އެއްވެސް ބޭނުމެއް ނުހިފި ވީރާނާވަމުންދިޔަ ގަލޮޅު ޕާކު ހެދުމުގެ މަސައްކަތް 15 އަހަރަށްފަހު މާލޭ ސިޓީކައުންސިލް އިން ފަށައިފިއެވެ.
ސިޓީ ކައުންސިލްއިން ބޫނީ، ރައްޔިތުންގެ ބޭނުންތަކަށް އިސްކަންދީގެން، އަލުން ހެދުމުގެ މަސައްކަތް، ފަށައިފައިވާކަމުގައެވެ. މި މަސައްކަތް ފަށާފައިވަނީ 6 ޑިސެމްބަރ 2024 ގައި ކަމާއި ގަލޮޅު ސިޓީޕާކަކީ ގަލޮޅުގައި އޮންނަ ހަމައެކަނި ޕާކުކަމަށެވެ.
ސިޓީ ކައުންސިލް އިން އިތުރަށް ބުނިގޮތުގައި، ގަލޮޅު ސިޓީ ޕާކު ތަރައްޤީ ކުރުމަށްޓަކައި، ޕާކުގެ ވަށައި ޓިނު ޖަހައި ބަންދުކުރުމަށް ފަހު 15 އަހަރު ވީއިރުވެސް، އެތަނުގެ އެއްވެސް މަސައްކަތެއް ނުކޮށް އޮތުމުން، މަސްތުވާތަކެތި ބޭނުންކުރާ މީހުންގެ އައްޑާއަކަށް އެ ތަންވެފައިވާކަމުގައެވެ. އަދި އެ ކަމުގެ ސަބަބުން، އެ ސަރައްޙައްދުގައި ދިރިއުޅޭ ރައްޔިތުންނަށް، ތަފާތު އުނދަގޫތައް ވަމުންދާތީ، އެ ކަމުގެ ޝަކުވާތައް ވެސް ކެނޑިނޭޅި، މާލެ ސިޓީ ކައުންސިލަށްލިބެމުންދާކަމުގައެވެ.
ގަލޮޅު ސިޓީ ޕާކު އަލުން ތައްޔާރުކުރުމުގެ މަސައްކަތް މިކުރަނީ، އެ ތަނުގައި ޖާގަ އޮތް މިންވަރުން ރައްޔިތުންގެ ބޭނުންވާ ކަންކަމަށް، ވަރަށް ބޮޑަށް އިސްކަން ދީގެންނެވެ. މި ގޮތުން މިހާރު މަސައްކަތް ފަށައިގެން އުޅޭ، ސިޓީޕާކު އަލުންހެދުމުގެ މަސައްކަތް ނިމޭއިރު، ސީޓީ ޕާކުގައި ތްރީ އޮން ތްރީ ބާސްކެޓް ކޯޓަކާއި އައުޓްޑޯރ ބެޑްމިންޓަން ކޯޓަކާއި ދުވާ ޓްރެކަކާއި ކުޑަކުދިން ކުޅޭނެ ހުސް ބިމަކާއި އައުޓްޑޯ ޖިމަކާއި އިވެންޓް ބޭއްވުމަށް ޚާއްޞަ ސަރަޙަދަކާއި އަދި ޢުމުރުން ދުވަސްވީ ބޭފުޅުން މަޑުކޮށްލައިގެން ތިބުމަށް ޓަކައި، އުނދޯލި ބަހައްޓައިގެން ތައްޔާރުކޮށްފަ އޮންނަ ޚާއްޞަ ސަރަޙައްދެއް އޮންނާނެކަމަށް ސިޓީކައުންސިލްއިން މައުލޫމަތު ދީފައިވެއެވެ.
މި ކަމާ ގުޅިގެން 8 އޮގަސްޓް 2024 ގައި، މާލެ ސިޓީ ކައުންސިލްގެ މޭޔަރ އާދަމް ޢާޒިމްގެ އިސްނެންގެވުގެ މަތިން، ސިޓީ ޕާކުގައި ވަށައިގެން ޖަހާފަ ހުރި ޓިނުތައް ނަޓާލައި އެތަން ސާފުކޮށް، ކޮންމެ ވެސް ވަރަކަށް އާބަތުރަ ފިލުވާފައިވާ ކަން މާލޭ ސިޓީ ކައުންސިލް އިން ބުނެފައިވެއެވެ.
މި މަސައްކަތަކީ މާލެ ސިޓީގެ މޭޔަރުކަމާ، މޭޔަރ އާދަމް ޢާޒިމް ހަވާލުވެ ވަޑައިގެންނެވުމަށް ފަހު، މާލެ ސިޓީއަކީ، ހިތްފަސޭހަ، އަމާން، ރައްކާތެރި އަދި އެކަކު އަނެކަކަށް އަޅައިލައި، އޯގާތެރި ރައްޔިތަކު ދިރިއުޅޭ ސިޓީއަކަށް ހެއްދެވުމަށް ކުރައްވަމުންގެންދަވާ ގިނަ ގުނަ މަސަކަތްޕުޅުގެތެރޭގައި ހިމަނުއްވައިގެން ކުރައްވާ މަސައްކަތެއްކަން މާލޭ ސިޓީ ކައުންސިލް އިން މައުލޫމާތު ހިއްސާކޮށްފައިވެއެވެ.
