މުސްލިމުން ކާފިރުކުރުމަކީ ޖާހިލުކަމާއި، ޝަރުޢީ ހުކުމްތައް ދޭހަނުވުމާއި ޝުބުޙުތަކަށް ހެއްލުމުގެ ނަތީޖާ ކަމަށް މިއަދު ރާއްޖޭގައި ކުރި ހުކުރު ނަމާދުގެ ޚުޠުބާގައި ވިދާޅުވެއްޖެއެވެ. މިއަދުގެ ހުކުރު ޚުޠުބާގެ މަޢޫޟޫއުއަކީ، ”މުސްލިމަކު ކާފިރުކުރުމުގެ ނުބައިކަން“ އެވެ. މިއަދުގެ ޚުޠުބާގައި ވިދާޅުވީ، މުސްލިމަކު ކާފިރުކުރުމަކީ މުސްލިމަކު ނުވަތަ މުސްލިމު ޖަމާޢަތެއް، ކުފުރަށް ނިސްބަތް ކުރުން ކަމަށާއި، އަދި އެމީހުންގެ ފުރާނަ އާއި މުދާ ހިފުން ހުއްދަ ކުރުން ކަމަށެވެ. މިއީ އެހާ ފަސޭހައި ކުރެވިގެން ވާނެ ކަމެއް ނޫން ކަމަށް ވިދާޅަމުން ޚުޠުބާގައި ވިދާޅުވީ، އެއްވެސް މުސްލިމަކު މުސްލިމު ކަމުގެ ޝަރަފު ލިބުމަށްފަހު އޭނާ އެދާއިރާއިން ބޭރު ކުރުމަކީ ވަރުގަދަ ހުއްޖަތާއި ޘާބިތު ހެއްކާއި ރޯމާ ދުވާލު ފަދަ އަލިގަދަ ދަލީލުތަކެއް ނެތި ކުރުން ހަރާމް ކަމެއް ކަމަށެވެ.
މިއަދު ގެ ހުކުރު ޚުޠުބާގައި ވިދާޅުވީ، މުސްލިމުން ކާފިރު ކުރުމުގެ މައްސަލަ ފެށިފައިވަނީ ހިޖުރައިން ފުރަތަމަ ޤަރުނުގައި ކަމަށާއި، އެއީ ޢަލީ ރަޟިޔައްﷲ އަންހު އާއި މުޢާވިޔަތު ރަޟިޔައްﷲ އަންހު އާއި ދެމެދު ހިނގި ޞިއްފީނު ހަނގުރާމާގައި ޙަކަމުން މެދުވެރިކޮށް ވާހަކަ ދައްކައިގެން ހަނގުރާމަ ހުއްޓާލުމަށް ޢަލީގެފާނު ރުހިވަޑައިގަތުމުން ކަމަށެވެ. އެހާ ހިސާބުން ޢަލީގެފާނުގެ ލަޝްކަރުން ބަޔަކު ނުކުމެއް ހަކަމުންގެ ގޮތުގައި އިންސާނުން ކަނޑައެޅީ ކީއްވެތޯ ޢަލީގެފާނާ ސުވާލު ކުރިކަމަށް ޚުތުބާގައި ވިދާޅުވިއެވެ. ޚުޠުބާގައި ވިދާޅުވީ ޚަވާރިޖުންގެ އެބަހަށް ޢަލީގެފާނު ދެއްވި ޖަވާބަކީ “ އެއީ ބާޠިލް ކަމެއް އެދި ބުނި ޙައްޤު ކަލިމައެކެވެ.“
ޚުޠުބާގައި ވިދާޅުވީ ޝަރުޢީ ނައްޞުތަކުން ސާފުކޮށް އެނގޭ ގޮތުގައި މުސްލިމަކާ ދިމާލަށް ބަދު ބަސް ބުނުމާއި ޤަޛުފު ކުރުމަކީ ހަރާމްކަންތަކަށް ވީއިރު ހީއެއް ނުވަތަ އަމިއްލަ ވިސްނުމުގެ މައްޗަށް ބިނާކޮށް މުސްލިމަކު ކާފިރު ކުރުން ހުއްދަ ނުވާނެ ކަމަށެވެ. މިކަމަށް އިޝާރަތް ކުރައްވާ ޚުޠުބާގައި ވިދާޅުވީ އެއްދުވަހަކު ބަނީ ސުލައިމު ވަންހައިގެ މީހަކު ބަކަރިތަކެއް ގޮވައިގެން ކީރިތި ރަސޫލާގެ އަސްޙާބު ބޭކަލުންތަކެއްގެ އަރިހުން ދަމުން އެބޭކަލުންނަށް އޭނާ ސަލާމް ގޮވާލެއްވިއެވެ. އެހިނދު އެބޭކަލުން އޭނާ އަހަރަމެންނަށް ސަލާމްގޮވީ އަހަރެމެންގެ ކިބައިން ސަލާމަތްވުމަށްޓަކައި ކަމަށް ވިދާޅުވެ އޭނާ ޤަތުލު ކުރައްވައި ކީރިތި ރަސޫލާގެ އަރިހަށް އޭނާގެ ބަކަރިތައް ގެންދިޔައެވެ. އަސްޙާބު ބޭކަލުން އެނިންމެވުނީ ރަގަޅަށް ނޫންކަމަށް ބަޔާން ކުރައްވާ މާތްﷲ ވަހީ ބަސްފުޅެއްގެ މާނާގައިވަނީ އޭ އީމާންވެއްޖެ މީސްތަކުންނޭ! ތިޔަބައިމީހުން ﷲ މަގުގައި ދަތުރުފަތުރުކޮށް އުޅޭހިނދު ފަހެ (ކަންކަމުގެ) ޙަޤީޤަތް ބަލައި އޮޅުންފިލުވާށެވެ. އަދި ދުނިޔޭގެ ދިރިއުޅުމުގައި ލިބޭ ފައިދާ އާއި މުދަލަށް ތިޔަބައިމީހުން އެދޭ ޙާލުގައި (އިސްލާމް ދީނުގެ ސަލާމުން) ތިޔަބައި މީހުން ސަލާމްކޮށްފި މީހަކަށް ތިބާއީ މުއުމިނެއް ނޫނޭ ތިޔަބައިމީހުން ނުބުނާ ހުށިކަމެވެ.“
މުސްލިމުން ކާފިރުކުރުން ފަދަ ނުބައި ކަންތައްތަކުން ދުރުވުމަށްޓަކައި އޮތް ހައްލެއް ކަމަށް ޚުޠުބާގައި ވިދާޅުވީ ސުންނަތް ޖަމާޢާތުގެ މަންހަޖަށް އެނބުރި ރުޖޫޢުވުމާއި އެކު ، އިންޓަރނެޓުން ދަސްވެނިވުމުގެ ބަދަލުގައި ދަރިވަރުވުން ކަމަށެވެ. އެހެނީ ދީނުގެ ކަންކަން ނޭގޭ މީހުންގެ ކިބައިން އިލްމު ހޯދަން ފެށުމަކީ ޤިޔާމަތުގެ އަލާމާތެއް ކަމަށް ކީރިތި ރަސޫލާ ހަދީޘް ކުރައްވާފައިވާ ކަމަށް ޚުޠުބާގައި ވިދާޅުވިއެވެ.
