ކުރިއަށް އޮތް 2028 ގެ ރިޔާސީ އިންތިހާބުގައި ކުރީގެ ރައީސް އިބްރާޙީމް މުހައްމަދު ސޯލިހް ވާދަކުރައްވަން ނިންމަވައިފި އެވެ.
އިންތިހާބުގައި ވާދަކުރައްވާކަން ހާމަކޮށްފައިވަނީ ރޭ ބޭއްވި ރައީސް ސޯހިލުގެ ސަޕޯޓަރުނެ ބައްދަލުވުމުގައި، ކުރީގެ މަޖިލިސް މެމްބަރު މުޚައްމަދު ރަޝީދު ހުސައިން (ބިގޭ) މެދުވެރިކުރައްވަ އެވެ.
2028ގެ ރިޔާސީ އިންތިހާބަށް އެމްޑީޕީގެ އެތެރޭގެ ވާދަވެރިކަން ބޮޑުވެ، ސޯލިހު ނުކުންނަވަން ޖެހޭ ކަމަށް ގަބޫލުކުރާ ސަޕޯޓަރުންގެ ބައްދަލުވުމެއް ވަނީ ރޭ ވާއްވާފައިވާ ކަން ފާހަގަކޮށްލަންޖެހެއެވެ.
ސޯލިހު އިންތިހާބުގައި ވާދަކުރައްވަން ނިންމެވި ކަން މުހައްމަދު ރަޝީދު (ބިގޭ) މެދުވެރިކޮށް އިއުލާން މި ކުރެއްވީ ދަޑިވަޅަކީ، ކުރީގެ ރައީސް ނަޝީދު އެމްޑީޕީއާ ގުޅިވަޑައިގަންނަވާ ޖަލްސާ މިރޭ ސަލްޓަން ޕާކުގައި ބޭއްވުމަށް ނިންމާފައިވާ ދަޑިވަޅާދިމާކޮށެވެ.
2023ގެ ރިޔާސީ އިންތިހާބުގެ އިތުރުން 2018ގެ ރިޔާސީ އިންތިހާބުގައި ވެސް އެމްޑީޕީގެ ޓިކެޓުގައި ވާދަކުރެއްވީ ރައީސް ސޯލިހެވެ.
ނޮވެމްބަރު 2008އިން ފެބްރުއަރީ 2012އަށް ރާއްޖޭގެ ރައީސްކަން ކުރެއްވި ރައީސް ނަޝީދަށް 2018ގެ ޓިކެޓު ވެސް ލިބުނެވެ. ނަމަވެސް އޭރު ޖަލު ހުކުމެއް އޮތުމުން އެ ފަހަރު ސޯލިހަށް ރިޔާސީ ޓިކެޓު ދިނީ އެމްޑީޕީން އާދަޔާހިލާފު ކޮންގްރެސްއެއް ބާއްވައި، އެ ކޮންގްރެސްއިން އެ ގޮތަށް ފާސްކޮށްގެނެވެ.
2018ގެ ރިޔާސީ އިންތިހާބު ސޯލިހު ކާމިޔާބުކުރައްވައި ވެރިކަން ލިބިވަޑައިގަތީއްސުރެން ރައީސް ސޯލިހާއި ރައީސް ނަޝީދާ ދެމެދު ހިޔާލުތަފާތުވުންތައް ވަނީ އުފެދިފައެވެ. އެންމެ ފަހުންބެއްވި ރިޔާސީ ޕްރައިމަރީން ނަޝީދު ނާކާމިޔާބުވެވަޑައިގަތް ފަހުން އެމްޑީޕީ ދޫކުރައްވައި ޑިމޮކްރެޓްސް ނަމުގައި ޕާޓީއެއް އުފެއްދި އެވެ. ނަމަވެސް ޑިމޮކްރެޓްސްއަށް އިންތިހާބުތަކުގައި މާކަގިނަ ވޯޓުތަކެއް ހޯދިފައެއް ނުވެ އެވެ.
2028ގެ އިންތިހާބަށް އެމްޑީޕީގެ އިސްސަފުގައި އުޅުއްވާ އިތުރުބައެއް ބޭފުޅުން އަންނަނީ ޝައުގުވެރިކަން ފާޅުކުރަމުންނެވެ.
އިދިކޮޅު މައި ޕާޓީގެގޮތުގައި އެމްޑީޕީ އޮތްކަމުގައިވިޔަސް ޕާޓީގެ އެތެރޭގައި ޚިޔާލުތަފާތުވުންތަކެއް އުޅޭކަމަށް އަޑުތައްވަނީ ފެތުރިފައެވެ. އަދި ޕާޓީގެ ހަރަކާތްތަކަށް ދާ މެމްބަރުގެ އަދަދުވެސް ފަހަކަށްއައިސް މަދުވަމުންދާކަން ވަނީ ފާހަގަ ކުރެވިފައެވެ.
