މި ސަރުކާރަށް އުއްމީދެއް، އަމާޒެއް ނެތް ކަމަށާއި އެއް އަހަރު ވީއިރު، ގައުމުގެ ރައްޔިތުން މިވަނީ މާޔޫސްކަމެއްގެ ތެރެއަށް ވައްޓާލާފައި ކަމަށް ކުރީގެ ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
މީޑިއާ އާއި ވާހަކަދައްކަމުން ރައީސް ޞާަލަިހު ވިދާޅުވީ ސަރުކާރަށް އެއް އަހަރުވެގެންދިޔައިރު ރައްޔިތުން މާޔޫސްކަމެއްގެ ތެރެއަށް ވައްޓާލާފައިވާ ކަމަށާއި ރައްޔިތުން ތިބީ ބިރުވެރިކަމެއްގެ ތެރޭގައި ކަމަށެވެ.
އަދި ވެރިކަމާ ހަވާލުވެވަޑައިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެންމެ ފުރަތަމަ ފެއްޓެވި އެއް ކަމަކީ ނޫސްވެރިކަމާއި ދެކޮޅަށް ފެށި މަސައްކަތް ކަމަށް ރައީސް ސޯލިހް ވިދާޅުވި އެވެ. އެގޮތުން ސަރުކާރުގެ ބާރުގެ ދަށަށް ނޫސްވެރިކަން ގެނައުމަށްޓަކައި ގާނޫނީ ގޮތުން އެ ބާރު ނެންގެވުމަށްޓަކައި މަޖިލީހަށް ބިލެއް ވެސް ވަނީ ހުށަހަޅުއްވާފައިކަމަށް ރައީސް ސޯލިހް ވިދާޅުވި އެވެ.
އަދި އެ ބިލް ގާނޫނަކަށްވުމުން އުފައްދާ ކޮމިޝަންގެ މެޖޯރިޓީއަކީ ރައީސުލްޖުމްހޫރިއްޔާ އައްޔަންކުރައްވާ ބޭފުޅުން ގޮތުގައި ބިލްގައި އޮތްކަން ރައީސް ސޯލިހް ފާހަގަކުރެއްވި އެވެ. ޞާލިހު ވިދާޅުވީ އެ ކޮމިޝަނަށް މީޑިއާއަކާ ބެހޭ ގޮތުން ކަމެއް ފާހަގަކުރެވިއްޖެނަމަ އެކަމެއް ބަލައި ނިމެންދެން މުޅި މީޑިއާ ސަސްޕެންޑްކޮށްފައިވެސް އެބަ އޮންނަކަމަށާއި މިއީ ޑިމޮކްރަސީއެއްގައި އެޅޭނެ އެންމެ ނުރައްކާތެރި އެއް ފިޔަވަޅުކަމަށެވެ.
ރައީސް ސޯލިހް ވިދާޅުވީ ސަރުކާރުން މަސްވެރިންނަށް ވިވައުދުތައް ވެސް ނުފުއްދޭ ކަމަށާއި މިއީ ރާއްޖޭގެ ތާރީހުގައި މަސްވެރިން އެންމެ ހާލުގައި ޖެހިފައިވާ ދުވަސްވަރު ކަމަށެވެ.
އަދި ސަރުކާރުން ވައުދުވީ 20 ރުފިޔާއަށްވުރެ ބޮޑު އަގުގައި މަސްގަނެ، 48 ގަޑިއިރުގެ ތެރޭގައި މަސްވެރިންނަށް ފައިސާ ދީ ޑޮލަރުން އާމްދަނީ ލިބޭނެ ގޮތް ހެދުމަށް ކަމަށް ރައީސް ސޯލިހް ވިދާޅުވި އެވެ.
ރައީސް ސޯލިހް ވަނީ ރައްޔިތުން ސިއްހީ ފަރުވާއަށް ސަލާންޖަހަން ޖެހިފައިވާ ކަމަށްވެސް ވިދާޅުވެފަ އެވެ.
ސަރުކާރުގެ ސިޔާސަތުގެ އަމާޒު ހުރީ ނާއުންމީދުކޮށް ކަމަށާއި ވައުދުތައް ނުފުއްދޭއިރު ސަރުކާރުން ދޮގު ހަދަމުންދާ ކަމަށް ރައީސް ސޯލިހް ވިދާޅުވި އެވެ.
