ޕީޕަލްސް ނެޝަނަލް ކޮންގްރެސް، ޕީއެންސީގެ އެތެރޭގެ މަޤާމުތަކަށް އިންތިޚާބުކުރެވުނު މެންބަރުންނާއެކު ކުރިއަށް އޮތްތަނުގައި އެޕާޓީގެ ހިންގުން ވަރުގަދަކުރައްވާނެކަމަށް އެ ޕާޓީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. ޢަބްދުއްރަޙީމް މިހެން ވިދާޅުވީ ޕީއެންސީގެ އެތެރޭގެ އިންތިޚާބާ ބެހޭގޮތުން މަޢުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުންނެވެ.
މިހާތަނަށް ރާއްޖޭގެ ސިޔާސީ ޕާޓީއަކުން ބާއްވާފައިވާ އެންމެ ބޮޑު ޕާޓީގެ އެތެރޭގެ އިންތިޚާބު ޕީއެންސީން ވަނީ ބާއްވާފައެވެ. މި އިންތިޚާބުގައި ވަނީ ދާއިރާތަކުގެ ރައީސުންނާއި ނައިބު ރައީސުންގެ މަޤާމަށް މީހުން އައްޔަންކޮށްފައިވެއެވެ. އަދި ރަށްރަށުގެ ޒުވާނުންނާއި އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުންވެސް ވަނީ އިންތިޚާބުކޮށްފައެވެ. މިއާއެކު ޖުމްލަ 1،984 މަޤާމަށް މީހުން އިންތިޚާބުކޮށްފައިވެއެވެ.
ޕީއެންސީގެ އެތެރޭގެ އިންތިޚާބުގެ މަޢުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ޕީއެންސީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ ޕާޓީގެ ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިރުޝާދުތަކެއް ދެއްވި ކަމަށެވެ. އެގޮތުން ރައީސްގެ އިރުޝާދުތަކާއެކު އެންމެ މުހިންމުކަމަކަށް ފެނުނީ ޕާޓީގެ އެކި މަޤާމުތަކަށް މީހުން އިންތިޚާބުކޮށް، ސްޓިއަރިން ކޮމިޓީތައް ރަށްރަށުގައި އެކުލަވާލުންކަމަށް ޢަބްދުއްރަޙީމް ވިދާޅުވިއެވެ.
ޕީއެންސީގެ ޗެއަރޕާސަން ވިދާޅުވީ މިހާރު ރާއްޖޭގައި މީހުން ދިރިއުޅޭ ކޮންމެ ރަށެއްގައި ޕީއެންސީގެ ސްޓިއަރިން ކޮމިޓީއެއް އޮންނާނެ ކަމަށާއި، ޒުވާނުންނާއި އަންހެނުންގެ ހަރަކާތުގެ ރައީސެއް ހުންނާނެ ކަމަށެވެ. މިއާއެކު މަޤާމުތަކަށް އިންތިޚާބުކުރެވުނު މެންބަރުންނާއެކު ކުރިއަށް އޮތްތަނުގައި އެޕާޓީގެ ހިންގުން އިތުރަށް ވަރުގަދަކުރައްވާނެ ކަމަށް ޢަބްދުއްރަޙީމް ވިދާޅުވިއެވެ.
”ޕާޓީގެ އެހެން ހަރަކާތްތައް ވަރުގަދަކުރުން ޕާޓީ ހިންގާގޮތާއި ޕާޓީގެ ކަންކަން ރާވާއި އިންތިޒާމްކުރާ ގޮތް ވާދަވެރިންނަށް ދަސްކޮށްދޭނަން.“ ޢަބްދުއްރަޙީމް ވިދާޅުވިއެވެ.
ޕީއެންސީގެ އަމާޒަކީ މިވަގުތު ރާއްޖޭގައި އޮތް އެންމެ ބޮޑު ޕާޓީއަށްވުމެވެ. އެގޮތުން އެޕާޓީއަށް މެންބަރުން އިތުރުކުރުމަށް މުޅި ރާއްޖޭގައި އަންނަނީ ހަރަކާތްތައް ހިންގަމުންނެވެ.
