އާސަންދަ ސްކީމްގެ ދަށުން އެންމެ ގިނައިން ދޫކުރެވޭ 250 ބޭހުގެ އަގަށް ގެނައި ބަދަލާ އެކު، ޕްރައިވެޓް ސެކްޓާގެ އެއްބާރުލުން ދޭ ކަމަށާއި އަގާ މެދު ހިޔާލު ތަފާތުވުން އުޅެނީ މަދު ބޭހެއްގެ ކަަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯ ހީނާ ވަލީދު ވިދާޅުވެއްޖެއެވެ.
ސަރުކާރުން ބޭހުގެ އަގު ކޮންޓްރޯލްކޮށް އާސަންދަ ރިޕޯމްކުރުމަށް ކުރާ މަސައްކަތުގެ ތެރެއިން، އާސަންދަ ސްކީމްގެ ދަށުން އެންމެ ގިނައިން ދޫކުރެވޭ 250 ބޭހެއްގެ އަގަށް ބަދަލުގެނައުމަށް ނިންމާފައިވަނީ މިދިޔަ މަހުގެ 27 ގައެވެ.
އާސަންދައިގެ ޚިދުމަތްތަކުގެ އަގުތަކާއި، އެ ސްކީމްގެ ދަށުން ދޫކުރެވޭ ބޭހުގެ އަގުތަކާ ގުޅޭގޮތުން އަންގާރަ ދުވަހު ރައްޔިތުންގެ މަޖިލީހުގެ އިޖުތިމާއީ ކޮމިޓީއަށް ހާޒިރުވެވަޑައިގެން ހީނާ ވިދާޅުވީ، ބޭހުގެ އަގު ދުނިޔޭގެ އެހެން ގައުމުތަކާ އަޅާ ބަލާއިރު ރާއްޖޭގައި މި ހުރީ 15 ގުނަ މަތީގައި ކަމަށެވެ. ރައްޔިތުންނަށް އަތް ނުފޯރާ ފަށުގައި ބޭހުގެ އަގުތައް ހުންނައިރު އެއީ ދައުލަތަކަށް ވެސް ނުކުޅަދާނަ ކަމެއް ކަމަށް ހީނާ ވިދާޅުވިއެވެ.
އެ ކަމަށް ހައްލު ގެނައުމަށް ސަރުކާރުން ބޭހުގެ ބަލްކް ޕްރޮކިއުމަންޓް ނިޒާމުގެ ދަށުން އާންމުކޮށް ދިވެހީން ބޭނުންކުރާ ބޭސްތައް އަގުހެޔޮކޮށް ފޯރުކޮށްދިނުމުގެ މަސައްކަތް މިހާރު ވަނީ ފަށާފައެވެ. އެގޮތުން، ކުޑަ އަގެއްގައި މިހާތަނަށް 10 ބޭހެއް ގެނެސް ފާމަސީތަކުން ލިބެން އެބަހުއްޓެވެ.
މި ފަހުން އަގު ކުޑަކުރި 250 ބޭހުގެ ތެރެއިން އަގު މުރާޖައާ ކުރެވިފައިވާ 87 ބޭސް މި ހިނގާ ނޮވެމްބަރު އެކަކުން ފެށިގެން ވަނީ އަގު ކުޑަކޮށްފައެވެ. ބާކީ 126 ބޭހެއްގެ އަގަށް މި މަހު 24 އިން ފެށިގެން ބަދަލު ގެންނާނެ ކަމަށް ސަރުކާރުން މީގެ ކުރިން ބުންޏެވެ.
”އަޅުގަނޑުމެން މި އަންގަނީ ޕްރައިވެޓް ސެކްޓާތަކަށް ވެސް މި އަގުގައި ބޭސް ވިއްކަވާށޭ. އަދިވެސް އެބަ ފާހަގަކުރެވޭ ބައެއް ފަރާތްތަކުން މި އަގުގައި ވިއްކުމަށް އިއުތިރާޒު ކުރަމުންދާތަން. އެހެންނަމަވެސް، އާސަންދަ މެދުވެރިކޮށް މި ބޭސްތައް އެސްޓީއޯގެ ހުރިހާ ފާމަސީތަކުން ލިބެން ހުންނާނެ“. ،އެންސްޕާގެ ސީއީއޯ ހީނާ ވަލީދު
ޕްރައިވެޓް ސެކްޓާގައި ބޭސް ވިއްކާ ގިނަ ފަރާތްތަކުން އެ އަގުތަކަށް ބޭސް ވިއްކި ނަމަވެސް، އަދިވެސް އެ އަގުގައި ވިއްކަން ދެކޮޅު ހަދާ ބަޔަކު ތިބިކަން ހީނާ ފާހަގަކުރެއްވިއެވެ. ހީނާ އެދިވަޑައިގަތީ އެ ފަރާތްތަކުން ވެސް އެ އަގުގައި ބޭސް ވިއްކުމަށެވެ.
އެހެންނަމަވެސް، ގިނަ ބޭސްތައް އަމިއްލަ ފަރާތްތަކުން ވެސް ހެޔޮ އަގުގައި ވިއްކާ ކަމަށް އޭނާ ވިދާޅުވިއެވެ.
އޭނާ ވިދާޅުވީ، މިހާތަނަށް އާސަންދައަކީ ސިޔާސީ މަންފާއަށް އަދި ވިޔަފާރީގެ ބޭނުމަށް މަންފާ ހޯދުމަށް ބޭނުންކުރި ނިޒާމެއް ކަމަށެވެ. ނަމަވެސް، މި ސަރުކާރުން އެ ކަންކަން އިސްލާހުކުރައްވާނެކަމުގެ ޔަގީންކަން އޭނާ ދެއްވިއެވެ.
”އަޅުގަނޑުމެންގެ މަގުސަދަކީ އެގޮތަށް ނާޖާއިޒު ފައިދާ ނެގެންހުރި ހުރިހާ ދޮރުތަކެއް ބަންދުކުރުން. އަޅުގަނޑުމެން މަސައްކަތްކުރަމުންދާގޮތުން އިރާދަކުރެއްވިއްޔާ މި ސަރުކާރުން އެ ދޮރުތައް ބަންދުކުރާނެ. އޭގެ އެންމެ ހައްގުވެރި ފަރާތްތަކަށް އޭގެ އެންމެ ހައްގުވެރިގޮތުގައި ލިބެންޖެހޭނެ ނިޒާމެއް އެއީ،“. އެންސްޕާގެ ސީއީއޯ ހީނާ ވަލީދު
ހީނާ މީގެ ކުރިން ވިދާޅުވީ، ބޭހުގެ އަގަށް ގެނައި އެ ބަދަލާ އެކު 220 މިލިއަން ރުފިޔާ ސަލާމަތްކުރެވޭނެ ކަމަށެވެ.
އާސަންދައިގެ ނިޒާމު އޮންނަ ގޮތަށް އަބަދު ވެސް ފާޑުކިޔުން އަމާޒުވެއެވެ. މި ސަރުކާރުން ވަނީ އާސަންދް ރިފޯމްކުރުމުގެ މަސައްކަތްތައް ފަށައިފައެވެ. އެގޮތުން، މިހާރު އާސަންދަ ދޫކުރާނީ ޕްރައިވެޓް އިންޝުއަރެންސުން ކެނޑުމަށް ފަހުއެވެ.
