މިހާރު މިއޮތް ރައީސް ޑރ. މުޙައްމަދު މުއިއްޒުގެ ސަރުކާރަށް ދެވޭނީ ނަޒާހަތްތެރިކަމުގެ މިންގަނޑުން ސުމެއްކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ޕީއެންއެފުން ކޮންމެ ހަފުތާއަކު ސިލްސިލާކޮށް ބާއްވާ ޖަލްސާތަކުގެ ތެރެއިން ހޯމަދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ޔާމީން ވިދާޅުވީ އޭސީސީގެ ރައީސަކީ ރައީސުލްޖުމްހޫރިއްޔާ އައްޔަންކުރައްވާ ބޭފުޅެއްގެ ގޮތުގައި ނިންމަން މަސައްކަތް ފެށި ހިސާބުން، ރާއްޖެ ޑޮމިކްރަސީގައި 30 އަހަރު ފަހަތަށް ގޮސްފައި ވާކަމަށެވެ.
އަދި އެހެން ކަމުން މި ސަރުކާރަށް ދެވޭނީ ނަޒާހަތްތެރިކަމުގެ މިންގަނޑުން ސުމެއްކަމަށާއި މި ސަރުކާރުގެ ބޮޑުންގެ މައްސަލަތައް ވެސް އޭސީސީގައި އެބަ އޮތް ކަމަށް ޔާމީން ވިދާޅުވިއެވެ.
ޔާމީން ވިދާޅުވީ މި ސަރުކާރުގެ ބޮޑުންގެ އޮތީ އެންމެ މައްސަލައެއް ނޫންކަމަށާއި އެތައް މައްސަލައެއް އޭސީސީގައި އެބައޮތް ކަމަށެވެ. އަދި ދައުލަތުން ބޮޑެތި އަދަދުގައި ފައިސާއިން ސެޓަލްމަންޓު ދައްކަން ޖެހިފައި ހުރީ މިހާރު މިހުރި ރައީސް ކަންތައްތައް ކުރައްވާފައި ހުރި ގޮތުން،ކަމަށް ވެސް އެމަނިކުފާނު ވިދާޅުވިއެވެ.
އެހެންކަމުން ގާނޫނު އަސާސީން އުފަންކުރި ހުރިހާ މުސްތަގިއްލު މުއައްސަސާތައް ބަންދުކުރުން ވެސް މިހާރު މާ ރަނގަޅުވާނެ ކަމަށް އެމަނިކުފާނު ވިދާޅުވިއެވެ.
ޔާމީން ވިދާޅުވީ ރައީސަކީ އެއީ ގައުމުގެ ޚާދިމެއް ކަމަށާއި އެއީ ގަނޫނު އަސާސީގައި އެމަނިކުފާނަށް މަތިކޮށްފައި ހުރިކަންކަން ގާނޫނުގައި އެބުނާ ގޮތަކަށް ތަދުބީރުކުރަން ހަވާލުކޮށްފައި ހުންނަ މީހެއްކަމަށެވެ. އަދި އޭގެ ބަދަލުގައި ގާނޫނު އެބޭފުޅާއަށް ފަހިވާގޮތަށް ގާނޫނު ބަދަލުކޮށްލުމަކީ އޭގެ ޒާތުގައި ކުރެއްވޭނެ ކަމެއް ނޫންކަމަށް ވެސް ޔާމީން ވިދާޅުވިއެވެ.
އެމަނިކުފާނު ވަނީ މި ސަރުކާރުގެ ނަޒާހަތްތެރިކަން ރައްޔިތުންނަށް ހާމަކޮށްދެއްވުމަށް ގޮވައިލައްވާފައެވެ. އަދި ރައްޔިތުން އެންމެ އެނގެން ބޭނުންވަނީ މި ސަރުކާރުން ބަޖެޓާމެދު އަމަލުކުރި ގޮތް ކަމަށާއި އެކަން ވެސް ހާމަކުރަން ޖެހޭ ކަމަށް އެމަނިކުފާނު ވަނީ ވިދާޅުވެފައެވެ.
އިލެކްޝަން ކޮމިޝަން (އީސީ) އަދި އޭސީސީއަށް ރައީސް ބޭނުންފުޅުވާ ބޭފުޅުން އައްޔަން ކުރެއްވި ނަމަވެސް، ރައްޔިތުންގެ ވޯޓު ކޮންޓްރޯލް ކުރެވޭނެކަމަށް ހީކުރެއްވުމަކީ ކުށްހީއެއް ކަމަށް އެމަނިކުފާނު ވިދާޅުވިއެވެ. އަދި ކަންކަން ހާމަކުރެއްވުމަށްފަހު ވޯޓަކަށް އެހުމުން ރައްޔިތުން ޚިޔާރުކުރާ ގޮތް ވެސް ވަރަށް ސާފުވާނެ ކަމަށް އެމަނިކުފާނު ވިދާޅުވިއެވެ..
