ޤައުމީ އެއަރލައިން މޯލްޑިވިއަންގެ ވައިޑް-ބޮޑީ މަތިންދާބޯޓުން ޗައިނާއަށް ދަތުރުތައް މިއަދު ރަސްމީކޮށް ފަށައިފިއެވެ.
މިގޮތުން ޚިދުމަތުގެ ފުރަތަމަ ދަތުރު ކުރެވިފައިވަނީ ޗައިނާގެ ޗެންޑޫ ސިޓީއަށެވެ. އެ ބޯޓުގައި ޗައިނާގެ ޗެންޑޫއަށް ކުރި ފުރަތަމަ ދަތުރުގައި 52 ފަސިންޖަރުން ޗައިނާއަށް ދަތުރުކޮށްފައިވާއިރު، އޭގެތެރެއިން 32 މީހުންނަކީ ފަތުރުވެރިންކަން ފާހަގަކުރެވެއެވެ.
މިވަގުތު ރާއްޖެއިން ޗައިނާގެ 3 ސިޓީއަކަށް ހަފުތާއަކު 3 ދަތުރު ކުރުމަށް ހަމަޖެހިފައިވެއެވެ. އެގޮތުން ދަތުރުތަށް އޮންނަނީ ހޯމަ، ބުދަ އަދި ހުކުރު ދުވަހުއެވެ. އެއީ ޗައިނާގެ ޗެންޑޫ ސިޓީ, ޝެންހާއީ އަދި ބެއިޖިންގއެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުފުޅުގެ ދަށުން މިމަހުގެ 6 ވަނަ ދުވަހު ގެނައި ވައިޑް-ބޮޑީ މަތިންދާ ބޯޓަކީ 264 މީހުންގެ ޖާގައިގެ އެއަރބަސް އޭ330ގެ 200 ވޭރިއަންޓްގެ މަތިންދާ ބޯޓެކެވެ.
މި ބޯޓުގެ ދަތުރުތައް މިމަހު 24 ވަނަ ދުވަހު ބެއިޖިން އަށް ދަތުރު ފަށާއިރު ބެއިޖިންގެ ދެކޮޅު ޓިކެޓެއްގެ އަގު 788 ޑޮލަރު (12،151ރ.) އަށް އަރަ އެވެ.
މީގެ އިތުރުން ޗައިނާގެ ޝެންހާއީގެ ދެކޮޅު ޓިކެޓުގެ އަގަކީ 777 ޑޮލަރު (11،981ރ.) އެވެ. ޝެންހާއީ އަށް ދަތުރުތައް ފަށާނީ މި މަހުގެ 27 ގައެވެ.
ވައިޑް-ބޮޑީ މަތިންދާބޯޓު މޯލްޑިވިއަންގެ ޚިދުމަތަށް ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މި ވަޢުދުފުޅު އިތުރަށް ފުރިހަމަކުރުމުގެ ގޮތުން، އަންނަ އޮކްޓޯބަރު މަހުގެ ތެރޭގައި އިތުރު ވައިޑް-ބޮޑީ މަތިންދާބޯޓެއް ރާއްޖެއަށް ގެނެސް، ޔޫރަޕަށް ދަތުރުތައް ފެށުމަށް ޤައުމީ އެއަރލައިން މޯލްޑިވިއަނުން އަންނަނީ ތައްޔާރުވަމުންނެވެ.
