އިމިގްރޭޝަން އާއި ގުޅުންހުރި މައްސަލައިގައި ހައްޔަރުކުރި އިމިގްރޭޝަންގެ މުވައްޒިފުންގެ ވަނަވަރު ފުލުހުން އާންމުކޮށްފި އެވެ.
ފުލުހުން އާދިއްތަ ދުވަހުގެރޭގެ ދަންވަރުގެ ވަގުތެއްގައި ވަނީ މި އޮޕަރޭޝަންގައި ހައްޔަރު ކޮށްފައިވާ މީހުންގެ ވަނަވަރާއި ފޮޓޯ އާންމުކޮށްފައެވެ. ހައްޔަރުކޮށްފައިވާ ފަރާތްތަކަކީ ކ. މާލެ، ގ. ލިޓޯނިޔާ، އުމުރުން 36 އަހަރުގެ، މުހައްމަދު ޝަމްއާން ވަހީދު، ތ. ބުރުނީ، މޫނިމާގޭ، އުމުރުން 21 އަހަރުގެ މުހައްމަދު އަލްސަން އިސްމާއީލް، ކ. މާލެ، ގ. ހެޕީސައިޑް، އުމުރުން 37 އަހަރުގެ އިބްރާހީމް އަހްމަދު، ހަމަ އެ ގޭ، އުމުރުން، 47 އަހަރުގެ، ހަސަން ސަހެޝާން އަދި ކ. މާލެ، މ. ހަޒާރީވިލާ، އުމުރުން 40 އަހަރުގެ އަހްމަދު ލައްސާން އެވެ. އަދި މިމީހުންގެ އިތުރުން އިތުރު މީހަކު ވެސް ހައްޔަރު ކޮށްފައިވެއެވެ.
އިމިގްރޭޝަންގެ ބައެއްގެ މުވައްޒަފުން ބިދޭސީން އަތުން ނާޖައިޒު މަންފާ ހޯދަމުންދާ ކަމުގެ މަޢުލޫމާތު ލިބުމާއި ގުޅިގެން އެ މައްސަލަ ތަހުޤީގު ކުރަމުންދާ ކަމަށާއި އެކަމާއި ގުޅޭ އޮޕަރޭޝަނެއް ހިންގި ކަމަށް ފުލުހުން މީގެ ކުރިން ބުނެފައިވެއެވެ.
އެ އޮޕަރޭޝަންގައި ތިން މީހަކު ހައްޔަރު ކުރި ކަމަށް ފުލުހުން މީގެ ކުރިން ބުނެފައިވާއިރު. ކުރީގެ އިމިގްރޭޝަން ކޮންޓްރޯލާ ޝަމްއާން ވަހީދު ވެސް ވަނީ ހައްޔަރު ކޮށްފައެވެ. މިގޮތުން ހުކުރު ދުވަހުގެރޭ ޝައްމާނު ހައްޔަރުކޮށް އަދި ޝައްމާނުގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހޮނިހިރު ދުވަހު ހާޒިރުކުރުމުން 15 ދުވަހަށް ބަންދުކޮށްފަވެއެވެ.
ކޯޓު އަމުރެއްގެ ދަށުން ފުލުހުން އޭނާ ހައްޔަރު ކޮށްފައިވަނީ އެއިދާރާގެ ޑިޓެންޝަން ސެންޓަރަށް ގެންދިޔަ ބިދޭސީއަކު ދޫކޮށްލުމަށްފަހު، އެ މީހާގެ އަތުން ފައިސާތަކެއް ހޯދި ކަމަށް ތުހުމަތު ކުރާ މައްސަލައިގެ ތަހުޤީގަށެވެ.
އެމައްސަލައިގައި ޝާމިލުވި އޮފިސަރުން އެ ފައިސާ ނަގައިގެން ޝަމްއާނު ދިރިއުޅުއްވާ ގެއަށް ދިޔަކަން ފުލުހުންގެ ތަހުޤީގަށް ހޯދިފައިވާކަމަށް މީގެކުރިން ފުލުހުން ވިދާޅުވެފައިވެއެވެ. އަދި ފަހުން ފުލުހުންވަނީ ޝަމްއާން ދިރިއުޅުއްވި ގެވެސް ބަލައި ފާސްކޮށްފައެވެ. ޝަމްއާނުގެ ގެ ބަލައި ފާސްކުރިއިރުއިރު އެގެއިން 530،000 ( ފަސް ލައްކަ ތިރީސް ހާސް ) ރުފިޔާ ފުލުހުން ހޯދާފައިވެއެވެ. އަދި ޝަމްއާން ދިރިއުޅޭ ގެ ބަލައިފާސްކުރި ކުރުމުގައި ފުލުހުން ހޯދި ފަސްލައްކަ ތިރީސް ހާސް ރުފިޔާގެ އިތުރުން އިލެކްޓްރޯނިކް ސާމާނުތަކެއްވެސް ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ވިދާޅުވިއެވެ.
މީގެ އިތުރުން ކޯޓުގެ އަމުރެއްގެ ދަށުން އާއިލާގެ މެންބަރެެއްގެ ފޯނު ހިފަހައްޓާފައިވާ ކަމަށް ފުލުހުން މިގެ ކުރިން ބުނެފައިވެއެވެ. އެހެނަސް ހިފެހެއްޓީ ޝައްމާނުގެ އަންހެނުންގެ ފޯނު ކަމެއް ފުލުހުން ސީދާ ބުނެފައި ނުވާއިރު ޝައްމާން ވަހީދުގެ އަންހެނުން، ހިދާ ފާއިޒުގެ ފޯނު ފުލުހުން ހިފަހައްޓައިފައިވާ ކަމުގެ އަޑުތަކެއް ވެސް ވަނީ ފެތުރިފައެވެ
