ރާއްޖެ ޓީވީގެ ޕްރޮގްރާމެއްގައި އޯޓިސްޓިކް ކުދިންނަށް ފުރައްސާރަކޮށް، އެކުދިންގެ ކަރާމާތަށް ގެއްލުން ލިބޭނެހެން ޖޯކު ޖެހި މައްސަލަ ބްރޯޑްކޮމް އިން ބަލަން ފަށައިފިއެވެ.
ރާއްޖެ ޓީވީން ގެނެސްދިން ”ކާލާބައިސާ“ ޕްރޮގްރާމްގައި ވާހަކަ ދައްކަވަމުން ރައްޔިތުން މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު އަބްދުالله (މޮސްޓާ) އާއި ކުރީގެ ކާނަލް އަހުމަދު ފަޔާޒް އަލީ ރިޒާ (ޕާޕާ ފަޔާޒް)، ވަނީ ސިޔާސީ ކަންކަމާއި ޑައުންސިންޑްރޯމް އަދި އޯޓިޒަމް ކުދިންގެ ޙާލަތާއި ގުޅުވައިގެން މިސާލު ޖައްސަވާފައެވެ.
މުޖުތަމަޢުގައި ހާއްސަ އެހީތެރިކަން ބޭނުންވާ ކުދިންނަށް އެ ޕްރޮގްރާމްގައި ޖޯކު ޖަހައިފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ގުޅިވައިގެންނެވެ.
މިމައްސަލައާ ގުޅިގެން މޯލްޑިވްސް ބްރޯޑްކާސްޓިން ކޮމިޝަނުން ބުދަދުވަހުގެރޭ ނެރުނު ސަރކިއުލާގައި ބުނެފައިވަނީ، ދިވެހި ޖުމްހޫރިއްޔާގެ ޤާނޫނު އަސާސީގެ 35 ވަނަ މާއްދާގައި ބުނާ ”ކުޑަކުދިންނާއި ޅަފުރައިގެ ކުދިންނާއި އުމުރުން ދުވަސްވީ މީހުންނާއި ހާއްސާ އެހީއަށް ބޭނުންވާ މީހުންނަށް ލިބޭ ހާއްސާ ރައްކާތެރިކަން“ އަދި ބްރޯޑްކާސްޓްކުރުމުގެ ޤާނޫނުގެ 37 ވަނަ މާއްދާގެ ދަށުން އެކުލަވާލާފައިވާ ކޯޑް އޮފް ޕްރެކްޓިސްއާ ގައިޑްލައިންތަކާ ތަޢާރަޒުވާ ކޮންޓެންޓް ބްރޯޑްކާސްޓްކުރި މަޢުލޫމާތު އެ ކޮމިޝަނުގެ ސަމާލުކަމަށް އައިސްފައިވާކަމަށެވެ.
އެފަދަ ކޮންޓެންޓް ތަޙްޤީގުކޮށް އެކަންކަން ރަނގަޅު ކުރުމަށް ކުރަންޖެހޭ އެންމެހާ ކަންކަން ކުރުމުގެ ބާރު އެ ކޮމިޝަނަށް ލިބިގެންވާތީ، ކޮމިޝަނުގެ ސަމާލުކަމަށް އަންނަ ކޮންޓެންޓް ބަލައި ޤާނޫނުން ޖާގަދޭ އެންމެ ހަރުކަށި ފިޔަވަޅު އަޅާނެ ކަމަށް ކޮމިޝަންގެ ސަރކިއުލާގައި ބުނެފައިވެއެވެ.
ޤާނޫނު އަސާސީ އާއި ރާއްޖޭގެ އަމަލުކުރަމުންދާ އެންމެހާ ޤާނޫނުތަކަށް އިހްތިރާމްކޮށް އެއްވެސް ފަރާތެއްގެ އަބުރާއި ކަރާމާތް ނުގެެއްލޭ ގޮތަށް ކޮންޓެންޓް އުފެއްދުމަށްވެސް ބްރޯޑްކާސްޓަރުންނަށް އިލްތިމާސް ކޮށްފައިވެއެވެ.
ޓީވީ ޕްރޮގްރާމެއްގައި ކުދިންގެ ޙައްޤަށް އުނިކަން ލިބޭގޮތަށް ވާހަކަދެއްކުމުން އާއްމުންގެ އިތުރުން ސަރުކާރުގެ އިސް މަޤާމުތަކުގައި ތިއްބެވި ބޭފުޅުންގެ ފަރާތުންވެސްވަނީ ވަރަށް ބޮޑެތި ފާޑުކިޔުންތަކެއް އެމްޑީޕީއަށް އަމާޒުވެފަވެއެވެ. އެގޮތުން އިސްލާމީ ކަންތައްތަކާއި ބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސައީދު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ އެއީ ވަރަށް ދެރަ ކަމެެއްކަމަށާއި، އެފަދަ މޭރަމަކުން ވާހަކަ ދެއްކުމަކީ ބަލައިގަނެވޭނެކަމެއް ނޫންކަމަށެވެ. އަދި، ސިޔާސީ ޙިޔާލު ފާޅުކުރުމުގައި އިންސާނީ ކަރާމާތަށް އިހުތިރާމް ކުރަންޖެހޭނެކަމަށް ވަޒީރު ވިދާޅުވިއެވެ. މީގެ އިތުރުން ނިމިދިޔަ ސަރުކާރުގެ ނައިބް ރައީސް ފައިސަލް ނަސީމްވެސް ވަނީ ނުކުޅެދުންތެރިކަން ހުންނަ ފަރާތްތަކަށް ފުރައްސާރަކުރުން ހަރުކަށި އިބާރާތުން ކުއްވެރިކުރައްވާފައެވެ. އަދި މީހުންގެ ނުކުޅެދުންތެރިކަމަކީ އެއިން މިސާލު ޖެހޭނެ ކަމެއްނޫންކަމަށް ވިދާޅުވެ އެއީ ތަޙުޒީބު މުޖުތަމަޢެއްގައި ބަލައިގަންނާނެ ކަމެއްވެސް ނޫންކަމަށް ފައިސަލް ނަސީމް ވިދާޅުވެފައިވާކަން ފާހަގަކޮށްލެވެއެވެ.
