ދިވެހިރާއްޖޭގެ ކަނޑުގެއުޅަނދުފަހަރު ޑްރައި ޑޮކް ކުރުމުގެ އުސޫލުތައް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އިން މިއަދު އާއްމުކޮށްފިއެވެ.
އެސޫލޫގައި ބުނެފައިވަނީ، ދިވެހިރާއްޖޭގެ ކަނޑުތަކުގައި ދަތުރުކުރާ އުޅަނދުފަހަރުގެ ރައްކާތެރިކަން ކަށަވަރުކޮށް، ބައިނަލްއަޤްވާމީ މެރިޓައިމް މިންގަނޑުތަކާ އެއްގޮތްވާ ގޮތުގެ މަތިން، އުޅަނދުފަހަރު ޑްރައި ޑޮކް ކުރުމާ ގުޅޭ އުސޫލުތަކެއް ކަމަށެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އިން ބުނީ، މި އުސޫލުތަކަކީ ދިވެހި ކަނޑުތަކުގައި އުޅަނދުފަހަރުގެ ސަލާމަތާއި، ދަތުރުކުރުމަށް އެކަށީގެންވާ ފެންވަރު ހިފެހެއްޓުމަށް އަޅާފައިވާ މުހިންމު ފިޔަވަޅެއްކަމުގައެވެ. އެގޮތުން.
ލަކުޑި އުޅަނދުފަހަރު:
މިނިސްޓްރީން ކަނޑައަޅާފައިވާ އުސޫލުތަކުގެ ދަށުން، 9 މީޓަރު ނުވަތަ އެއަށްވުރެ ބޮޑެތި ލަކުޑި އުޅަނދުފަހަރުން ކޮންމެ 18 މަހުން އެއް ފަހަރު ޑްރައި ޑޮކް ކުރަން ޖެހޭނެއެވެ.
ފައިބަރު އަދި ދަގަނޑު އުޅަނދުފަހަރު:
ފައިބަރު އުޅަނދުފަހަރުގެ ތެރެއިން، 18 މީޓަރު ނުވަތަ އެއަށްވުރެ ބޮޑެތި އުޅަނދުފަހަރުން ކޮންމެ 2 އަހަރުން އެއް ފަހަރު ޑްރައި ޑޮކް ކުރަން ޖެހޭނެއެވެ. މީގެ އިތުރުން، ދަގަނޑުން ހަދާފައިވާ އުޅަނދުފަހަރުން ކޮންމެ 3 އަހަރުން އެއް ފަހަރު ޑްރައި ޑޮކް ކުރަން ޖެހޭނެ ކަމަށް ވެސް މި އުސޫލުތަކުގައި ވަނީ ބަޔާންކޮށްފައެވެ.
ޑޮކް ކުރުމުގެ ރިޕޯޓްތައް ފުރިހަމަކުރުން:
މި އުސޫލުތަކުގައި ބަޔާންކޮށްފައިވާ ގޮތުން، އުޅަނދުފަހަރު ޑްރައި ޑޮކް ކުރުމަށްފަހު، އެކަމާގުޅޭ ރިޕޯޓްތައް ފުރިހަމަ ކުރަންވާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކަނޑައަޅާފައިވާ މިންގަނޑުތަކާ އެއްގޮތަށް، ހުއްދަ ލިބިފައިވާ ބޯޓްޔާޑެއް ނުވަތަ ކައުންސިލެއް މެދުވެރިވެގެންނެވެ.
މި ގަވާއިދުތައް ތައާރަފްކޮށްފައިވަނީ، ދިވެހިރާއްޖޭގެ ކަނޑުތަކުގައި ދަތުރުކުރާ އުޅަނދުފަހަރުގެ ސަލާމަތާއި، ދަތުރުކުރުމަށް އެކަށީގެންވާ ފެންވަރު ހިފެހެއްޓުމާއި، ކަނޑުގެ ގާނޫނުތަކާ އެއްގޮތަށް އަމަލުކުރުން ކަށަވަރު ކުރުމަށް ކުރިއަށްގެންދާ މަސައްކަތްތަކުގެ ތެރެއިންނެވެ. މީގެ ސަބަބުން ދަތުރުފަތުރުގެ ރައްކާތެރިކަން އިތުރަށް ހަރުދަނާވެގެންދާނެކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ހާމަކޮށްފައިވެއެވެ.
