އަށްވަނަ ތާރީޚް ދުވަސް ފާހަގަކުރުމަށް ޢިލްމީ ދަންފަޅިއެއް ބާއްވާއިފިއެވެ.
ދިވެހިބަހުގެ އެކެޑަމީއިން ބުނީ، މި އަހަރުގެ ތާރީޚު ދުވަސް ފާހަގަކުރުމުގެ ގޮތުން، ދިވެހިރާއްޖޭގެ އިސްލާމީ ޔުނިވަރސިޓީއާއި ދިވެހިބަހުގެ އެކެޑަމީއާ ގުޅިގެން ޢިލްމީ ދަންފަޅިއެއް ދިވެހިރާއްޖޭގެ އިސްލާމީ ޔުނިވަރސިޓީގައި މިއަދު ބާއްވާފައިވާކަމުގައެވެ.
އެންމެ ފުރަތަމަ ޤައުމީ ތާރީޚު ދުވަހެއް ފާހަގަކުރީ 2018ވަނަ އަހަރުއެވެ. މި އަހަރު މި ފާހަގަކުރަނީ 8ވަނަ ޤައުމީ ތާރީޚު ދުވަހެވެ. މި އަހަރުގެ ތާރީޚު ދުވަހުގެ ސިޢާރަކީ ”ތާރީޚު ދޭ ފިލާވަޅު – ކުރިމަގުގެ ތަޅުދަނޑި“ މިއެވެ.
މި ދަންފަޅީގައި ނިޝާންޢިއްޒުއްދީންގެ ޢިއްޒަތުގެ ވެރިޔާ އޮނަރަބްލް އަލްފާޟިލް ޢައްބާސް އިބްރާހީމް ވާހަކަފުޅު ދެއްކެވިއެވެ. އެ މަނިކުފާނުގެ ވާހަކަފުޅުގައި ތާރީޚު ލިޔާ މީހުންގެ މަސްއޫލިއްޔަތު ބޮޑުކަމުގެ މައްޗަށް އަލިއަޅުއްވައިލެއްވިއެވެ.
ބޭއްވި މި ދަންފަޅީގައި އަލްފާޟިލް އަޙުމަދު ޝަފީޤު ”ޤައުމީ ލޯބި ހުރިހައި ގުޅުމެއް ފަތަޙަކުރެއެވެ“ މި ސުރުޚީއަށް މަޢުލޫމާތު ދެއްވިއެވެ. އަދި ޝައިޚް އިބްރާހީމް އަޙްމަދާއި އަލްފާޟިލް މުޙައްމަދު ދީދީ ”ތާރީޚް ދެނެގަތުމުގެ ބޭނުން“ މި ސުރުޚީއަށް މަޢުލޫމާތު ދެއްވިއެވެ.
އެބޭފުޅުން ހިއްސާ ކުރެއްވި މަޢުލޫމާތުގައި ތާރީޚަކީ ކޮބައިކަމާ، ތާރީޚުގެ މުހިއްމުކަމާ، ތާރީޚު ލިޔުއްވުމުގައި ސަމާލުކަން ދެއްވަންވީ ކަންކަމުގެ މައްޗަށް އަލިއަޅުވައިލެއްވިއެވެ. އެއަށް ފަހު ބައިވެރިންގެ ފަރާތުން ކުރެވުނެ ސުވާލުތަކަށް ޖަވާބުދެވުނެވެ.
މި ޢިލްމީ ދަންފަޅީގައި ރަށްރަށުގެ ސްކޫލުތަކުން ވަނީ ދާދިވަރުކޮށް ބައިވެރިވެފައެވެ.
