ވިއްސާރައާއި ގުޅިގެން ކަރަންޓުގެ ޚިދުމަތަށް ދިމާވެދާނެ މައްސަލަތަކާއި، ވިއްސާރައިގައި ލިބިދާނެ އެހެނިހެން ގެއްލުންތަކަށް އެހީތެރިކަންފޯރުކޮށް ދިނުމަށް ސްޓެލްކޯ އަދި ފެނަކައިގެ ޓީމުތަކުން ތައްޔާރީ ޙާލަތުގައި ތިބިކަމަށް އެ ދެ ކުންފުނިންވިދާޅުވެއްޖެއެވެ.
ވިއްސާރައިގައި ލިބިދާނެ ގެއްލުންތަކަށް އެހީވުމަށް ސްޓެލްކޯ އަދި ފެނަކައިންވެސް ޚާއްސަ ޓާސްކްފޯސް ވަނީ އެކުލަވާލާފައެވެ. އެގޮތުން މާލެއާއި އެ ކުންފުނިތަކުން ޚިދުމަތްދޭ ރަށްތަކުގައިވެސް ޚާއްސަ ރެސްޕޮންސް ޓީމްތައް ވަނީ ތައްޔާރުކޮށްފައެވެ.
ސްޓެލްކޯއިން ވިދާޅުވީ ވިއްސާރަކުރާނެކަމަށް ލަފާކޮށް މޫސުމާއި ބެހޭ ޤައުމީ އިދާރާއިން ނެރެފައިވާ ބަޔާނާއި ގުޅިގެން، ފެންބޮޑުވެ ލިބޭ ގެއްލުންތައް ކުޑަކުރުމަށް ދުރާލާ ފިޔަވަޅުއެޅުމަށް ނިންމައި، ސްޓެލްކޯގެ މެނޭޖްމަންޓުން ޚާއްސަ ޓާސްކްފޯހެއް އެކުލަވާލާފައިވާކަމަށެވެ.
ވިއްސާރައިގެ ސަބަބުން ލިބޭ ގެއްލުން ކުޑަކުރުމަށް ރައްޔިތުން ބޭނުންވާ އެހީތެރިކަން ފޯރުކޮށްދިނުމަށް ސްޓެލްކޯއިން ޚިދުމަތްދޭ ހުރިހާ ރަށެއްގައިވެސް ސްޓެލްކޯގެ މުވައްޒަފުން ތައްޔާރަށް ތިބިކަމަށް އެ ކުންފުނިން ވިދާޅުވެފައެވެ.
ފެނަކައިން ނެރެފައިވާ ނޫސް ބަޔާނެއްގައި ވިދާޅުވި ފެނަކައިގެ ބްރާންޗްތަކުގައި އެކުލަވާލާފަވާ ކުއްލި ޙާލަތްތަކަށް އިޖާބަދޭ ޓީމްތައް، ރަށްރަށުގައި ޙަރަކާތްތެރިވާ މުވައްސަސާތަކާ ގުޅިގެން ހަރަކާތްތެރިވުމަށް ތައްޔާތީ ޙާލަތުގައި ތިބިކަމަށެވެ.
އެގޮތުން ފެނަކައިން ޚިދުމަތްދޭ 151 ރަށުގައި ޓީމްތައް އެކުލަވާލާފައިވާކަމަށާއި މި ޓީމްތަކުގައި ޖުމްލަ 2311 މުވައްޒަފުން ހަރަކާތްތެރިވާކަމަށް ފެނަކައިން ވަނީ ވިދާޅުވެފައެވެ.
މިހާރު ރާއްޖެއަށް ކުރަމުން ދާ ވިއްސާރަގުޅިގެން މިމަހުގެ 18ވަނަ ދުވަހާ ހަމައަށް ވަނީ މޫސުމީ އެލާރޓެއް މޫސުމާ ބެހޭ ޤައުމީ އިދާރާއިން ނެރެފައެވެ.
