މިއަހަރުތެރޭގައި މާލެ ވިލިމާލެ އަލުން މަގުތައް ހެދުމުގެ މަޝްރޫޢުއެއް ފަށާނެ ކަމަށް ރައީސުލްޖުމުހޫރިއްޔާ ޑޮކްޓަރ މުޙަންމަދު މުޢިއްޒު ވިދާޅުވެއްޖެއެވެ. ރައްޔިތުން މަޖިލީހަށް ރިޔާސީ ބަޔާން އިއްވަމުން ރައީސް ޑރ މުޢިއްޒު ވިދާޅުވި ، މަގުގެ މައްސަލައަކީ ހައްލު ހޯދަން ޖެހިފައިވާ މައްސަލައެއް ކަމަށާއި ރާއްޖޭގެ އެތައްރަށެއްގައި އޮތް މައްސަލައެއް ފާހަގަ ކުރެއްވިއެވެ. މިގޮތުން ރައީސް ވިދާޅުވީ ހަމަ އެކަނި މާލެއަށް ބަލާލި ނަމަވެސް ރާއްޖޭގެ ބޮޑު އާބާދީއެއް ދިރިއުޅޭ މާލޭގެ ހުރިހާ މަގެއް ވަނީ ވަރަށް ބޮޑަށް ހަލާކުވެފައި ވާކަމަށެވެ. އެއިގެ ސަބަބުން އެތައް ތަކުލީފެއް ރައްޔިތުން އުފުލަން ޖެހޭ ކަމަށް ރައީސް ވިދާޅުވިއެވެ.
”އެހެންވީމާ މާލޭގެ ހުރިހާ މަގެއް އަލުން ރަގަޅު ފެންވަރަކަށް ހެދުމުގެ ބިޔަ ބޮޑު މަޝްރޫޢުއެއް ޗައިނާގެ ސަރުކާރުގެ ހިލޭ އެހީގެ ދަށުން ކުރިއަށް ގެންދިއުމަށް ވާންޖެހޭ އެންމެ ފަހުގެ ތައްޔާރިތައް މިދަނީ ވަމުން. އެގޮތުން ފީޒިބިލިޓީގެ މަސައްކަތް މިހާރު ވަނީ ނިމިފައި. އިރާދަ ކުރެއްވިއްޔާ މާލޭގެ ހުރިހާ މަގެއް މާލެ އާއި ވިލިމާލޭގެ ހުރިހާ މަގެއް ޒަމާނީ ފެންވަރަށް އަލުން ހެދުމުގެ ޢަމަލީ މަސައްކަތް މިއަހަރު ތެރޭގައި ފެށިގެން ދާނެ.“ ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ރާއްޖޭގެ އެކި ކަންކޮޅުތަކުގައި މަގު ހެދުމުގެ 50 މަޝްރޫޢު މިއަހަރު ތެރޭގައި ކުރިއަށް ދާނެ ކަމަށެވެ.
