މަސްވެރިންނަށް ނުދެވި ހުރި ފައިސާ އަންނަ ހަފްތާގެ ކުރީ ކޮޅު ދިނުމަށް މަސައްކަތް ކުރަމުންދާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފި އެވެ.
މިފްކޯއިން މީޑިއާތަކަށް ފޮނުވި މެސެޖެއްގައި ބުނެފައިވަނީ އަންނަ ހަފްތާގެ ކުރީ ކޮޅު މަސްވެރިންނަށް ދޭން ޖެހޭ ފައިސާ ދިނުމަށް މަސައްކަތް ކުރަމުން އަންނަ ކަމަށެވެ.
މިހާތަނަށް އައި އިރު މަސްވެރިންނަށް ނުދެވި ހުރީ 32 މިލިއަން ރުފިޔާކަމަށްވެސް މިފްކޯގެ މެސެޖުގައި ބުނެފައިވެ އެވެ.
މިފްކޯއިން ބުނީ އަދި ސީދާ ވަކި ދުވަހެއް ޔަގީން ނުވާ ކަމަށާއި މަސްވެރިންނަށް ފައިސާ ދޭ ދުވަސް ޔަގީންވުމުން މީޑިއާތަކާ ހިއްސާ ކުރާނެ ކަމަށެވެ.
މަސްވެރިން ބާނާ މަހަށް 48 ގަޑި އިރު ތެރޭ ފައިސާ ދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ. އެ ވައުދުފުޅާ އެއްގޮތަށް 48 ގަޑިއިރުތެރޭގައި މަސްވެރިންނަށް ފައިސާ ދޫކުރާނެ ނިޒާމެއް ޤާއިމްކުރުމުގައި މަސައްކަތް ކުރައްވަމުން އަންނަ ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފަ އެވެ.
ފިޝަރީޒް މިނިސްޓަރު އަހުމަދު ޝިޔާމްވެސް ވަނީ މަސްވެރިންނަށް 48 ގަޑިއިރު ތެރޭ ފައިސާ ދިނުމަކީ ރައީސް ޑރ. މުހައްމަދު މުއިއްޒު ވެލައްވާފައިވާ ވައުދެއް ކަމަށާއި، އެ ވައުދަށް ނުފިއްލަވާނެކަމަށް ވިދާޅުވެފަ އެވެ.
