ފޯކަސް މިވަގުތު ހުރީ ރާއްޖެ ހަމަ މަގަށް އަޅުވަން ކަމަށާއި ކުރިއަށް އޮތް ރިޔާސީ އިންތިހާބަކަށް ނޫން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ކުރިއަށް އޮތް ރިޔާސީ އިންތިހާބުގެ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ އިއުލާންކުރައްވާފަ އެވެ.
އިދިކޮޅު މީޑިއާއެއް ކަމުގައިވާ ރާއްޖެ ޓީވީގެ ޕްރޮގްރާމެއްގައި ވާހަކަދައްކަވަމުން ޝާހިދު ވިދާޅުވީ ވިސްނުން ހުރީ 2028 ގެ ރިޔާސީ އިންތިޚާބަށް ނޫން ކަމަށާއި އޭނާގެ ފޯކަސް މިވަގުތު ހުރީ މި ސަރުކާރު ހަމަ މަގަށް އެޅުވުމަށާއި 2026 ގައި އޮންނަ ލޯކަލް ކައުންސިލް އިންތިހާބު އެމްޑީޕީ އަށް ކާމިޔާބުކޮށްދިނުމަށް ކަމަށެވެ.
ޝާހިދު ވިދާޅުވީ މާ ފަހުން އޮތް އިންތިހާބެއްގެ ވާހަކަ ދައްކަން ހަދައިގެން އަމާޒު ކައްސާލައިގެން ގޮސް ލަނޑު ލިބޭ ތަން ފެންނަން އެބަހުރި ކަމަށެވެ. އަދި މީގެކުރިން ވެސް ދެ އިންތިހާބެއް އެމްޑީޕީ އަށް ގެއްލިގެން ގޮސްފައިވާ ކަމަށާއި މާ ދުރުގައި އޮންނަ ކަމަކަށް މަސްއޫލުވެވިގެން ގޮސް، ހަގީގަތުގައި އަޅަންވީ ފިޔަވަޅު އޮޅޭގޮތް ވަމުންދާ ކަމަށްވެސް ޝާހިދު ވިދާޅުވި އެވެ.
ރާއްޖޭގެ ރައްޔިތުންގެ އުއްމީދު ގުޅިފައި އޮތީ އެމްޑީޕީއާ ކަމަށާއި އެމްޑީޕީގެ އާންމު މެމްބަރުން ވެސް މިވަގުތު ބޭނުން ވަނީ ރާއްޖެ ހަމަ މަގަށް އެޅުވުމަށް ކަމަށްވެސް ޝާހިދު ވިދާޅުވި އެވެ.
