ޑެޕިއުޓީ ކޮމިޝަނަރ އޮފް ޕޮލިސް އިސްމާޢީލް ނަވީން، ރޯޔަލް ކެނޭޑިއަން މައުންޓެޑް ޕޮލިސް (އާރު.ސީ.އެމް.ޕީ)ގެ އިންޓަރނޭޝަނަލް ލިއޭޒަން އޮފިސަރ އަދި ކައުންސެލަރ ވިލިއަމް (ބިލް) ބެންޓްލީ އާ ބައްދަލުކުރައްވައިފިއެވެ.
މިއަދު ޝަހީދު ޙުސައިން އާދަމް ބިލްޑިންގގައި ބޭއްވުނު މި ބައްދަލުވުމުގައި ދިވެހި ފުލުހުންގެ ޚިދުމަތާއި އާރު.ސީ.އެމް.ޕީ އާ ދެމެދު އެއްބާރުލުން އިތުރުކުރެވިދާނެ ދާއިރާތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނު ކަމަށް ދިވެހި ފުލުހުންގެ ޚިދުމަތުން ވިދާޅުވެއެވެ.
ދިވެހި ފުލުހުންގެ ޚިދުމަތުން ވިދާޅުވީ މި ބައްދަލުވުމުގައި މަޝްވަރާކުރެވުނު މުހިންމު ދާއިރާތަކުގެ ތެރޭގައި ޓެރަރިޒަމާ ދެކޮޅަށް ކުރެވޭ ތަހުގީގުތަކާއި މަސްތުވާތަކެއްޗާއި ފައިނޭންޝަލް ކުށްތަކުގެ ތަހުގީގުތަކާއި ފައިނޭންޝަލް އެނަލިސިސް އަދި ޑިޖިޓަލް ފޮރެންސިކްސްގެ އިތުރުން ރޭވިގެން ހިންގާ ކުށްތަކާއި އެތެރެކުރުން މަނާ ތަކެއްޗާގުޅޭ މައްސަލަތައް ހިމެނެއެވެ.
މީގެ އިތުރުން، ދިވެހި ފުލުހުންގެ ޚިދުމަތުގެ ހާއްސަ ބަހާތަކުގެ ގާބިލުކަން އިތުރުކުރުމާއި، ދެ ގައުމުގެ މެދުގައި ކުށްތަކާ ދެކޮޅަށް ގުޅިގެން މަސައްކަތްކުރުމާ ގުޅޭގޮތުންވެސް މަޝްވަރާކުރެވުނު ކަމަށް ދިވެހި ފުލުހުންގެ ޚިދުމަތުން ވިދާޅުވެއެވެ.
ޑެޕިއުޓީ ކޮމިޝަނަރ އިސްމާޢީލް ނަވީން ވަނީ އާރު.ސީ.އެމް.ޕީ އިން ދިވެހި ފުލުހުންނަށް ދެމުންގެންދާ އެހީތެރިކަމާއި އެއްބާރުލުމަށް ހާއްސަ ޝުކުރެއް އަދާކުރައްވާފައެވެ.
މި ބައްދަލުވުމުގެ ސަބަބުން ދެ ގައުމުގެ މެދުގައި ކުށްތަކާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާވެ، ޓްރާންސްނޭޝަނަލް ކްރައިމް ހުއްޓުވުމަށް ކުރެވޭ މަސައްކަތްތަކަށް އިތުރު ބާރެއް ލިބިގެންދާނެއެވެ.
