ސަރުކާރުގެ ހިލޭ ބޭސް ފަރުވާދޭ ނިޒާމު އާސަންދަ މެދުނުކެނޑޭނެކަން ޔަގީންކުރަން އިދިކޮޅު އެމްޑީޕީގެ ފަރާތުން މިއަދު ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަންނަން ރިޔާސަތުން ނިންމަވައިފިއެވެ.
އާސަންދައާ ގުޅޭ ކުއްލި މައްސަލަ ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމެވެ.
އެ ކުއްލި މައްސަލައިގައި ބުނެފައިވަނީ 2011 ވަނަ އަހަރު އާސަންދަ ތައާރަފުކުރީއްސުރެ އެ ސްކީމް ހިންގާފައިވަނީ ދައުލަތުގެ މާލިއްޔާއިން ޚަރަދުކޮށްގެން ކަމަށެވެ. އެކަމަކު، ބައެއް ކްލިނިކްތަކާއި ހޮސްޕިޓަލްތަކުން އާސަންދައަށް ޚިދުމަތް ދިނުން ހުއްޓާލައި ކަމަށް އެ މައްސަލައިގައި ވަނީ ފާހަގަކޮށްފައެވެ.
އެހެންވެ، ބޭސްފަރުވާއާއި ބޭހުގެ ކަންކަމަށް ރައްޔިތުން އަމިއްލައަށް ޚަރަދުކުރަންޖެހޭ ކަމުގެ ކަންބޮޑުވުން އިތުރުވާ ކަމަށް އެ މައްސަލައިގައިވަނީ ބުނެފަައެވެ.
މެންބަރު މުހައްމަދު އިބްރާހިމް ކުއްލި މައްސަލައެއް ހުށަހެޅުއްވީ އާސަންދަ މެދުނުކެނޑޭނެކަން ކަށަވަރުކޮށް، މި މައްސަލަ ސަރުކާރުގެ ސަމާލުކަމަށް ގެނައުމަށެވެ. އެކަމަކު، އެ މައްސަލައިގައި ވެސް ކުއްލި މައްސަލައެއްގެ ޝަރުތު ހަމަނުވާ ކަމަށް ވިދާޅުވެ، މަޖިލީހުގެ ރައީސް އަބްދުއްރަޙީމް އަބްދުﷲ ވަނީ އެ މައްސަލަ ބޭރުކޮށްލަން ނިންމަވައިފައެވެ.
އިދޮޅު އެމްޑީޕީން ހުށަހެޅި މި ކުއްލި މައްސަލައާއި ގުޅޭގޮތުން މަޖިލިސް ރައީސް އަބްދުއްރަހީމް އަންދުﷲ ވިދާޅުވީ ކުއްލި މައްސަލައެއްގެ ގޮތުގައި ހުށަހަޅާ މައްސަލައެއްގައި ބަޔާންކުރާ ކަންކަން ވާންވާނީ ކުއްލިއަކަށް ހިނގައިގެން އުޅޭ ކަމަކަށްކަމަށާއި އަދި، އެއީ ވޭތުވެގެންދިޔަ ހަތް ދުވަހުގެ ތެރޭގައި ހިނގާފައި އޮތް ކަމަކަށް ވެސް ވާންވާނޭކަމަށެވެ. ކަންމިހެން ހުރުމުން އެ ޝަރުތުތައް ހަމަނުވާތީ އެ މައްސަލަައަށް ވޯޓަށް އެހެން ނެތް ކަމަށް އެ މަނިކުފާނު ވިދާޅުވިއެވެ.
ފާހަގަކޮށްލެވޭ ގޮތުގައި މިއީ މި ގޮތަށް ވޯޓަށް ނާހައި ބޭރުކޮށްލި ދެވަނަ ކުއްލި މައްސަލައެވެ. އިޒްރޭލު ޕާސްޕޯޓު މަނާކުރުން ލަސްވާތީ، މެންބަރު މުހައްމަދު އިބްރާހިމް ކުރިން ހުށަހެޅުއްވި ކުއްލި މައްސަލަ ވެސް ބަލއި ނުގަނެ ވަނީ ބޭރުކޮށްލައިފައެވެ.
