ގައުމު އިނދަޖައްސާނުލައި ސަލާމަތްކޮށްދޭން މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ސަރުކާރަށް މިއަދު ގޮވާލައިފި އެވެ.
ސަރުކާރުން ހުށަހެޅި ސަޕްލިމެންޓްރީ ބަޖެޓް ދިރާސާކުރި ކޮމިޓީގައި ވާހަކަދައްކަމުން ގާސިމް ވިދާޅުވީ މިއަހަރުގެ ޖޫން ނުވަތަ ޖުލައިގައި ހަރަދު ކުޑަކުރަން ފިޔަވަޅުތައް އަޅުއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ކަމަށާއި ނަމަވެސް ބަދަލުތައް މިއަދާއި ހަމައަށް އައިރު ނުގެނެވޭ ކަމަށެވެ.
އެކަން ނުކުރެވިގެން އުޅޭ ސަބަބުތައް އެބަހުރިކަން އެނގިވަޑައިގަންނަވާ ކަމަށާއި ނަމަވެސް އެ ސަބަބުތަކާއި މެދު ބަހުސް ކުރަން ބޭނުން ނުވާ ކަމަށް ގާސިމް ވިދާޅުވި އެވެ.
ގާސިމް ވިދާޅުވީ ގައުމު އިނދަޖައްސާ ނުލައި ގައުމު ސަލާމަތް ކޮސްދިނުމަށް ސަރުކާރަށް ދަންނަވާކަމަށާއި އަދި ސަލާމަތްކޮށްދެއްވުމަށްޓަކާ އަޅުއްވަންޖެހޭ ކޮންމެ ފިޔަވަޅެއް ވެސް އަޅުއްވައިގެން ނޫން ގޮތަކަށް މިކަމުން ސަލާމަތެއް ނުވާނެކަމަށެވެ.
”އަޅުގަނޑު ދަންނަވަން ބޭނުންވަނީ އަޅުގަނޑުމެންގެ ގައުމު އިނދަޖައްސާނުލައި، މިއަދު އޮތް ސަރުކާރުން ސަލާމަތްކޮށްދޭށޭ. ސަލާމަތްކޮށްދެއްވުމަށްޓަކާ މަނިކުފާނު އަޅުއްވަންޖެހޭ ކޮންމެ ފިޔަވަޅެއް ވެސް އަޅުއްވައިގެން ނޫން ގޮތަކަށް މިކަމުން ސަލާމަތެއް ނުވާނެ،“ ގާސިމް ވިދާޅުވި އެވެ.
ގާސިމް ވިދާޅުވީ ގައުމު ސަލާމަތް ކުރަން އެހެން ބަޔަކު ނާންނާނެ ކަމަށާއި އެހެންކަމުން އަޅަންޖެހޭ ކޮންމެ ފިޔަވަޅެއް ވެސް ވަރަށް ކެރިގެން އަޅަންޖެހޭ ކަމަށެވެ. ނަމަވެސް އެންމެ ދާއިރާއަކުން ޓެކްސް ބޮޑުކުރާތީ އެކަމުގެ ކަންބޮޑުވުން ފާޅުކުރައްވަމުން ގާސިމް ވަނީ އެއީ ހަދާ ބޮޑު ގޯހެއް ކަމަށްވެސް ވިދާޅުވެފަ އެވެ.
ހަރަދު ކުޑަކުރަން ކުރިއަށް އޮތް ދެ އަހަރު ދުވަހުގެ މުއްދަތަކަށް ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް މުއިއްޒު ދާދިމުފަހުން ވަނީ އިއުލާންކުރައްވާފަ އެވެ. އޭގެތެރޭގައި ސިޔާސީ މުވައްޒަފުންނާއި ދައުލަތުގެ ވެރިންގެ މުސާރައިން 10 ޕަސެންޓް އުނިކުރުން ހިމެނެ އެވެ. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން ވެސް ހިމެނެ އެވެ.
