”ގެދޮރުވެރިޔާ“ ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓް އާއްމުކުރުން މިއަހަރުގެ ނޮވެންބަރު މަހަށް ފަސްކޮށްފިއެވެ.
”ގެދޮރުވެރިޔާ“ ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓް އާއްމުކުރުން ފަސްކޮށް ގެދޮރުވެރިކަމާއި ބިމާއި އުމްރާނީ ތަރައްގީއާއި ބެހޭ ވުޒާރާއިން ނެރުނު ބަޔާނެއްގައި ބުނީ ”ގެދޮރުވެރިޔާ“ ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓް އާއްމުކުރުން މިއަހަރުގެ ނޮވެންބަރު މަހަށް ފަސްކޮށްފައިވާ ކަމަށެވެ.
އެ ވުޒާރާއިން ބުނީ މާލެ ސަރަހައްދުން ފްލެޓް ދޫކުރުމަށް 26 ޖޫން 2023 ގައި ފަށާފައިވާ ”ގެދޮރުވެރިޔާ“ ސްކީމްގެ ދަށުން 15 ނޮވެންބަރު 2023 ގައި އިއުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓް އެކުލަވާލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަން ކޮމިޝަނަށް ހުށަހަޅާފައިވާ މައްސަލަ އާއި ގުޅިގެން، ރައީސް ޑރ.މުޢިއްޒުގެ ލަފާފުޅާއިއެކު އެކުލަވާލެވުނު ”ހައުސިން އެޑްވައިސަރީ ކޮމިޓީ“ އާއި މާލެ ސިޓީ ކައުންސިލުން އެކުލަވާލި ”ހައުސިން ކޮންސަލްޓެޓިވް ކޮމެޓީ“ އިންވެސް ”ގެދޮރުވެރިޔާ“ ސްކީމްގެ ދާއިމީ ލިސްޓް އެކުލަވާލާފައިވާގޮތް ރަނގަޅު ނޫންކަމަށް ނިންމާފައިވާކަމަށެވެ.
އެއާއިއެކު، މި ސްކީމްގެ ދަށުން ހުރިހާ ފޯމެއް ރީ-އިވެލުއޭޓް ކުރުމުގެ މަސައްކަތް ފަށާފައިވާކަމަށް އެވުޒާރާއިން ބުންޏެވެ.
އެހެންކަމުން، މި މަސައްކަތްތައް ފުރިހަމައަށް ނިންމާލުމަށް އިތުރު ވަގުތު ބޭނުންވާތީ، މިއަހަރުގެ ނޮވެންބަރު މަހުގެ 2 ހަފްތާގެ ނިޔަލަސް ވަގުތީ ލިސްޓް އާއްމު ކުރުމުގެ މަސައްކަތްތައް ކުރަމުންގެންދާނެ ކަމަށް އެ ވުޒާރާއިން ހާމަކުރެއެވެ.
