ރައްޔިތުންގެ މަޖިލީހަށް އިންތިހާބުވި ޕާޓީ ބަދަލުކުރުމުން މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހަކީ ރައްޔިތުންގެ ބާރު ގެއްލޭ ގޮތަށް ގެނެސްފައިވާ އިސްލާހެއް ކަމަށް ކުރީގެ އުއްތަމަފަނޑިޔާރު ޑރ.އަހްމަދު އަބްދުﷲ ދީދީ (ޑރ. ޑީޑީ) ވިދާޅުވެއްޖެ އެވެ.
ގާނޫނު އަސާސީ އަށް އިސްލާހު ގެނައުމުގެ ބިލު ސަރުކާރުގެ ފަރާތުން މަޖިލީހަށް އިއްޔެ ހެނދުނު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. މި ބިލުގެ މަސައްކަތް އެންމެ ހަތަރު ގަޑިއިރުތެރޭ މަޖިލީހުން ވަނީ ނިންމާފަ އެވެ. އަދި މި ބިލު ރޭގެ ވަގުތެއްގައި ރައީސް ވަނީ ތަސްދީގު ކުރައްވާފަ އެވެ.
ޑރ. ޑީޑީ ވިދާޅުވި ގޮތުގައި ގާނޫނުއަސާސީއަށް ގެނައި އިސްލާހުގެ ތެރެއިން އެންޓި ޑިފެކްޝަނާ ގުޅޭ ނައްސުތަކަކީ ގާނޫނުއަސާސީގެ ހަތަރުވަނަ މާއްދާގައި ކަށަވަރުކޮށްދީފައިވާ ރައްޔިތުންގެ ބާރު ނުވަތަ ރައްޔިތުންގެ ސިޔާދަތު ގެއްލޭ ގޮތަށް ފަރުމާކޮށްފައިވާ ނައްސުތަކެއް ކަމަށެވެ.
”ރައްޔިތުންގެ ސިޔާދަތުގެ މަބްދައަކީ ހަގީގަތުގައި އެ މަބްދައާ ހިލާފަށް ގާނޫނުއަސާސީއަށް ވެސް ބަދަލު ނުގެނެވޭނޭ ”ސޫޕްރާ ކޮންސްޓިޓިއުޝަނަލް“ (supra constitutional) ޕްރިންސިޕަލް އެއްކަމުން، އެ މަބްދައާ ތަޢާރުޟުވާގޮތަށް ގާނޫނުއަސާސީ އިސްލާހުކުރުމުގައި ކަނޑައެޅޭ ކޮންމެ ނައްސަކކީ އެއަށް ”ކޮންސްޓިޓިއުޝަނަލް ލެޖިޓިމެސީ“ ލިބިގެންވާ ނައްޞެއްކަމުގައި ނުބެލެވޭނެ،“ ޑރ. ޑީޑީ ވިދާޅުވި އެވެ.
އެންޓި-ޑިފެކްޝަން ގާނޫނުތަކަކީ ކުރިއަރާފައިވާ ގިނަ ޑިމޮކްރަސީތަކުގައި ބަލައިގަންނަ އެއްޗެއް ނޫންކަމާއި، އެފަދަ ގާނޫނުތައް ހުންނަނީ ބަރުލަމާނީ ނުވަތަ ސެމި ބަރުލަމާނީ ނިޒާމުތަކުގައި ކަމަށް ވިދާޅުވި އެވެ. އަދި ރާއްޖެ ފަދަ ރިޔާސީ ނިޒާމެއްގައި ސަރުކާރު އުފަންވަނީ ރައްޔިތުންގެ މަޖިލީހުން ކަމުގައި ނުވާއިރު، ރައްޔިތުންގެ މަޖިލީހުގެ މެޖޯރިޓީއާއި ސަރުކާރުގެ ވުޖޫދާއި އަދި ދެމިއޮތުމާ ދެމެދު އޮންނަންޖެހޭ އެއްވެސް ދުސްތޫރީ ގުޅުމެއް ނެތް ކަމަށްވެސް ވިދާޅުވި އެވެ.
”ދިވެހިރާއްޖޭގައި ”އެންޓި ޑިފެކްޝަން“ ގެ އުޞޫލުތަކެއް -މިގެނެވުނު ދުސްތޫރީ އިޞްލާޙުގައި ބަޔާންކުރެވިފައިވާ ގޮތަށް- ކަނޑައެޅިގެން ދިއުމުން، ރައްޔިތުންގެ މަޖިލީހަކީ އެމަޖިލީހާ ޤާނޫނުއަސާސީން މަތިކޮށްފައިވާ އިޚްތިޞާޞްތައް ފުރިހަމަޔަށް އަދާކުރާ ބާރެއްގެ ގޮތުގައި އޮންނަ އޮތުން ނިމުމަކަށް އައިސް، އެ މަޖިލިސް“ޑިސްފަންކްޝަނަލް“ ބާރަކަށް ބަދަލުވެގެން ދިއުމުގެ އިޙުތިމާލު ވަރަށްވެސް ބޮޑު،“ ޑރ. ޑީޑީ ވިދާޅުވި އެވެ.
މީގެއިތުރުން އާންމު އުސޫލުތަކާ ހިލާފަށް ގާނޫނުއަސާސީއަށް އިސްލާހު ގެނައުމަކީ ތަހުޒީބު މުޖުތަމައެއްގައި ކަންކަން ހިނގައިވާނެ ގޮތެއް ނޫންް ކަމަށާއ. އަދި އިއްޔެ އެ އިސްލާހުތައް ބެސްޓް ޕްރެކްޓިސްއާ ހިލާފަށް އަވަސް އަރުވާލައިގެން އެއް ދުވަސް ތެރޭ ބަހުސް ނިންމައި އިސްލާހު ގެނައުމަކީ ނޭދެވޭ ނުފޫޒުފައި ޖެހުން ފިޔަަވައި އެހެން އެއްވެސް ޒަރޫރުތެއް އޮވެގެން ކަމަށް ގަބޫލުނުކުރެއްވޭ ކަމަށްވެސް ވިދާޅުވި އެވެ.
ޑރ. ޑީޑީ ވަނީ ރައްޔިތުންގެ ބާރުވެރިކަން އިތުރުކޮށް ޑައިރެކްޓް ޑިމޮކްރަސީގެ އުސޫލުތައް އިތުރުކުރުމަށް ރައްޔިތުންގެ ބާރު ކަށަވަރުކުރުމުގެ ގޮތުން ”ރިކޯލް ރިފަރަންޑަމް“ ދާއިރާތަކުގެ ރައްޔިތުންނަށް ލިބިދޭނެ އިސްލާހެއް ގާނޫނު އަސާސީއަށް ގެނައުން މުހިއްމު ކަމަށްވެސް ވިދާޅުވެފަ އެވެ.
