މައިވަންތަ ކަމުގެ ކުލުނަކީ މާތްﷲ މަޚުލޫޤުންގެ ކިބައިގާ ލައްވާފައިވާ ޚާއްޞަ ސިފައެކެވެ. ދޫނި ސޫފާ ސޫފީއަށް ބެލިންތޯއެވެ. އެސޮރުމެން ހާލީގައި ބައިތިއްބާފައި މާދުރުން ކާބޯތަކެތި ގެނެސް ކުދި ދޫނިތަކަށް ކާން ދެއެވެ. ކުކުޅު އެސޮރުގެ ދަރި ފިޔޮއްތަށް ސިކާރަ ކުރުމަށް އަންނަ އެއްޗިއްސަ ހަމަލާ ދީ ފައްސާލުމަށް މަސައްކަތް ކުރެއެވެ. ވަލު ޖަނަވާރުތައް ނުރައްކާ ތަކުން ސަލާމަތް ކުރުމަށް މަސައްކަތް ”މަންމަ“ ކުރެއެވެ. މިއީ މާތް ﷲ އެފަދަ ޖަނަވާރުތަކުގައި ލައްވާފައިވާ ލޯތްބާއި ކުލުނެވެ.
އިންސާނާ އަކީ މާތްﷲ ޚަލްޤު ކުރެއްވި އެންމެ މާތް މަޚުލޫޤެވެ. ވީމާ އިންސާނުންގެ ހިތުގައި މައިވަންތަ ކުލުނާއި ލޯތްބަކީ ވެސް އަދި ވަކީން ޚާއްސަ ގުޅުމެކެވެ. ކުއްޖަކަށް ބަލިވެ އިނީއްސުރެ މައިމީހާ އުފުލާ ވޭނަކީ އަޖައިބު ކުރުވަނިވި ކަމެވެ. އެއްވެސް ޝަކުވާއެއް ނެތެވެ. ލޯބި ލޯބި ދަރިފުޅަށް އިންތިޒާރު ކުރެއެވެ. އިންސާނާ ކުޑަކުއްޖަކު ފަދައިން ދުނިޔެއަށް އުފަންވުމުން އެކުއްޖާ ބެލެހެއްޓުމަށްޓަކައި މައިންބަފައިން ޚާއްޞަކޮށް މައިން ވަނީ ކޮންފަދަ ޤުރުބާނީއެއް ތޯއެވެ. ދަރިފުޅު ބަލިވެއްޖެނަމަ އެދަރިފުޅު ބެލުމުގައި މަންމަ ހޭލަ ހުރެއެވެ. މީރު ކާބޯތަކެތި ހޯދާ އޭނާއަށް ތައްޔާރު ކޮށްދިނުމުގައި އަވަދި ނެތި އުޅެއެވެ. އޭނާ ކިޔަވާ މޮޅުމީހަކަށް ވުމަށް އެދެއެވެ. މީހަކަށް ދުނިޔޭގައި ލިބޭ ކާމިޔާބީއަށް އެއްވެސް މިންވަރެއްގެ ހަސަދަ ވެރި ކަމެއް ނެތި ފަޚުރުވެރި ވާނީ އޭނާގެ މައިން ބަފައިންނެވެ. ކޮންމެ މަންމަ އަކާއި ބައްޕައަކު އަބަދުވެސް އެދޭނީ އޭނާއަށް ވުރެ އޭނާގެ ދަރިން މޮޅުވެ ކިޔެވުމަށެވެ. މަތީ މަޤާމަށް ވާސިލްވުމަށެވެ. ދުވަހަކުވެސް ތިބާ ތިބާގެ މައިންބަފައިންނަށް ވުރެ އުމުރުން ދޮށީއެއް ނުވާނެއެވެ. ވީމާ މައިންބަފައިންނަށް ދުވަހަކުވެސް ދަރިން ބޮޑުވީ ކަމަކަށް ނުބަލައެވެ.
