މި އަހަރުގެ ރަމަޟާން މަހާއި ގުޅިގެން ހުޅުމާލެ ސެންޓްރަލް ޕާކް ސަރަހައްދުގައި ކުރިއަށް ގެންދިޔުމަށް ހަމަޖެހިފައިވާ ރޯދަ ބާޒާރު ފެސްޓިވަލް އިން ސްޓޯލް ކުއްޔަށް ހިފުމަށް ޝައުގުވެރިވާ ފަރާތްތަކަށް، އަންނަ އާދިއްތަ ދުވަހުން ފެށިގެން ފޯމު ހުށަހެޅުމުގެ ފުރުޞަތު ހުޅުވާލާނެ ކަމަށް އެޗްޑީސީން ބުނެފިއެވެ.
އެޗްޑީސީން ކުރި އިއުލާނުގައި ބުނީ، ރޯދަ ބާޒާރު ފެސްޓިވަލް އިން ސްޓޯލް ކުއްޔަށް ނެގުމަށް އެދި ފޯމު ހުށަހެޅުމަށް ހުޅުވާލެވޭނީ އާދިއްތަ ދުވަހުގެ މެންދުރު 12:00 އިން ފެށިގެން 20 ޖަނަވަރީ ވާ އަންގާރަ ދުވަހުގެ މެންދުރު 12:00 ނިޔަލަށް ކަމަށެވެ.
އަދި އެ ކޯޕަރޭޝަނުގެ ވެބްސައިޓްގައި ޝާއިޢު ކުރެވިގެންދާ އޮންލައިން ލިންކް މެދުވެރިކޮށް ފޯމު ހުށަހަޅާ ފަރާތްތަކުގެ ތެރެއިން، ފަސްޓް ކަމް-ފަސްޓް ސާވް އުސޫލުން، ޝަރުތުހަމަވާ ފަރާތްތަކަށް ސްޓޯލް ހިންގުމަށް ކުއްޔަށް ދޫކުރެވޭނެ ކަމަށެވެ.
ފޯމު ހުށަހެޅުމާ ގުޅޭ އިތުރު މަޢުލޫމާތު މި އިޢުލާނާއެކު މި ކޯޕަރޭޝަންގެ ވެބްސައިޓް https://www.hdc.mv އަދި https://properties.hdc.mv/ ގައި ޝާޢިއުކޮށްފައިވާ މަޢުލޫމާތު ކަރުދާހުގައި ހިމެނިފައިވާނެ ކަމަށް އެޗްޑީސީން ބުނެއެވެ.
އަދި އިތުރު މަޢުލޫމާތު ސާފުކުރުމަށް މި ކޯޕަރޭޝަންގެ ނަންބަރު 1516 އަށް ގުޅުމަށް އެދިފައިވެއެވެ.
