާރަ ދުވަހު ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވާހަކަފުޅުދައްކަވަމުންނެވެ. އަމީން ވިދާޅުވީ އާރުޓީއެލްގެ ޚިދުމަތައް ސަރުކާރުން ދޭ ސަބްސިޑީ ދަށްކުރަން ޖެހޭ ކަމަށާއި، މިހާރު އޮތް ގޮތަކީ ދައުލަތަށް ކެތްވާ ވަރުގެ ކަމެއް ނޫން ކަމަށާއި، މިހާރު އޮތް މޮޑެލްގައި އޮޕަރޭޓް ކުރާނަމަ އެއީ 20 ޕަސަންޓް ރިކަވަރީ. 80 ޕަސަންޓް ސަބްސިޑައިޒް ކުރަން ޖެހޭ ކަމަށެވެ. އަދި ފެރީ ހިދުމަތް ދިނުމަށް ސަބްސިޑީއަށް އެއް ބިލިއަން ރުފިޔާ ހޭދަވާ ކަމަށް މިނިސްޓަރު އަމީން ވިދާޅުވިއެވެ.
މިނިސްޓަރު އިތުރަށް ވިދާޅުވީ މިހާރު މަސައްކަތްކުރަނީ ސަބްސިޑީ ލެވަލް 55 ޕަސަންޓަށް ކުޑަކޮށް، ރިކަވަރީ 45 ޕަސަންޓު ހައްލުކުރެވޭނެ މޮޑިއުލްއަކަށް ގެންދިޔުމަށް ކަމަށެވެ. އަދި އާރުޓީއެލް ޚިދުމަތް ދެމެހެއްޓުމަށްޓަކައި އަގުތައް ކަނޑައެޅުމަށް އިކޮނޮމިކް ކައުންސިލަށް ހުށަހަޅާފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު އަމީން ވިދާޅުވީ ފުރަތަމަ އަހަރުގައި 48 މިލިއަން ރުފިޔާ ސަބްސިޑައިޒް ކުރި އިރު މިދިޔަ އަހަރު 130 މިލިއަން ސަބްސިޑައިޒް ކުރެވުނު ކަމަށެވެ. އަދި މި އަހަރު ނިމޭއިރު 280 އަށްވުރެ ބޮޑު އެއްޗެއް ހޭދަވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރައީސް ސޯލިހު ސަރުކާރުން ފެށި އާރްޓީއެލްގެ ޕްލޭނަށް އެއްވެސް ބަދަލެއް ނުގެންނާނެ ކަމަށެވެ. އަދި މި ސަރުކާރުން ވެސް ކުރިއަށް ދާނީ އެ ޕްލޭނާ އެކީ ކަމަށާއި، އެޕްލޭން ރަނގަޅު ކަމަށް މިނިސްޓަރު ވިދާޅުވިއެވެ.
އާރުޓީއެލްގެ ހިދުމަތް މިހާރު 9 އަތޮޅެއްގައި ދެއެވެ. މިގޮތުން ޚިދުމަތް ދެމުންގެންދަނީ ހއ އަތޮޅު،ށ، އަތޮޅު، ނ. އަތޮޅު،ޅ.އަތޮޅު، ހދ.އަތޮޅު، ގއ.އަތޮޅު، ގދ އޮތޮޅާއި ފުވައްމުލަކު ސިޓީއާއި އައްޑޫ ސީޓީއަށެވެ
