މިދިޔަ އަހަރެކޭ އެއް ފަދައިން މި އަހަރު ވެސް ޢީދުގެ ޖަމާޢަތް ފަށާނީ ހެނދުނު 7.00 ގައި ކަމަށް އިސްލާމީ ކަންތައްތަކާ ބެހޭ ވުޒާރާއިން ބުނެފިއެވެ.
އެ ވުޒާރާއިން މިކަން ހާމަކޮށްފައިވަނީ ހޯމަ ދުވަހުގެރޭ އެކްސްގައި ކުރި ޕޯސްޓެއްގައެވެ.
އީދު ނަމާދުގެ ޖަމާއަށް ފަށާ ގަޑި ހެނދުނު 7:00 އަށް ބަދަލުކުރުމަށް ސަރުކާރުން ނިންމީ މިދިޔަ އަހަރުގައެވެ. އެ ނިންމުން ނިންމާފައިވާ ވަރަށް ގިނަ އިސްމުވެރިންގެ މެދުގައި މަޝްވަރާތައް ކުރުމަށް ފަހުކަން ފާހަގަކޮށްލެވެއެވެ.
މާލޭ ސަރަޙައްދުގެ ހަތަރު ސަރަހައްދެއްގައި ފިޠުރު ޢީދު ނަމާދު ބޮޑު ޖަމާޢަތުގައި ކުރިއަށް ގެންދަން އިސްލާމިކް މިނިސްޓްރީއިންވަނީ ނިންމައިފައެވެ.
އެގޮތުން މާފަންނު ސްޓޭޑިއަމް، ވިލިނގިލީގައި ބޯޅަދަނޑު، ހުޅުމާލެ ފޭސް 1 ގައި ސިންތެޓިކް ޓްރެކްގައި އަދި ފޭސް 2 ގައި ކްރިކެޓް ސްޓޭޑިއަމްގައި ބޮޑު ޖަމާޢަތުގައި ޢީދު ނަމާދު ކުރިއަށްދާނެ ކަމަށް މމިނިސްޓްރީއިން ހާމަކުރެއެވެ.
މީގެ އިތުރުން، މާލެ ސަރަހައްދުގެ 23 މިސްކިތެއްގައިވެސް ޢީދު ނަމާދު ކުރެވޭނެ ގޮތް ހަމަޖައްސާފައިވާ ކަމަށް އިސްލާމިކް މިނިސްޓްރީއިން ބުނެފައިވެއެވެ.
މިނިސްޓްރީއިން އިތުރަށް ހާމަކޮށްފައިވާ ގޮތުގައި، މޫސުން ގޯސްވެ ވިއްސާރައިގެ ސަބަބުން މައިދާންތަކުގައި ނަމާދުކުރުން ކެންސަލްވެއްޖެނަމަ، މާލޭ ސިޓީގެ ހުކުރު ނަމާދުކުރާ ހުރިހާ މިސްކިތެއްގައި ޢީދު ނަމާދު ކުރިއަށްދާނެއެވެ.