މިހުރިހާ ކަމެއް ހުރުމާއި އެކު މާތްވެގެންވާ އިސްލާމްދީނުގައި މައިންބައިފައިންނަށް އިޙްސާންތެރިވެ އެބައި މީހުންނަށް އަޅާލުމަށް އަންގަވާފައި ވެއެވެ. ﷲ ސުބުޙާނަހޫ ވަތަޢާލާއަށް އަޅުކަންކުމަށް ޢަމުރުކުރެއްވުމާއި ވިދިގެން، މައިންބަފައިންނަށް އިޙްސާންތެރިވުމަށް އަންގަވައި ކީރިތި ޤުރުއާނުގެ އަލްއިސްރާއު ސޫރަތުގެ 23 އަދި 24 އާޔަތުގައި އަމުރު ކުރައްވާފައި ވެއެވެ. މަންމަ އަށް ދެއްވާފައިވާ ޤަދަރު ވަކިންބޮޑެވެ. އަދި މައިންނަށް ވަކިންބޮޑަށް ހެޔޮކޮށް ހިތުމަށް މިއުންމަތުގެ نبي محمد صلى الله عليه وسلم ބާރު އަޅުއްވާފައި ވެއެވެ. އެންމެ ހެޔޮކޮށް ހިތަންވީ ކާކަށްތޯ ދެންނެވުމުން 3ފަހަރަށް އެކަލޭގެފާނު ހަދީޘް ކުރައްވާފައިވަނީ މަންމައަަށް ކަމަށެވެ. ހަތަރުވަނަ ފަހަރަށް ހަދީޘް ކުރެއްވި ބައްޕައަށް ކަމަށެވެ.
ނަމަވެސް ހިތާމަޔަކީ މިއަދު ގިނަމީހުނަށް ތިމާގެ މައިންބަފައިން މުސްކުޅިވީދުވަހު އެމީހުން ބެލުންވަނީ ބޮޑުބުރަޔަކަށް ވެފައެވެ. މައިންބަފައިން ބެލުންފިޔަވައި އެމީހުންގެ ޙާލުބަލައި ނުލާދަރިންވެސް މިޒަމާނުގައި ވަރަށް ގިނައެވެ. މިއީ މުޖުތަމަޢުގައި ކަންހިނގާގޮތެވެ. ގިނަކުދިން ތިމާމެންގެ މައިންބަފައިން ކިޔަވައިދީ ބޮޑުކޮށް، މަތީވަޒީފާތައް ލިބުމުން، މައިންބަފައިން މުސްކުޅިވީދުވަހު އެމީހުންނާއެކު މަގުމަތީ ހިނގަން ލަދުގަނެއެވެ. އެމީހުނާ އެއްތަށިމަތި ކެއުމަށް ފަސްޖެހެއެވެ. މިހިރީ އިސްލާމީ މުޖުތަމަޢުގައި ކަންހިނގައިގެންވާނެ ގޮތެއް ނޫނެވެ. ތިމާމެން ދުނިޔެއަށް ފޮނުއްވުމަށް މެދުވެރި ކުރެއްވި ފަރާތަށް އޯގާތެރިވާން ޖެހެއެވެ. މިހާރު އަޅުގަނޑުމެން ވޭތު ކުރަމުން ދަނީ ރަމްޟާން މަސް ކަމަށް ވުމާއި އެކު މައިންބަފައިންނަށް ހެޔޮކޮށް ހިތާ، ހެޔޮ ދުޢާ ކުރުމުގައި ދެމިތިބެން ވާނެއެވެ. މައިންބަފައިންގެ ހިތުގައި އޮންނަ ލޯތްބަކީ އެންމެ ވަރުގަދަ ލޯބިއެވެ. ދުވަހަކު ވަކިވުމެއް ނެތް ލޯތްބެކެވެ. އެއީ ފިތުރަތުން ލައްވާފައިވާ ލޯތްބެކެވެ.
