ރާއްޖޭގައި ފާލުންނެއްޓިފައިވާ ބިދޭސީންގެ މައްސަލަ ޙައްލުކޮށް ޤަވާއިދާއި ޚިލާފަށް ރާއްޖޭގައި އުޅޭ ބިދޭސީން ހޯދުމަށް ކުރަމުން އަންނަ ބުރަ މަސައްކަތުގެ ތެރެއިން ބިދޭސީންގެ މައުލޫމާތު ރިޕޯޓްކުރުމަށް އުފެއްދި ”އިމިގްރޭޝަން ވޮޗް“އަށް މިހާތަނަށް 1017 މައްސަލަ ހުށަހަޅާފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
އިމިގްރޭޝަން އިން އާންމުކުރި ތަފާސް ހިސާބުތަކުން ދައްކަގޮތުގައި ޖުލައި 17 ވަނަ ދުވަހު ލޯންޗް ކުރި އިމިގްރޭޝަން ވޮޗަށް މިވީ 5 މަހެއްހާދުވަހުގެ ތެރޭގައި 1017 މައްސައްލަ ހުށަހެޅިފައި ވާއިރު، އޭގެ ތެރޭގައި އެންމެ ގިނައން ހުށަހަޅައިފައިވަނީ ޤަވާއިދާ ޚިލާފަށް ބިދޭސީން ވިޔަފާރި ކުރާ ކަމަށް ބުނެ ހުށަހެޅި 239 މައްސަލަ އެވެ. އަދި ވޯކް ވިސާގެ ޤަވާއިދާ ޚިލާފުވެފައިވާ ކަމަށް ބުނެ ހުށަހަޅާފައިވާ 239 މައްސަލަހިމެނެ އެވެ. އަދި ވަޒީފާއަށް ފިލުމުގެ 41 މައްސަލަ ހިމެނެ އެވެ.
ރާއްޖޭގައި ބިދޭސީންގެ މައްސަލަތައް ޙައްލުކުރުމުގެ ގޮތުން މޯލްޑިވްސް އިމިގްރޭޝަނާއި މޯލްޑިވްސް ޕޮލިސް ސާވިސްއާއި ކަމާއި ގުޅުން ހުރި އެހެނިހެން އިދާރާތައް ގުޅިގެން ކުރިއަށް ގެންދާ އޮޕަރެޝަންތަކުގައި މިދިޔަ 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން ފާއިތުވެދިޔަ އެއް އަހަރު ތެރޭ ޤަވާއިދާ ޚިލާފަށް އުޅޭ 5012 ބިދޭސީން ރާއްޖެއިން ޑީޕޯޓްކޮށްލައިފައިވާކަމަށް ސަރުކާރުން ހާމަކުރެއެވެ.
އިމިގްރޭޝަން ވޮޗްއަކީ މައުލޫމާތު ދޭ ފަރާތް ނޭނގޭ ގޮތަށްވެސް ރިޕޯޓް ކުރެވޭގޮތަށް އިންތިޒާމު ކުރެވިފައިވާ ޕޯޓަލްއެކެވެ. އަދި ދޭ މައުލޫމާތުގެ ސިއްރު ހިފެހެއްޓޭނެ ކަމަށާއި މިއީ ފަސޭހަ ކަމާއެކު އިމިގްރޭޝަނާއި ގުޅުން ހުރި މައްސަލަތައް ރިޕޯޓް ކުރަން ހާއްސަ ޕްލެޓްފޯމެއްކަމަށް އިމިގްރޭޝަނުން މައުލޫދީފައިވެ އެވެ.
