ރާއްޖެއަށް މިހާރު ކުރަމުންދާ ވިއްސާރައިގައި ލިބޭ ގެއްލުންތައް ރައީސް ޑރ. މުހައްމަދު މުޢިއްޒުގެ ސަރުކާރުން ވަރަށް ގާތުން ބައްލަމުން ގެންދަވާ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް ވިދާޅުވެއްޖެއެވެ.
ރަށްރަށުގެ ކައުންސިލްތައް މެދުވެރިކޮށް ލޯކަލް ގަވަމެންޓް މިނިސްޓްރީން ވަރަށް ގާތުން، ރައީސް ޑރ. މުޙައްމަދު މުޢިއްޒުގެ އިރުޝާދާއި ލަފާފުޅުގެ ދަށުން، ވިއްސާރަ އާއި އުދަ އެރުމުގެ ސަބަބުން ރައްޔިތުންނަށް ލިބެމުންދާ ގެއްލުންތަކާއި ކުރިމަތިވަމުންދާ ތަކުލީފުތައް ބައްލަވަމުން އަންނަ ކަމަށް މިނިސްޓަރ ވިދާޅުވިއެވެ.
ކ. ހިންމަފުށީގައި ފެންބޮޑުވުމާ ގުޅިގެން ކައުންސިލްގެ ތަކެއްޗަށް ލިބިދާނެ ގެއްލުންތަކުން ސަލާމަތް ކުރުމަށް މަސައްކަތް ކުރައްވަމުން ދިޔަ ކައުންސިލް މެންބަރު ވަފިއްޔާ އިބްރާހީމް ކަރަންޓްގައި ޖެހުމުގެ ސަބަބުން މާލެ ގެނައުމާ އެކު، އޭނާގެ ހާލު ބައްލަވާލެއްވުމަށް މިނިސްޓްރީގެ މުވައްޒަފުން ވަނީ އޭޑީކޭ ހޮސްޕިޓަލަށް ޒިޔާރަތް ކުރައްވާފައި ކަމަށް އާދަމް ޝަރީފް ވިދާޅުވިއެވެ.
ވަފިއްޔާ ކަރަންޓު ޖެހުނީ ސޮކެޓަކުން ޓޮޕެއް ނައްޓަން އުޅުމުގެ ތެރޭގައި ހުކުރުދުވަހުގެރޭ އިރާކޮޅުގެ ވަގުތެއްގައެވެ. އޭނާ މާލެ ގެނެސްފައިވަނީ ހިންމަފުށީ ސިއްޙީ މަރުކަޒުގައި ފަރުވާ ދިނުމަށް ފަހުއެވެ .
މާލެ އަށާއި ރާއްޖޭގެ ގިނަ ރަށްރަށަށް ހުކުރު ދުވަހު ކުރި ބޯ ވިއްސާރައިގައި ބޮޑެތި ގެއްލުންތަކެއް ވެފައިވާއިރު ސަރުކާރުން ވަނީ ގެއްލުންވި މީހުންނަށް އެހީތެރިކަން ފޯރުކޮށްދިނުމުގެ މަސައްކަތްތައް ފައްޓަވައިފައެވެ.
މާލެ އިން އެކިއެކި އެހީތަކަށް އެދި 774 ތަނަކުން ރިޕޯޓް ލިބުނު ކަމަށާއި އޭގެ ތެރެއިން 554 ފަރާތަކުން އެހީ އަށް އެދުނީ ވެލިބަސްތާ ޖެހުމަށް ކަމަށް ނޭޝަނަލް ޑިޒާސްޓަ މެނޭޖްމަންޓް އޮތޯރިޓީން ވިދާޅުވިއެވެ. އަދި 53 ގެއެއްގެ ރެޕިޑް އެސެސްމެން ހަދާފައިވާ ކަމަށް ވެސް އެމްއެންޑީއެމްއޭ އިން ވިދާޅުވިއެވެ. މީގެތެރެއިން 36 ގޭބިސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދެވިފައިވާކަމަށް ނޭޝަނަލް ޑިޒާސްޓަ މެނޭޖްމަންޓް އޮތޯރިޓީންއިން މައުލޫމާތު ދެއްވައެވެ.މި ވިއްސާރައިގައި މިހާތަނަށް އެންމެ ބޮޑު ގެއްލުމެއް ލިބިފައި ވަނީ ފ. ނިލަންދު އާއި ކ. ހިންމަފުއްޓަށް ކަމަށް ވެސް އެ އިދާރާއިން ހާމަކުރައްވައެވެ.
ރާއްޖެއަށް ކުރަމުންދާ ވިއްސާރައިގައި މާލޭގައި ކަކުލާ ހަމައަށް ފެންބޮޑުވިއިރު، ސިފައިން ނިކުމެ 30،000 ޓަނުގެ ފެންވަނީ ހިންދާފަކަން ފާހަގަކޮށްލެވެއެވެ. މިގޮތުން މާލެ ސަރަހައްދުގެ އިތުރުން ސިފައިން ފެން ހިންދުމުގެ މަސައްކަތުގައި ހަރަކާތްތެރިވާ ރަށްތަކުގެ ތެރޭގައި ށ. ނަރުދޫ، ކ. ގުރައިދޫ، ކ. ހުރާ އަދި ވެލާނާ އިންޓަނޭޝަނަލް އެއަރޕޯޓް ހިމެނެއެވެ .
މާލޭގައި ފެން ހިންދުމުގެ މަސައްކަތް ކުރިއަށް ގެންގޮސްފައި ވަނީ ވެސްޓްޕާކް، އައިޖީއެމްއެޗް، ސަލްމާން މިސްކިތް، ބޮޑުވަޅު، މާފަންނު ފެރީ ޓާމިނަލް އަދި ކުޑަކުދިންގެ ބަގީޗާ ސަރަހައްދުތަކުގައެވެ .
ފާއިތުވި 24 ގަޑިއިރުގެ ތެރޭގައި މުޅި ރާއްޖެއިން އެންމެ ބޯކޮށް ވާރޭވެހުނީ މާލެ ސަރަހައްދަށްކަން ފާހަގަކޮށްލެވެއެވެ. މިގޮތުން ހުޅުލެއަށް 144 މިލިމީޓަރު، މާލެއަށް 142.6 މިލިމީޓަރު އަދި ހުޅުމާލެއަށް 122 މިލިމީޓަރުގެ ވާރޭ ވެހުނެވެ. މިއީ މާލެއަށް މިފަހަކަށް އައިސް ވެހުނު އެންމެ ބޯ ވާރޭކަމަށް ބެލެވެއެވެ .
މެޓުން ހާމަކޮށްފައިވާ ގޮތުގައި މިހާރު ކުރަމުންދާ ވިއްސާރަ އަލިކުރާނެ ކަމަށް ލަފާ ކުރެވެނީ އަންނަ ހޯމަ އިން ފެށިގެންނެވެ
