ނަމޫނާ އިޤްތިޞާދެއް ބިނާކުރުމަށް އެންމެ ކުދި އަދި މެދުފަންތީގެ ވިޔަފާރިތައް ކުރިއަރުވައި، އެފަދަ ވިޔަފާރިވެރިންގެ ޤާބިލުކަން އިތުރުކުރުމަށް އެންމެން ގުޅިގެން މަސައްކަތްކުރުމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަތީފް އިލްތިމާސްކުރައްވައިފިއެވެ.
ރައީސުލްޖުމްހޫރިއްޔާގެ ނައިބު މިކަމަށް އިލްތިމާސްކުރެއްވީ ކުދި އަދި މެދުފަންތީގެ ވިޔަފާރިތަކުގެ ކާމިޔާބީތައް ޤައުމީ ފެންވަރުގައި ފާހަގަކޮށް އެފަރާތްތަކުގެ އަގުވަޒަންކުރުމަށްދޭ އެވޯޑު އިފްތިތާހުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
އިޤްތިޞާދީ ތަރައްޤީގައި އެންމެ ކުދި އަދި މެދުފަންތީގެ ވިޔަފާރިތަކުގެ ދައުރު ބޮޑުކަން ފާހަގަކުރައްވަމުން ނައިބު ރައީސް ވިދާޅުވީ އެންމެ ކުދި އަދި މެދުފަންތީގެ ވިޔަފާރިތަކަކީ ރާއްޖޭގެ އިޤްތިޞާދުގެ ނާރެސްކަމަށެވެ. އަދި އެއީ، ވަޒީފާގެ ފުރުޞަތުތައް އުފެއްދުމާއި، އައު އީޖާދުތައް ކުރުމާއި، އިޤްތިޞާދީ ދުވެލި ހަލުވިކުރުމުގައި އެންމެ މުހިންމު ދައުރެއް އަދާކުރާ ވިޔަފާރިތައްކަމަށް އެމަނިކުފާޏު ވިދާޅުވިއެވެ.
މީގެ އިތުރުން އެފަދަ ވިޔަފާރިތައް ހިންގާ ވިޔަފާރިވެރިންނަކީ މުޖުތަމަޢުގެ ތަރައްގީއާއި، ދިރުމާއި، ކުރިއެރުމަށްޓަކައި ވަރަށް ބުރަ މަސައްކަތްތަކެއް ކޮށްދެއްވާ، ގައުމީ ތަރައްގީގައި ވަރަށް ބޮޑު ޤުރުބާނީއެއް ވެވަޑައިގަންނަވާ ޚިދުމަތްތެރީންތަކެއްކަމަށާއި އެންމެ ކުދި އަދި މެދުފަންތީގެ ވިޔަފާރިތައް ހިންގަވާ ވިޔަފާރިވެރީންގެ ހިތްވަރާއި، ކެރުންތެރިކަމާއި، އީޖާދީ ޚިޔާލުތަކަކީ ޤައުމުގެ އިޤްތިޞާދު ކުރިއަރުވާ ބާރުކަމުގައި ދެކެވަޑައިގަންނަވާކަމަށް އެމަނިކުފާނު ވިދާޅުވިއެވެ.
”ނަމޫނާ އިޤްތިޞާދެއް ބިނާކުރުމުގައި އެންމެ ކުދި އަދި މެދުފަންތީގެ ވިޔަފާރިތަކުގެ ދައުރުގެ މުހިންމުކަން މިހާރަށް ވުރެ ވެސް ބޮޑަށް ދެނެގަނެ، މި ވިޔަފާރިތައް ކުރިއަރުވައި، ވިޔަފާރިވެރީންގެ ޤާބިލުކަން އިތުރުކޮށްދެއްވުމަކީ އަޅުގަނޑުމެން އެންމެންގެ ވެސް ޒިންމާއެއް. އެހެންކަމުން، އަޅުގަނޑުމެންގެ އިޤްތިޞާދު އިތުރަށް ކުރިއަރުވަން އެންމެން ގުޅިގެން މަސައްކަތްކުރުމަށް އަޅުގަނޑު އިލްތިމާސްކުރަން“ ރައީސުލްޖުމްހޫރިއްޔާގެ ނާއިބު ވިދާޅުވިއެވެ.
