ފްލެޓް ލިސްޓުގައި ހުރި މައްސަލަތަކާއި ގުޅޭގޮތުން 8 މާރޗް ވާ ހޮނިހިރު ދުވަހު ނޫސްވެރިންގެ ބައްދަލުވުމެއް ބާއްވަން އިދިކޮޅު މައި ޕާޓީ ކަމުގައިވާ އެމް.ޑީ.ޕީ އިން ނިންމައިފިއެވެ.
މިގޮތުން ގެދޮރުވެރިޔާ ސްކީމުގެ ދަށުން އަޅާފައިވާ ފްލެޓުތައް ދިނުމަށް މި ސަރުކާރުން އެކުލަވާލި ލިސްޓުގައި ހުރި މައްސަލަތަކާ ގުޅޭގޮތުން ބާއްވާ ނޫސްވެރިންގެ ބައްދަލުވުމެއް ހޮނިހިރު ދުވަހުގެ މެންދުރު 01:00 ގައި އޮންނާނެކަމަށް އެމްޑީޕީއިން އެކްސްގައި ކުރި ޕޯސްޓެއްގައި ވަނީ ބުނެފައެވެ.
އަދި މި ބައްދަލުވުން އެމް.ޑީ.ޕީގެ ސޯޝަލް މީޑިއާ ޗެނަލްތަކުން ލައިވް ކުރާނޭކަމަށްވެސް އެމް.ޑީ.ޕީއިން ބުނެއެވެ.
ފްލެޓު ލިބޭ ކަމަށް ކަނޑައަޅާފައިވާ މީހުންގެ ތެރެއިން، ޝަރުތު ހަމަވެ ފްލެޓު ލިބޭ މީހުންނާއި ޝަރުތު ހަމަނުވާ މީހުންގެ ލިސްޓް ސަރުކާރުގެ ފަރާތުން ފެބުރުއަރީ މަހުގެ 27 ވަނަ ދުވަހު އިއުލާނު ކޮށްފައި ވާއިރު، ގެދޮރުވެރިޔާ ޕޯޓަލް މެދުވެރިކޮށް މި ލިސްޓަށް ޝަކުވާ ހުށަހެޅުމަށް ހުޅުވާލީ މިދިޔަ ހޮނިހިރު ދުވަހު އެވެ. ޝަކުވާ ހުށަހެޅުމަށް ހުޅުވާލުމުން މިހާތަނަށް 1000 އަށްވުރެ ޝަކުވާ ލިބިފައިވާ ކަމަށް ހައުސިންގ މިނިސްޓްރީން ނިމިދިޔަ ހަފްތާގައި ބުނެފައިވާކަން ފާހަގަކޮށްލެވެއެވެ.
ފްލެޓު ލިސްޓަށް ޝަކުވާ ހުށަހެޅުމުގެ ފުރުޞަތު ހައުސިންގ މިނިސްޓްރީން ހުޅުވާލާފައި ވަނީ މިމަހުގެ ނިޔަލަށެވެ.
ލިސްޓުގައިވާ ފަރާތަކާއި ގުޅޭ ޝަކުވާއެއް ނަމަ އީމެއިލްމެދުވެރިކޮށް ނުވަތަ އެ ވުޒަރާއަށް ސިޓީއަކުން ހުށަހެޅޭނެ ކަމަށް ހައުސިން މިނިސްޓްރީން ބެނުފައިވެއެވެ. އަދި ޝަކުވާ ހުށަހެޅުމުގެ މުއްދަތުގެ ތެރޭގައި ޝަކުވާ ހުށަހެޅުމުގެ ކަންކަން ކުރިޔަށްގެންދާނެ ގޮތާއި ގުޅޭ އިތުރު މައުލޫމާތު ސާފުކުރުމަށް އެ ވުޒާރާގެ 4004911 އަދި 4004910 ފޯނަށް ގުޅުމުން މައުލޫމާތު ސާފުކުރެވޭނެ ކަމަށް ވެސް އެ މިނިސްޓްރީން ވަނީ ބުނެފައެވެ.
މީގެ އިތުރުން މިހާރު އިޢުލާންކޮށްފައިވާ ލިސްޓްގައި ފްލެޓް ލިބޭނެކަމަށް ކަނޑައަޅާފައިވާ ފްލެޓްތައް ހަވާލުކުރުމަށް ކުރަންޖެހޭ މަސައްކަތް ލަސްނުކޮށް ކުރިއަށް ގެންދިއުމަށް ނިންމާފައިވާ ކަމަށްވެސް އެވުޒާރާއިން ބުނެފަވެއެވެ..
އަދި ލިސްޓުގައި ހިމެނޭ ފަރާތްތަކުގެ ތެރެއިން ޝަރުތު ހަމަނުވާ ފަރާތްތަކާއި، ފްލެޓް ލިބުމަށް ކަނޑައަޅާފައިވާ އަދަދަށް ޕޮއިންޓް ލިބިފައިނުވާ ފަރާތްތަކުން މިމަހުގެ ނިޔަލަށް ހުށަހަޅާ ޝަކުވާތައް ބަލައި ގޮތެއް ނިންމަންދެން އެފަރާތްތަކަށް ކުރިން ދިނުމަށް ކަނޑައަޅާފައިވާ ފްލެޓްތައް އެހެން އެއްވެސް ފަރާތަކަށް ދިނުމަށް ކަނޑަނާޅާނެކަމަށް ވެސް އެ މިނިސްޓްރީން ބުނެއެވެ.
ގެދޮރުވެރިޔާ ސްކީމްގެ ދަށުން އިމާރާތްކޮށްފައިވާ 4،000 ފްލެޓުގެ ތެރެއިން ޝަރުތުހަމަވެ، ފްލެޓު ލިބެނީ 1820 މީހުންނަށެވެ. އެއީ 3 ކޮޓަރީގެ ލިސްޓުގައި ހިމެނޭ 3721 މީހުންގެ ތެރެއިން ޝަރުތު ހަމަވެ 75 ޕޮއިންޓު ލިބިފައިވަނީ 1423 މީހުންނާއި 2 ކޮޓަރީގެ ލިސްޓުގައިވާ 1218 މީހުންގެ ތެރެއިން ޝަރުތުހަމަވެ 73 ޕޮއިންޓުލިބުނު 397 މީހުންނެވެ.
ކުޜީގެ ރައީސް ޞާލިޙުގެ ސަރުކާރުން ޢާންމުކުރި ފްލެޓު ލިބޭ މީހުންގެ ލިސްޓު މި ސަރުކާރުން މުރާޖަޢާކުރަން ފެށީ އެ ލިސްޓުގައި ގިނަ މައްސަލަތަކެއް ހުރިކަމަށް ގިނަ ބަޔަކު ކަންބޮޑުވުންފާޅުކުރުމާ ގުޅިގެންކަމަށް ހައުސިންގ މިނިސްޓްރީން ބުނެފައިވާކަން ފާހަކޮށްލެވެއެވެ.
،
