އިދިކޮޅު އެމްޑީޕީން ބުނާ ގޮތަށް ދައުލަތުގެ ބަޖެޓް ހަދައިފިނަމަ އެންމެ ދެމަސްތެރޭ ގައި މުޅި ގައުމު ބަނގުރޫޓުވާނެ ކަމަށް ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
ސުޖާއު މިފަދައިން ވިދާޅުވީ ވެރިކަން ކުރާ މައި ޕާޓީ ޕީއެންސީ އިން އަލަށް ފެށި ’ރައްޔިތުންގެ ސައްލާ‘ ގައި ހޯމަ ދުވަހުގެ ރޭ ވާހަކަދައްކަމުންނެވެ.
މިދިޔަ ހަފްތާގެ ބުރާސްފަތި ދުވަހު ސަރުކާރުން މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓާއި ގުޅުވައި ވާހަކަދައްކަމުން ސުޖާއު ވިދާޅުވީ އަންނަ އަހަރަށް ލަފާކުރާ ބަޖެޓް ތައްޔާރުކޮށްފައިވަނީ ވޯލްޑް ބޭންކާއި އައިއެމްއެފް ފަދަ ބޭރުގެ މާލީ އިދާރާތަކުން ދިން އިރުޝާދުތަކަށް ވަރަށް ބޮޑަށް ރިއާޔަތްކުރުމަށްފަހު ކަމަށެވެ.
އަދި ދައުލަތުގެ ބަޖެޓް ހަދާނެ ގޮތް އިދިކޮޅު އެމްޑީޕީން ކިޔާދޭން ނުޖެހޭ ކަމަށާއި އެމްޑީޕީން ދޭލަފަޔާއި އިރުޝާދާއި އެއްގޮތަށް ބަޖެޓު ހަދައިފި ނަމަ އެންމެ ދެމަސްދުވަހުގެ ތެރޭގައި މުޅި ގައުމު ބަނގުރޫޓުވެގެންދާނޭކަމަށެވެ.
”އެމްޑީޕީން އަޅުގަނޑުމެންނަށް ދައުލަތުގެ ބަޖެޓް ހަދާނެގޮތް ކިޔާދޭން ނޫޅުއްވާށޭ. ތިގޮތަށް ތިބޭފުޅުންގެ ލަފަޔާއި އިރުޝާދު ހޯދައިގެން އަޅުގަނޑުމެން ބަޖެޓް ހަދައިފިއްޔާ ކުރިޔަށް އޮތް ދެމަސްތެރޭ ބަނގުރޫޓުވާނެ މުޅި ގައުމު.“ ސިޖާއު ވިދާޅުވިއެވެ.
ކަންމިހެން އޮތް އިރު، އެމްޑީޕީން ދައުލަތުގެ ބަޖެޓް ތައްޔާރުކުރާނެ ގޮތް ޕީއެންސީއަކަށް ކިޔާދޭކަށް ނުޖެހޭނެކަމަށާއި އަދި އެމްޑީޕީން ދޭ ލަފަޔާއި އިރުޝާދުތަކުގެ ވާހަކަ އަޑެއްވެސް ނާހާނެ ކަމަށް ޝުޖާއު ވިދާޅުވި އެވެ.
އެމްޑީޕީ ސަރުކާރުން އާމްދަނީ އިތުރުކުރީ ޖީއެސްޓީ އާއި ޓީޖީއެސްޓީ އަދި ސްޓިކާ ޖެހުން ފަދަ ކަންކަން ކޮށްގެން ކަމަށާއި އަންނަ އަހަރުގެ ބަޖެޓު ހަދާފައިވަނީ، ރައީސް ޑރ މުހައްމަދު މުއިއްޒު، އެމަނިކުފާނުގެ އަމިއްލަފުޅު ވަގުތު ހޭދަކުރައްވައިގެން، އެމަނިކުފާނުގެ އަމިއްލަ އިސްނެންގެވުމާއެކު ކަމަށްވެސް ޝުޖާއު ވިދާޅުވި އެވެ.