21 ވަނަ ޤަރުނުގައި، ދެކެމުން މި އަންނަނީ ފަންނިއްޔާތުގެ އައު ކަންކަމާއި، ޑިޖިޓަލް މާކެޓުތަކާއި، ބައިނަލްއަގުވާމީ ވިޔަފާރީގެ ފަހި ފުރުޞަތުތައްކަމަށާއި އެ ދާއިރާތަކުން ފަހި ނަތީޖާ ހާސިލްކޮށް ފުރިހަމަ ކާމިޔާބަށް ވާސިލުވުމަށް ދިވެހި ވިޔަފާރިވެރިން އެފަދަ ހުނަރުތަކާއި އުކުޅުތައް ދަސްކޮށް އޭގެ ބޭނުން ހިފުމުގެ މުހިއްމުކަންވެސް ނައިބު ރައީސް ވަނީ ފާހަގަކުރައްވާފައެވެ.
މި މަހުގެ 17 ވަނަ ދުވަހަކީ އަދުގެ ސަރުކާރަށް އެއް އަހަރު ފުރުނު ތާރީޚީ ދުވަސްކަން ފާހަގަކުރައްވައި ވާހަކަފުޅުދައްކަވަމުން ނައިބު ރައީސް ވިދާޅޫވީ ވޭތުވެދިޔަ 52 ހަފްތާއަކީ ދިވެހިރާއްޖެއަށް އެކި ރޮނގުތަކުން ކުރިއެރުމާއި، ތަރައްގީގެ ކާމިޔާބީތައް ހާސިލުވި ދުވަސްތަކެއްކަމަށެވެ.
އެހެންކަމުން ދިވެހިރާއްޖޭގެ ތަރައްގީއާއި، ތަހުޒީބަށްޓަކައި ރައީސުލްޖުމުހޫރިއްޔާ ޑރ. މުޙައްމަދު މުޢިއްޒަ ކުރައްވާ އިޚްލާޞްތެރި މަސައްކަތްޕުޅުތައް ފާހަގަކުރައްވައި އެމަނިކުފާނުވަނީ ޝުކުރު ދަންނަވާފައެވެ. ހަމައެއާއެކު، ރައީސުލްޖުމްހޫރިއްޔާގެ އިޤްތިސާދީ ތަސައްވަރު ހަގީގަތަކަށް ހައްދަވަން އިޤްތިސާދާ ބެހޭ ވަޒީރު މުޙައްމަދު ސަޢީދު ކުރައްވަނީ މާނަހުރި މަސައްކަތްޕުޅުތަކެއްކަން ނައިބު ރައީސް ވަނީ ފާހަގަކުރައްވާފައެވެ.
އެންމެ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް އަދިވެސް އިތުރު މަސައްކަތްތަކެއް ކުރަންޖެހޭކަން ފާހަގަކުރައްވަމުން ރައީސުލްޖުމްހޫރިއްޔާގެ ނާއިބު ވިދާޅުވީ އެކަމުގައި މާލީ އެހީތެރިކަމާއި، ފަންނީ ތަމްރީނުތަކާއި، ޤާނޫނީ ލުއިތައް ދިނުމަކީ މުހިންމު ކަމެއްކަމަށެވެ.
ކުދި އަދި މެދުފަންތީގެ ވިޔަފާރިތަކުގެ ކާމިޔާބީތައް ޤައުމީ ފެންވަރުގައި ފާހަގަކޮށް އެފަރާތްތަކުގެ އަގުވަޒަންކުރުމަށް ތައާރަފްކުރި އެވޯޑަކީ އެފަދަ ވިޔަފާރިތައް ކުރިއަރަން އެޅުނު ހަރުދަނާ ފިޔަވަޅެއްކަމަށާއި އޭގެ ސަބަބުން ރާއްޖޭގެ އެންމެ ކުދި އަދި މެދުފަންތީގެ ވިޔަފާރިތައް ތަރައްގީކޮށް، އީޖާދީ އިޤުތިޞާދަށް ދިރުން ގެންނައުމަށް ބީސީސީން ކުރާ ބުރަ މަސައްކަތް ނާއިބު ރައީސް ވަނީ ފާހަގަކުރައްވާފައެވެ.
