ރާއްޖޭގެ އަކީ ވަކިވަކި ރަށްތަކެއްގެ މައްޗަށް އެކުލެވިފައިވާ ޖަޒީރާ ޤައުމެކެވެ. ކޮންމެ ރަށެއްވެސް އުފެދިފައި އޮންނަނީ އެތައް ޒަމާނަކުން ހެދިފައިވާ ބިޔަގަސްތަކާއި ކުޅިތަކާއި ޗަކަބިންތައް ފަދަ ޤުދުރަތީ ޚަޒާނާ އަކުންނެވެ. ކޮންމެ ރަށަކީ ވަރަށް ކުޑަ ބިންކޮޅެއް އޮންނަ ރަށެކެވެ.
މީހުން ދިރިއުޅޭ ކޮންމެ ރަށެއްގައި އެރަށެއް ރައްޔިތުން ބޯހިޔާވަހިކަން ފޯރުކޮށްދިނުމަށް ދެނީ ބަންޑާރަ ގޯޗެކެވެ. ކޮންމެ އާއިލާއަކަށް ބޯހިޔާވަހިކަން ދިނުމަށް އެކިރަށްރަށުން އެކި ސައިޒުގެ ގޯތި ދޫކުރެއެވެ. އަތޮޅު ތެރޭގެ ރަށްރަށުން ދޫކޮށްފައިވާ ގޯތިތަކުގައި ހުންނަ ގަސްރުއްތައް ކަނޑާ ބިމާ ހަމަކޮށް ސާފު ކުރުން ފިޔަވާ އިތުރު މަސައްކަތެއް ގިނަ ގޯތި ތަކުގައި އެތައް އަހަރެއް ވާއިރުވެސް ކުރެވިފައި ހުންނަކަމަކަށް ނުފެނެއެވެ. ރަށުގެ ފެހިކަން ގެއްލި އެތައް ދުވަހަކުން ހެދިފައިވާ ރުއްގަސްތައް މަދުވެގެން ދިއުން ފިޔަވާ ކަމެއް ނުވެއެވެ. ރަށްރަށުން ދިރިއުޅުމަށް ދޫކޮށްފައިވާ ގޯތިތައް އެތައް ދުވަހެއް ވާއިރުވެސް ގެދޮރު އިމާރާތް ކުރުމުގެ އަމަލީ މަސައްކަތެއް ކުރެވެމުން ނުދާކަން އަތޮޅު ތެރޭގެ ރައްޔިތުން ފާހަގަ ކުރެވެއެވެ. މިކަމުގެ ސަބަބުން ގޯތި ދޫކުރުމުގެ އަސްލު މަޤްޞަދު ގެއްލި ރަށްރަށުގައި ހެދިފައި ހުންނަ ބިޔަ ގަސްތައް ކަނޑާ ބިމާ ހަމަވަމުން ފިޔަވާ އިތުރު ކަމެއް ނުވެއެވެ. ހަމަ މިއާއި އެކު، ތަރައްޤީއެކު ރަށުގައި އެކި ޚިދުމަތް ދިނުމަށްޓަކައި ތަފާތު އިދާރާތައް އިމާރާތް ކުރަން ޖެހެއެވެ. ރަށުކައުންސިލް އިދާރާ އާއި ކޯޓާއި ފުލުހުންގެ އިދާރާފަދަ އެތައް އިމާރާތްތައް އަޅަން ޖެހެއެވެ. މިއިން ކޮންމެ އިމާރާތެއް ހުންނަނީ ވަކިބިންތަކެއްގައެވެ. މިކަމުގެ ސަބަބުން ރަށްރަށުގެ ހުސްބިންކޮޅު ހުސްވެ އެތައް ޒަމާނަކުން ހެދިފައިވާ ބިޔަ ގަސްތައް ކަނޑާ ބިމާ ހަމަ ކުރަން ޖެހެއެވެ. ނަމަވެސް ރަށްރަށުގައި އޮތް ކުޑަ ބިންކޮޅަށް ބަލައިގެން، ސަރުކާރުގެ އިދާރާތައް އެއިމާރާތެއްގައި ހިންގާ ގޮތަށް ދެބުރިއަށް ނުވަތަ ތިންބުރިއަށް އޮފީސް އިމާރާތެއް ބިނާ ކުރެވިއްޖެނަމަ ރަށުގެ ބިންކޮޅު ވީހާވެސް ކުޑަކޮށް ބޭނުން ކުރެވި ރަށްރަށުގެ ތިމާވެއްޓަށް ލިބެމުންދާ ނޭދެވޭ އަސަރު ކުޑަ ކުރެވިދާނެއެވެ. ހަމަ މިއާއި އެކު ރަށްރަށުން ބޮޑެތި ގޯތި ދިނުމުގެ ބަދަލުގައި ފްލެޓް އަޅާ ބޯހިޔާ ވަހިކަން ރައްޔިތުންނަށް ފޯރު ކޮށްދެވިއްޖެ ނަމަ ރަށްރަށުން މިއަދު ގެއްލެމުން ދާ ފެހިކަމަށް ހައްލު ލިބި ޒަމާންވީ ކަށިކެޔޮގަސްތަކާއި މިދިލި، އާއި ފުނަ ހިރުދު ނިކަ ފަދަ ގަސްތަކަށް ހިމާޔާތް ލިބިގެން ދާނެއެވެ.
ވީމާ ، ކުރިން ދެންނެވި ގޮތަށް ރަށުގެ ބިން ބޭނުން ކުރުން ފައިދާ ހުރި ދެމެހެއްޓެނެވި ގޮތަށް ބައްޓަން ކުރެވި ތަރައްޤީގެ ރޭވުންތައް ރޭވިއްޖެނަމަ، އެއީ މިއަދާއި މާދަމާގެ ދަރީންނާއި ދަރިންގެ ޙައްޤުގައި ރަށްރަށުގެ ގުދުރަތީ ޚަޒާނާ އަށް ވެވޭ ބޮޑު އެހީއެކެވެ. ނާޒުކު ތިމާވެއްޓެއް ލިބިފައިވާ ޖަޒީރާ ދިވެހި ރާއްޖޭގެ ތިމާވެއްޓާ މެދު ވިސްނާ މިއަދުގެ ތަރައްޤީ މާދަމާއަށްޓަކައި ، ކުރަން ނުޖެހޭތޯއެވެ.
