މި ޒަމާނުގައި ހަޤީޤީ މިނިވަންކަން ލިބެން އޮތީ މާލީ ގޮތުން މިނިވަންވެގެން ކަމަށާއި، މިސަރުކާރުގެ އަމާޒަކީ ވެސް ހުރިހާ ދިވެހި ރައްޔިތުންނަށް އެކަން ހާސިލްކޮށް ދިނުން ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ސަރުކާރަށް ދެ އަހަރުވުމާ ގުޅިގެން ދައުލަތުގެ މީޑިއާ ޕީއެސްއެމްގައި މިނިސްޓަރު ވިދާޅުވީ ދިވެހިންނަކީ ހުރިހާ މާނައެއްގަ އިވެސް މިނިވަން ބައެއްގެ ގޮތުގައި ހެދުމަށް، މިނިވަން ރާއްޖެއެއް ދިވެހިންނަށް ހޯދައިދީ، ދިވެހިންނަކީ އިޤްތިސޯދީ ގޮތުން މިނިވަންބަޔަކަށް ހެދުމަކީ ރައީސް ޑރ. މުހައްމަދު މުޢިއްޒުގެ ވެސް އެންމެ ބޮޑު އެއް އަމާޒު ކަމަށެވެ.
”އަޅުގަނޑު ޤަބޫލުކުރަނީ މި ޒަމާނުގައި މިނިވަން ވެވޭނީ މާލީގޮތުން މިނިވަންވެވިގެން. އެހެންވީމަ އަޅުގަނޑުމެން، ރައީސް މުޢިއްޒުގެ އެންމެބޮޑު އެއް އަމާޒަކީ އިޤްތިޞާދީ މިނިވަންކަން ހޯދައި ދިނުން،“ ޒަމީރު ވިދާޅުވި އެވެ. ”އިޤްތިޞާދީ މިނިވަންކަން ފުރިހަމަގޮތުގައި އަޅުގަނޑުމެންނަށް ލިބިފައި އޮންނާނެ އިރާދަކުރެއްވިއްޔާ ރައީސް މުޢިއްޒުގެ ފަސްއަހަރު ނިމޭއިރު.“ ވިދާޅުވިއެވެ.
އޭނަ ވިދާޅުވީ ރާއްޖޭގެ އިގުތިސާދީ އަދި މާލީ ހާލަތި މިހާރު ކުރިއަށްދާ ގޮތަށް ބަލާ ނަމަ ދަރަނި މެނޭޖުކުރެވި، އިތުރު އިންވެސްޓްމަންޓްތަކާއި އެކު ލިބޭ އާމްދަނީ އާއެކު އިޤްތިޞާދު ޑައިވަސިފައި ވެސް ކުރެވޭނެ ކަމަށެވެ، އަދި ސީދާ ސަރުކާރުން މަސައްކަތްކޮށްގެން ހިންގޭ ޕްރޮޖެކްޓްތަކުން އާމްދަނީ ހޯދައި، އަދި ޑިވެލޮޕަރުންނާ އެކު ކުރެވޭ މަސައްކަތުން އެހެން ފަރާތަކަށް ބަރޯސާވާ މިންވަރު ކުޑަވެގެން ދާނެ ކަމަށް ވިދާޅުވި އެވެ.
ޒަމީރު ވިދާޅުވީ އަމިއްލަ ފައިމައްޗަށް ތެދުވެތިބެ، އަމިއްލަވަންތަ އިޤްތިޞާދެއް ދިވެހިންނަށް ބައްޓަންކުރެވިދާނެ ކަމަށެވެ. އެގޮތުން ރައީސްގެ ވިސްނުންފުޅަކީ ވެސް އެމަގުން ކުރިއަށް ދިއުން ކަމަށާއި، ސަރުކާރުގެ މި ފަސްއަހަރު ނިމޭއިރު، އަދި މިހާރު ދަޢުލަތަށް ލިބޭ އާމްދަނީ އާއި މާލީ ހިސާބުތަކަށް ބަލާއި ރު ހެޔޮބަދަލުތަކެއް އަންނާނެ ކަމަށް ވިދާޅުވިއެވެ.
މިނިސްޓަރު ވިދާޅުވީ މި ދައުރު ނިމޭ އިރު، އިޤްތިޞާދީ ގޮތުން ފުދުންތެރި، ދިވެހި އެންމެހާ ރައްޔިތުންނަށް އޭގެ ފައިދާ ލިބޭނެކަން ކަށަވަރު ކުރެވި، ރައްޔިތުންނަށް ފޯރުކޮށްދޭ ޚިދުމަތްތައް އޭގެ އެންމެ ފުރިހަމަ ގޮތުގައި ފައިދާވާ ގޮތަށް ލިބިދެވޭނެކަން ޔަގީން ވެސް ކުރެވިގެންދާނެ ކަމަށެވެ.
